ماسك الفجل والليمون لعلاج النمش وآثار الحبوب

أهلا بكل بنات "قمر 14"..
في حلقة النهارده هكمّل الرد على كل باقي أسئلتكم وإيميلاتكم..
وهاقول نصايح بسيطة لكل عروسة بتجهّز لبيتها، تابعونا...
أنا عندي هالات سودا تحت العين؟ وعندي حبوب في البشرة؟ ومسام بشرتي واسعة؟
مهم أوي علشان تعالجي الهالات إنك تحطي كمادات خيار على عينيك مرتين في اليوم يوميا، وعلاج الحبوب؛ إنك تعملي ماسك الخميرة والعسل، ولو الحبوب كتيرة كرّريه يوميا، ولو متوسطة يبقى كرريه يوم ويوم.
بالنسبة للمسام الواسعة؛ مية الأرز البلدي من الحاجات الهايلة اللي بتقفل المسام، وكمان فيه ماسك عبارة عن بشر برتقال وبشر ليمون بنغليهم في كوب ماء وبعدين نصفّيهم وناخد اللوسيون ندلّك به بشرتنا ونسيبهم شوية، ودي طريقة هايلة جدا بتقفل مسام البشرة، وبنستمر عليها يوميا لمدة شهر، وهتستمري على مية الرز وكمان لوسيون البرتقال والليمون يوميا، بس هتمشي الروتين على حسب أنتِ يومك ماشي إزاي؛ يعني لو هتخرجي الصبح؛ يبقى تعملي مية الأرز الصبح، واللوسيون قبل النوم، ولو مش هتخرجي الصبح؛ يبقى تعملي العكس وهكذا... ويفضل إن لوسيون البرتقال يبقى للصبح، بس تاخدي بالك إنك ماتتعرضيش لضوء أو بخار، ومية الأرز خلّيها قبل النوم.
عايزة اشتري جهاز سونة في البيت؟
جهاز السونة الشخصي أنا بانصحكم إنكم تستعملوه مرة واحدة فقط في الأسبوع على الأكثر؛ وده لأن التعرض للبخار كتير بشكل يومي بيؤدي لظهور التجاعيد بسرعة في الجسم وبيسبب مشكلات كتير، وخاصة كل ما يكون السن أصغر لو استعملناها بكثرة هيسبب مشكلات كتير.
والأجهزة دي بتكون متوفرة في محلات بيع الأدوات الرياضية، وسعرها بيتراوح بين 350- 400 جنيه.
عايزة اعرف أفضل وسيلة لإزالة الشعر من المناطق الحساسة، وإزاي افتّحها؟
السويت والشمع أفضل الطرق لإزالة الشعر من المناطق الخاصة، وبالنسبة للتفتيح فأي ماسك تفتيح قلنا عليه للوش ممكن تستخدميه للمناطق دي، كمان ماسك الخميرة والعسل هيروّق البشرة ويزيل أي حبوب.
إضغط لمشاهدة الفيديو:
عايزة وصفة طبيعية لتفتيح البشرة؟
فيه ماسكات كتيرة للتفتيح؛ قلنا عليها في حلقات سابقة ممكن ترجعي لها، وأهم حاجة قبل ما تنزلي في الشمس إنك تحطّي صن بلوك، ومن الأنواع الكويسة هو فوتوديرم، وده فيه منه للبشرة العادية، وكمان فيه للبشرة اللي فيها حبوب.
هل ممكن نستخدم الجليسرين والليمون بعد السويت؟
ممكن تستخدمه؛ بس لو البشرة حساسة وبتلتهب يبقى تستني يوم قبل ما نستخدمه، ونقدر نحطّه على بشرة الجسم كله؛ هيفتح ويروق البشرة تماما.
هل ماسك الزيت الثلاثي بيساعد في إزالة قشرة الشعر؟
أيوه؛ لأن زيت الثوم وزيت الجرجير اللي بيتكون منهم حمام الزيت الثلاثي من الحاجات الهايلة جدا لعلاج قشرة الشعر.
