قابلت الشخص الصح فى الوقت الغلط!!

السلام عليكم ورحمة الله وبركاته
أود أشكركم جزيل الشكر والعرفان بهذا الباب الشيق من هذا الموقع الممتاز للتواصل فهاذا الباب لجأت إلية حينما تعبت واحترت من كتر التفكير فى موضوعى لا أود أن اطيل على سيادتكم وأرجو من سيادتكم افادتى بحل لمشكلتى فانا أعمل مدرس مساعد بكلية التربية ومتزوج وعندى ابنتى لكن أنا ظروف زواجى كانت بعد تخرجى من الكلية وكانت عقليتى لم تنمو بالشكل الأفضل للاختيار الجيد أنا لا أعيب فى زوجتى هى غلبانة واستحملت معايا كتير، فانا لا أنكر – لأن النكران من شيم الغادرين – لكن أنا مش مستريح فى حياتى؛ لأنى لا أشعر بالحب وحالتي تختصر بأنى فى حالة الاحتياج للحب فأنا أدخل البيت ولا أكون شغوف بالجلوس به باختصار زهقت فأنا لا أقترب من زوجتى ولا أشعر بأنى متزوج هناك عدة أسباب لذلك فعائلة زوجتى ضعيفة جدًا اجتماعيًا ده مش ذنبها؛ لأنى أنا الى اخترت أبوها يعمل سباكا ولا أعيب فى عملة فالشغل مش عيب أعمامها سواقين وسباكين ولها اخين واحد فى كلية والثانى خلص مدارس الأورمان ونصحت كثيرًا بأنه يكمل ودخل معهد ولكن مش عاوز يكمل أنا تعبت لاختلاف ثقافتهم عنى مع أنى أنا متحمل الخطأ لأنه كان اختيارى بس بجد انا تعبت لانى مش بحبها عايش معاها وخلاص عمرى ما حسيت إن أنا مبسوط بالعكس أنا دايمًا كنت بهرب من حياتى دي كلها بعلاقات كتير أعلم أنه غلط بس أنا كنت بهرب من كل دة، لأنى مش حاسس بيها نهائى كانت علاقتى الزوجية كالروتين لحد ما منعتها أصلا لحد ما شفت سارة حسيت يعنى اية حب وكانت الوحيدة الى صارحتها بكل حاجه وبمشاكلى مع زوجتى مع أنى كنت متأكد إن هيا مش هتكمل معايا لكن هيا قالت إنها بتحبنى برضو، غيرتنى وخلت أسلوب حياتى مختلف في التعامل مع الناس فى شغلى فى كل حاجه ببقى مبسوط لمجرد انى بسمع صوتها لانى بجد حبيتها لكن دلوقت فى بيت وفى بنت وأنا مش عارف أعمل إية حاولت أبعد عنها لكن مقدرتش وكمان قالت إن فى عريس متقدم ليها وباباها تقريبا موافق وأنا مش عارف أعمل إية اتكلم مع أهلى ولا أعمل إية أنا قلت لزوجتى لإنها لاحظت أنى متغير نهائى بقى أكتر ما أنا مش مبسوط معاها وقلت ليها بصيغه إنى بهزر إنى هتجوز تانى أنا مش قادر أتخيل ان هيا ممكن تكون مع حد غيرى أنا بقيت عامل زى المريض النفسى الى محتاج للعلاج وفى نفس الوقت الموقف صعب خايف أقول ليها مش هقدر وتسبنى وفى نفس الوقت الموضوع هيبقى صعب عندى ومش عارف أتصرف إزاى وفكرت إنى أتكلم مع حد من أهلها لكن أنا هبقى بتكلم لوحدى وبفكر انى اتصرف لكن يبقى انا بظلمها معايا وكمان انا مكنتش حاكى ليها ان انا منجب بنت لانى كنت خايف ان هيا تسبنى كل الى هيا عارفاها ان انا متزوج وعلى خلاف دائم معاها وانا خلاص تعبت انا حاسس ان انا مش قادر اركز فى حاجة هل كل ده ذنب ليا ام ماذا فانا لا اريد ان اكون ظالما لحد وفى نفس الوقت انا مش عاوز اسيبها لانى حبيتها وهيا الوحيدة الى انا مبسوط معاها لمجرد رؤيتها فهى كالملاك بقيت بخاف عليها اكتر من نفسى فانا بحس انى بملك الارض وانا عليها وانا جنبها مبقتش حاسس بحد الى بيها بستنى الوقت الى ممكن اشفها فية واتكلم معاها فية فماذا افعل ارجو من سيادتكم افادتى بهذا الموضوع وأتمنى ان يكون الرد سريعا لان لا يوجد وقت فكما ذكرت يوجد عريس ليها وأسف للاطالة ورحابة صدركم لاستماعى ولكن انا بجد تعبان والله وهتجنن لو هيا مش معايا وعلى فكرة هيا غير اى حد انا عرفته وده مش مراهقة مثلا او حاجة لكن بجد انا بحبها لان انا مكنتش امتلك الصراحة انى اواجه مشاكلى الا بيها وأنا ناوى انى لو اتكلمت مع حد عندها فالبيت هقول كل ظروفى فالبيت وليها وأنا متأكد من ان هيا هتوافق عشان هيا كمان بتحبنى ومش عاوزه تسبنى لكن ماذا افعل فى الظروف ؟؟ هذه مشكلتى باختصار …. فأنا أعلم إنى قابلت الشخص الصح فى الوقت الغلط بس بجد بحبها
صديقنا العزيز
في بداية الأمر أخى الكريم قصة زواجك أنت المسؤل الوحيد عن نجاحها أو فشلها
الاختيار من البدايه كما قلت كان خطأ سواء في اختيارك الفتاة لأنك لم تكن تحبها وعائلتها والفجوة الثقافية الموجودة بينك
أولاً: عليك أن تتأكد من الفتاة إن أهلها سيقبلوا أن يزوجوك ابنتهم ، لو كان ذلك ممكن فلا تظلم زوجتك أكثر من هذا وتحدث معها بصراحة عن الوضع وإنك تريد أن تتزوج بأخرى، وإن لها حريه الاختيار في أن تظل معك كزوجة أولى أو الانفصال، فهذا حقها شرعًا أن تخبرها، وأن توافقك على ما تنوى فعله.
لكن إذا لم يوافق أهل الفتاة على تزويجها لرجل متزوج ولديه طفله من وجهه نظرى أن تتقى الله فى زوجتك وابنتك وتحاول مرة أخرى من أجل ابنتك وزوجتك اللتان لا ذنب لهما فيما تشعر وفي اختيارك، أما لو كانت الحياة بالنسبه لك مستحيلة مع زوجتك بشكل نهائى عليك أن تخبرها بذلك وتعطيها كامل حقوقها لكى لا تكمل حياتها مع شخص لا يطيق الحياة معها وأدعوا الله عز وجل أن يلهمك الصواب.