أنا حر .. أفكار محظورة !

أنا شايف ان ناس كتير فاهمه موضوع الحرية ده غلط، فا كان لازم أوجه لهم رسالة ..
هسألك سؤال .. إنت عاوز إيه ؟ و عايش ليه ؟؟
مهو لازم علشان تبقى حر , تحدد أهدافك في الحياة ..
فكرت .. جاوبت .. طيب نكمل .. معرفتش تجاوب أحسنلك تقفل البلوج و تقوم تنزل تعد على القهوة الى تحت بيتكوا !
لأنك مجرد تايه أو بتألد غيرك من غير فهم !
الحرية بتخلي قدامك السم .. إنت حر ممكن تشربه و تموت لو عايز ..
الحرية بتخلي قدامك إنك ممكن ترمي نفسك من الدور العاشر و تتكسر رقبتك لو عايز ..
تقصدي إيه بالتشبيهات اللطيفه دي !؟
قصدي . أنت حر ما لم تضر ..
أنت مش واصى على حد و محدش واصى عليك .. غير لو أهلك حشريين حبتين !
متجيش توقف واحده فى الشارع , لمجرد إن لبسها مش عاجب سيادتك ..أو لأنها ( سافره ) تعمل نفسك عم الشيخ فى برنامج " إلى طريق الجنة " و تسمعها ما لذ و طاب من النصائح اللي بتقلب بشتايم و توصل لحد التكفير !
متفرضش رأيك على حد و متحجرش على رأي حد .. لأنك حر و هم كمان أحرار و مفيش حد أحسن من حد ..
و لازم نبقى متفقين إن فى حاجات في حياتنا مينفعش تبقى فيها حر ..
مش تناقد بس تعالوا كده نفكر ؟
ها ممكن الإنسان يقول انا حر و مش هاكل تانى .. لأ طبعا لأنه هيموت ..
تعالى نطبق بنفس المنطق ده على كذا حاجه .
أصل لازم الإنسان يلتزم بشويه قوانين في حياته و إلا هتبقى فوضى !
تعالى معايا نتخيل لثانيه , لو كل واحد سابوه يروح المدرسة بمزاجه , محدش هيتعلم !
تخيل إنك عيان و اتصلت بالعيادة لقيت الدكتور مزوغ ..
أو اتسرقت و اتصلت بالبوليس لقيتهم اجازه ..
كفايه .. عشان خربت الدنيا
قصر الكلام ..
حدد هدف .. اعمل اللى عليك .. و قول انا حر بدام مش هضر .. بس خلاص
أنتوا نمتوا ولا ايه ؟