عايزة اعرف إيه الحاجات المفيدة لفرد الشعر؟
زي ما اتكلمنا قبل كده إن فرد الشعر بالوسائل الكيميائية مضر جدا، ومن الماسكات المفيدة لتنعيم الشعر؛ هو ماسك جوز الهند: وهو عبارة عن 1/ 2 كوب زيت جوز الهند، مع 3 ملاعق كبيرة حلبة مطحونة، وملعقة بن، وبنطبخهم على النار، ونحطّهم على الشعر بعد غسله، ونسيبه لمدة ساعة ونصف، والماسك ده بيطرّي الشعر جدا وبينعّمه، ونقدر نستمر عليه كل أسبوع.
شعري خفيف جدا من الأمام.. أعمل إيه؟
معظم البنات المحجبات بتعاني من المشكلة دي، وعلشان كده مهم جدا إننا نلبس طرح من القطن، أو على الأقل نلبس باندانا قطن تحت الطرحة؛ علشان تعمل كعازل عن الشعر ونقدر نلبس أي طرحة من فوق.
وبالنسبة للوصفات المفيدة لتساقط الشعر؛ هو ماسك الزيت الثلاثي المكوّن من زيت الثوم، وزيت الجرجير، وزيت جوز الهند، كمان من الوصفات الهايلة للتساقط؛ إننا نجيب مقدار من زيت الزيتون حوالي 3/ 4 برطمان، 3 رؤوس ثوم ونفرمهم كويس أوي بالقشر، ونحطهم في الزيت، ونسيبه منقوع فيه لمدة 15 يوم، وبعد كده نصفيه كويس أوي، وهنستخدمه كحمام زيت مرتين في الأسبوع؛ هيجيب نتيجة هايلة.
عايزة أعرف علاج للنمش؟
ماسك الفجل من أحسن الحاجات اللي بتساعد في علاج النمش، وكمان البقع، وآثار الحبوب.
طريقة عمل ماسك الفجل:
بنجيب الفجل ونعصره كويس جداً في عصارة البرتقال ونصفّيه كويس، ونشوف السائل اللي هيطلع من الفجل قد إيه، يعني لو طلع معانا كوب من عصير الفجل نخلط معاه كوب من عصير الليمون وكوب من زيت اللوز الحلو، ونقلبهم مع بعض كويس، ونحطّهم في الثلاجة، وعند الاستخدام نرجّه كويس، ونحطّ منه على أماكن البثور والبقع والنمش، لكن لازم ناخد بالنا إننا لما نعمل الماسك ده مش لازم نتعرض لأشعة الشمس مباشرة أو لأي إضاءة قوية.

دلوقتي هنكمل مع بعض باقي النصايح للعروسة المقبلة على الزواج وإزاي تجهز لبيتها
بالنسبة للعروسة لما تشتري الملايات لازم تبقى حريصة إنها تكون قطن 100%؛ ونظرا لأن الملايات دي بتكون غالية أوي فمن الأفكار اللي ممكن نعملها هي إننا نشتري قماش من القطن؛ وده فيه شركات كبيرة بتبيعه بألوان وأشكال مختلفة، وهنفَصل من الأقمشة دي ملايات بأفكار جديدة من ابتكارنا، وفيه شركات معروفة لتصنيع القماش زي المحلة والعامرية، وبكده نكون ضمنّا إننا هننام على ملايات صحية وناعمة، وكمان هتكون بأشكال مبتكرة ومختلفة تماما عن أي بيت تاني.

إضغط لمشاهدة الفيديو:

خلصت حلقتنا النهارده..
بس أفكارنا لسه ماخلصتش..
استنونا الحلقة اللي جاية وماسكات كتير للبشرة والشعر..
سلام،،،
*********************
للرجوع للحلقات السابقة
اضغط هنا "جمالك من الطبيعة مع رانيا"
*********************