فلفل محشي بالأرز واللحمة على "سفرة دايمة"

وصفتنا النهارده هتكون سهلة وسريعة..
هيكون معانا فلفل محشي بالأرز واللحمة المفرومة، تابعونا...

الفلفل المحشي
المقادير:
* 6 حبات فلفل ملون
* 1/ 4 كيلو لحمة مفرومة
* 6فصوص ثوم مهروسة
* 2 ملعقة كبيرة زبدة
* ملعقة صغيرة بهارات
* ملعقة صغيرة قرفة
* 4 حبات طماطم
* 2 كوب رز
* ملح وفلفل
* 2 ملعقة صغيرة نعناع مجفف

لعمل الصلصة:
* 4 ملاعق كبيرة صلصة طماطم
* 1/ 4 كيلو طماطم
* 6 فصوص ثوم
* 1/ 2 كوب ماء
* ملح وفلفل
* 2 ملعقة صغيرة نعناع مجفف
* 1/ 2 كوب نعناع طازج مفروم

الطريقة:
لتحضير الحشوة:
- اغسلي الرز وانقعيه شوية، وبعدين سيبيه يتصفّى.
- شوّحي الرز في الزبدة لمدة 3:2 دقائق، وبعدين ضيفي عليه التوابل (البهارات والقرفة والملح والفلفل).
- قطّعي الطماطم مكعبات، وحطّيها على الرز ومعاها الثوم المفرروم والنعناع المجفف.
- بعد كده حطّي اللحمة المفرومة، وقلّبي الخليط كويس أوي.
- حضّري الفلفل بإنك تقطّعي رؤوسها وتنظفيها من الداخل، وممكن تمسحيها من الداخل بقليل من الملح.
- احشي الفلفل بالخلطة، وغطّي كل حبة فلفل بشريحة طماطم، وبعدين بالرؤوس اللي قطعتيها منها.
لعمل الصلصة:
- افرمي الثوم وشوّحيه في الزبدة، وبعدين حطّي عليه الطماطم بعد ما تقشّريها وتفرميها.
- دوّبي صلصة الطماطم في الماء، وبعدين ضيفيها على الثوم والطماطم.
- حطّي النعناع المجفف والطازج وتبليها بالملح والفلفل، وسيبيها تتسبّك لمدة 10 دقائق.
- رصّي الفلفل المحشي في صينية فرن عميقة، وبعدين صبّي الصلصة عليها وغطي الصينية بورق الفويل.
- دخّليه فرن ساخن على درجة حرارة 180، وسيبيها لحد ما الفلفل والرز يستوي.
- قدّميها مع الصوص، بالهنا والشفا.

خلصت وصفتنا النهارده..
استنونا كل يوم مع وصفات جديدة..
على "سفرة دايمة"..
سلام،،،