مع رانيا.. الفاكهة لصحة بشرتك وشعرك.. وماسكات للبشرة الدهنية

أهلا وسهلا بكل أصدقاء "قمر 14" مع حلقة جديدة من حلقات "جمالك من الطبيعة مع رانيا"، واللي حبينا نقدِّم لكم فيها معلومات جديدة ومختلفة مع بداية السنة الجديدة..
في حلقتنا النهارده هنعمل ماسكات مميزة جدا للبشرة والشعر، مكوّناتها الأساسية من الفواكه والخضراوات، واللي زي ما كلنا عارفين لهم فوائد كتيرة للبشرة والشعر والصحة بشكل عام...
الأفوكادو.. ثمرة أساسية في عالم التجميل
الأفوكادو ثمرة لها فوائد كتيرة جدا للبشرة والشعر، ودي ممكن نجيبها مِن عند أي فكهاني أو من أي سوبر ماركت كبير، بس لازم ناخد بالنا لما نيجي نشتريها؛ علشان نعمل بها ماسكات للبشرة والشعر، إننا لازم ننقيها طرية ما تبقاش جامدة أوي، علشان نقدر نستخدمها بسهولة، ودلوقتي هنشوف مع بعض إزاي ممكن نخلطها مع بعض المكوّنات، ونعمل بها ماسكات مفيدة جدا للبشرة والشعر.

الأفوكادو والموز.. لبشرة فيها نضارة ولمعة طبيعية
الفواكه الطازجة من الحاجات اللي بتدّي للبشرة طلّة حلوة أوي، وبتخلّي فيها لمعة ونضارة وصحة، ودلوقتي هنعمل ماسك من الأفوكادو والموز مناسب لكل أنواع البشرة.
المكونات:
* 1/ 2 ثمرة أفوكادو مقشّرة
* ثمرة موز
* 2 ملعقة صغيرة لبن بودرة (اختياري)
* ملعقة صغيرة زيت زيتون
الطريقة:
اهرسي نصف ثمرة الأفوكادو مع الموز كويس جدا، لغاية ما الخليط يبقى ليّن تماما، وبعد كده ضيفي اللبن، واللبن في الماسك ده اختياري، يعني لو بشرتك جافة بتضيفي اللبن، لكن لو بشرتك عادية ممكن تحطّي وممكن لأ.
بعد كده بتقلّبي كل المكوّنات مع بعضها، وممكن تضيفي للخليط نصف ملعقة ميه عادية، علشان الخليط يبقى سائل شوية، وفي النهاية بتضيفي زيت الزيتون، وتقلّبي الخليط كله مع بعضه.
والماسك ده بتوزّعيه على بشرتك كلها بعد ما تغسليها كويس جدا بالليفة والصابون، وسيبيه لمدة نصف ساعة، وبعد كده اغسلي وشك بالميه.

إضغط لمشاهدة الفيديو:
الأفوكادو والعسل.. لشعر صحي وناعم
الماسك التاني اللي هنعمله بثمرة الأفوكادو هنستخدمه للشعر فقط.. طبعا إحنا ممكن نستخدم ثمرة الأفوكادو من غير أي إضافات على شعرنا، وهتدينا نتيجة حلوة أوي، ولكن إضافة العسل والزيوت بتدي لمعة جميلة للشعر.
المكونات:
* 1/ 2 ثمرة أفوكادو مقشّرة
* ملعقة كبيرة عسل نحل
* ملعقة زيت لوز حلو (اختياري)
الطريقة:
اهرسي الأفوكادو كويس أوي، واخلطيه مع باقي المكوّنات، وبعد كده وزّعي الماسك ده على شعر نظيف، وابدئي من الجذور، وبعد كده بتنزلي على باقي الشعر كله، وبتسيبيه على الشعر لمدة ساعة، وبعد كده اشطفي شعرك بالميه، لكن لو ضفتي على الماسك زيت اللوز، يبقى لازم تغسلي شعرك كويس بالشامبو بعد مرور الساعة؛ علشان تتخلّصي من آثار الزيت اللي هتبقى موجودة على الشعر بعد الماسك.

