بحب خطيبي جدا.. وباكره أهله جدا جدا

أنا عندي مشكلة خانقاني جدا، ومش عارفة أعمل إيه؟ أنا مخطوبة بقالي شهرين، خطيبي كويس وكل حاجة؛ بس المشكلة في أهله؛ السنة اللي فاتت قال لي إني هاسكن في بيت العيلة عنده، وأنا رفضت شوية، وبعدها وافقت.

مامته جت عشان تتعرف عليّ؛ لكن اتصدمت؛ لاقيتها غيري وغير أهلي تماما؛ يعني طريقتها فلاحي شوية، مش مناسبة خالص معايا، هي وأختها وبنتها.. وبعد ما شفتهم رفضت تماما إني أسكن في بيت العيلة؛ لأني مش عايزة أولادي يبقوا زيهم؛ مع إن خطيبي غيرهم خالص؛ بس طبعا دول أهله.

المهم مشكلة السكن اتحلت واتخطبنا.. اتفقت مع خطيبي إنه مايكونش فيه زيارات عائلية خالص؛ يعني بين مامتي ومامته، وهو تفهم حاجة زي كده؛ لأن ماما بتضايق منهم؛ لأن يوم ما جم عشان خطيبي يتقدم لي عملوا كذا حركة مش كويسة؛ يعني دخلوا غرفة نومي من غير أي استئذان من والدتي أو من غير ما يخبطوا، وحاجات كده.

حماتي كلمت أمي ومصرّة إصرار شديد إننا نروح نتعزم عندهم يوم، طبعا إحنا رافضين خالص..

المهم أنا مش قادرة أتقبل الناس دي؛ لأني خايفة لما أتجوز يفرضوا نفسهم عليّ بالعافية.. مش عارفة أعمل إيه؟

Boty.sanawy

لو عايز تفضفض لنا دوس هنا