ولسه بحبه!

أنا بنت عندي 22 سنه ، الحمدلله أقدر أقول على نفسي أني جميلة و محبوبة جدًا ، مقدرش أقول أني جربت الحب قبل كدا علشان كان ليا مواصفات ف الحد اللي ممكن ارتبط بيه كانت صعبه و مش سهل إن أي شاب يعجبني، المهم إن ف آخر سنه ليا ف الجامعة " أنا كنت مغتربه "، اتعرفت ع شاب جاري بالصدفه ساعدني ف حوار توصيل نت و كدا و كان لازم إننا نأخد أرقام موبايلات بعض علشان لو حصل حاجه ف النت و كدا، من أول مرة شفته و حسيت ف عنيه اعجاب فظيع ليا بس مش حطيت ف دماغي ، بعد فترة حصلت مشكله عندي ف النت و فعلا كلمته أسأله، و كدا حسيت منه اهتمام فظيع ليا ع عكس باقي زميلاتي، و بعد كام مكالمة مني ليه كانوا كلهم عن مشاكل النت وكدا، ابتديت أحس إنه بيقربلي واحدة واحدة، و فعلا بعدها بفتره اعترفلي إنه معجب بيا، وفعلا أنا كنت ف اسعد حالاتي زي ماكون كنت مستنيه دا منه جدًا، ووافقته اننا نكون أصحاب بما إننا جيران و بنتعامل مع بعض و كدا و بعدها بفتره بسيطه جدا و بسرعه رهيبه قدر يوقعني ف حبه بكل حاجه فيه و خاصة إنه كان زي منا عازوه بالظبط، علقني بيه أوي لدرجه إنه خلاني أنا اللي أسبقه و اقوله بحبك..بعدها برده بدأ يطلب مني إننا نتقابل وأنا وافقت أول مرة.
بعد كدا علاقتنا اتطورت بسرعة جدًا و بدأ يطلب مني إننا نتقابل كتير و كدا و طلبات غريبه المفروض انها بدافع الحب بس للاسف اكتشفت بعد كدا ان كل دا مش كان حب، عرفني بالصدفه علي صاحبه الانتيم و لما صاحبه عرفني أوي و عرف اد ايه أنا بحب صاحبه، جه قالي كلام كتير أوي ع اللي أنا مرتبطه بيه ، طبعا كله كلام زباله إنه بتاع بنات و إنه مش بيحبني و إن أنا مجرد بنت بيقضي وقت معاها و بصراحه صدقته لأن كل كلامه كان بادله و سمعني كمان تسجيلات اللي أنا مرتبطه بيه بيقول كلام مش حلو عليا.
طبعا انهارت و كنت بموت و حياة ربنا لاني حبيته أوي و كنت متصوره إنه بيحبني ، و بعدت عنه من غير حتي ماقوله ع الأسباب بس اللي عرفته بعدها إنه فهم ان وصلي حاجه، فقدت الثقه ف نفسي و ف أي حد، بس للأسف معرفتش أكرهه برغم كل المحاولات اللي عملتها، و دي مشكلتي اللي موقفه حياتي… بجد تعبانه أوي نفسي أكرهه .. ساعدني
صديقتنا العزيزة
الحب هو قدر الإنسان مهما حاول الهروب منه أو الابتعاد عن الوقوع فيه …أنتي لم تقترفى شئ … كل ما فعلتيه هو أنك أحببت شخص واخلصتى له، وهو بالمقابل لم يحبك على الاطلاق.
تعالى ننظر إلى الموضوع من الجانب الايجابى ، الله أظهر لك حقيقة مشاعرة تجاهك، وهذه رساله من الله لكى لا تضيعى وقتك أو تستنفذى من قلبك حب لشخص لا يستحقة ، أبدًا لا تفقدي الثقة فىي نفسك واشكرى الله عز وجل على ما أنعم عليكى من نعم، وكفاكى الوقت الذى ضاع والحب الذى ذهب إلى شخص لم ولن يقدرة .
يجب أن تستيقظى من هذا الكابوس، وأن تتأكدي من أنك ستجدين فى يوم من الأيام الفارس الذى يقدرك ويقدر مشاعرك الرقيقة، كما يجب أن تثبتى لنفسك قبل أى شخص أنك قادره على استكمال حياتك، وأنك طويت هذه الصفحة تمامًا، ولا تسمحى له بالتلاعب على مشاعرك مرة أخرى ..أنت فتاة جميلة وستجدين اإن شاء الله الرجل المناسب قريبًا