إضغط لمشاهدة الفيديو:
سلطة البنجر.. مصدر مهم للزنك الضروري للشعر
البنجر من الحاجات المفيدة جدا جدا للشعر؛ لأنه بيحتوي على نسبة كبيرة من مادة الزنك اللي بيحتاج لها الشعر علشان يبقى كثيف وفيه صحة ولمعة.
وفيه ناس كتير مابتحبش تاكل البنجر، لكنه زي ما قلنا مفيد وضروري جدا لصحة الشعر، وممكن تعملي منه سلطة وتاكليها كل يوم قبل وجبتك الأساسية، وطريقة تحضير سَلطة البنجر سهلة جدا، كل اللي عليكي إنك تجيبي البنجر وتغسليه وتسلقيه كويس جدا، وبعد كده تزيلي القشرة الخارجية بتاعته، وتقطّعيه مكعبات أو حلقات، وتضيفي عليه زيت زيتون وخل وليمون، واحتفظي بالسلطة في الثلاجة، وخدي منها ما يُعادل ثمرة كاملة يوميا قبل الأكل بربع ساعة.
الزنجبيل والشاي الأخضر.. للحفاظ على جمالك وشبابك
الزنجبيل مِن المشروبات المهمة جدا لتغذية البشرة والشعر، وبانصحك بتناول كوب زنجبيل يوميا، خاصة وإحنا في الشتاء؛ لأنه بيدفّي جدا.
كمان الشاي الأخضر مِن المشروبات المفيدة جدا؛ لأنه بيحتوي على مضادات للأكسدة، اللي بتعمل على تأخير ظهور التجاعيد على البشرة، وبالمداومة على تناول المشروبات دي هتقدري تحافظي على جمالك وشباب بشرتك لفترة طويلة.
ماسك الزنجبيل.. لترطيب وتنعيم جلد القدمين
الزنجبيل اللي بنستخدمه كمشروب بيكون مطحون، لكن دلوقتي هنشوف مع بعض الزنجبيل الطازة، واللي ممكن نستخدمه في أكلات كتيرة جدا، وكمان بيدخل في كتير من الماسكات المفيدة للبشرة والشعر، ودلوقتي هنعمل به ماسك لترطيب القدمين وعلاج الالتهابات اللي بتحصل فيها في بعض الأوقات بسبب الإرهاق والتعب.
وطريقته سهلة جدا، كل اللي عليكي إنك تاخدي قطعة صغيرة من الزنجبيل الطازة، وتقشّريها وتبشريها، وبعد كده تحطي الزنجبيل المبشور ده في طبق فيه لتر ميه دافية، وتنقعي رجلك في الميه دي، ومع المواظبة على الطريقة دي هتحسّي براحة ونعومة كبيرة في رجلك.
الينسون النجمي.. وقاية طبيعية من الإنفلونزا
النوع ده مِن الينسون مش معروف أوي زي الينسون العادي، ولكنه مفيد جدا وطعمه مختلف عن الينسون العادي تماما، وفايدته إنه بيحتوي على نسبة كبيرة من التاميفلو اللي بيقي الجسم من الإصابة بالإنفلونزا.
وتحضيره سهل جدا، كل اللي عليكي إنك تاخدي من 2 : 3 حبات من الينسون ده، وتنقعيه في كوب ميه مِن بالليل للصبح، والصبح اغليه واشربيه، وبكده تقدري تاخدي كل الفايدة بتاعته.

إضغط لمشاهدة الفيديو:
بياض البيض.. للبشرة الدهنية
وصلتني مشاركات كتير منكم بتطلبوا فيها ماسكات للبشرة الدهنية، علشان كده هنعمل دلوقتي ماسكين للبشرة الدهنية، ومكوناتهم سهلة ومتوفّرة في كل بيت.
الماسك الأول مكوّناته عبارة عن:
* بياض بيضة
* عصير 1/ 2 ليمونة متوسطة
الطريقة:
بتخلطي الاتنين مع بعض، وبعد كده تفرديهم على بشرتك بعد ما تغسليها كويس، وسيبيه على بشرتك لمدة نصف ساعة، وبعد كده اغسلي بشرتك كويس، والماسك ده بيغذّي البشرة الدهنية جدا ويقوّيها، وكمان بيفتح لونها بسبب وجود الليمون.
الماسك التاني مكوّناته عبارة عن:
* بياض بيضة
* عصير 1/ 2 ليمونة
* قطرات من زيت الورد
* ملعقة عسل نحل
الطريقة:
بتخلطي كل المكوّنات دي مع بعضها كويس، وبعد كده توزّعيها على بشرتك، وتسيبيها لمدة نصف ساعة، والماسك ده مفيد للبشرة الدهنية اللي بتعاني الجفاف، وبتظهر عليها بعض القشور.
ولكن فيه حاجة أحب أوضّحها وهي إن أي ماسك بيحتوي على البيض ماينفعش نعمله ونحتفظ به في الثلاجة، لكن لازم نستعمله في وقتها على طول.

إضغط لمشاهدة الفيديو:

وبكده تكون خلصت حلقتنا النهارده..
أتمنّى إني أكون قدّمت فيها بعض المعلومات اللي إنتم محتاجين لها..
استنوني في حلقات أكتر ومعلومات ونصايح جديدة..
وفي انتظار تعليقاتكم وأسئلتكم..
سلام،،،

*********************
للرجوع للحلقات السابقة
اضغط هنا "جمالك من الطبيعة مع رانيا"
*********************