اللي يتعب يلاقي

أولاً أحب أقدم لكم عظيم الشكر على موقعكم العسل ده، ويا رب يكون أول موقع على النت في مصر كلها.

أنا عندي 23 سنة، وباتمنى ألاقي بنت تناسب شخصيتي من حيث الرقة والرومانسية والحنان والعطف، نفسي بجد ألاقي البنت اللي تفهمني لأني مرّيت بتجربة حب فاشلة وتعبت جداً منها؛ لأنها مع الأسف اتخلّت عني في أكتر وقت أنا كنت محتاج لها فيه.

دي أول مشكلة، أما مشكلتي التانية إني بابصّ للدنيا على إني غريب عنها وعن الناس اللي عايشين فيها؛ بمعنى إني مش بحب أشتغل، واتعودت على الراحة والرفاهية في حياتي.. أنا باقول لنفسي: ربنا خلق البشر دول كلهم علشان يكون كل واحد ليه دور في الدنيا دي، وأنا لغاية دلوقتي مش لاقي لنفسي أي دور، وخايف الزمن يمرّ وأتبهدل في حياتي.

لو سمحتم تحلوا لي المشكلتين دول، ويا ريت يكون بأسلوب سهل علشان أقدر أفهمه، وشكراً ليكم.

habob


مشكلتك اللي لاحظتها فعلاً هي إنك بتحب الحاجة السهلة، واللي مش عايز تتعب فيها؛ مش عايز تشتغل ولا تتعِب نفسك، وفي نفس الوقت بتقول إنك لغاية دلوقتي مش لاقي لنفسك أي دور في الحياة؛ طيب إزاي عايز تلاقي دور في الحياة وإنتَ أصلاً مش عايز تشتغل ولا تتعب، وما إديتش نفسك فرصة إنك تدوّر على حاجة تناسبك أو تنفعك؟

اسمح لي يا صديقي أن أتكلم معك بالعامية؛ زي ما طلبت إن اللي يكلّمك يتكلم معاك "بأسلوب سهل"، علشان نقدر نتواصل.

اسمح لي كمان إني أقول لك بخصوص البنت اللي عايز تلاقيها ويكون فيها المواصفات اللي بتحلم بيها، إنك حتى مش عايز تعطي نفسك الفرصة اللي تدوّر فيها على البنت المناسبة اللي بتتمنى إنك تلاقيها، وبمجرد إنك فشلت مرة في علاقة، خُفت تكرر المحاولة وتدوّر على واحدة تانية تلاقي فيها مواصفاتك، واستسهلت الشكوى، وقلت إنك مش لاقي.

طب على أي أساس قلت كده؟! صديقي العزيز، ما أسهل الشكوى دون إجراء محاولة واحدة في البحث والعناء، حاول يا صديقي أن تغيّر من شخصيتك ولو قليلاً، وامنح نفسك بعض الوقت في محاولة بذل أي مجهود.

الحقيقة إنك "عين في الجنة وعين في النار" فإنت عايز تحب وتتحب، وتشتغل، ويكون ليك دور في الحياة؛ لكن في نفس الوقت مش عايز تتبهدل ولا عايز تبذل أي مجهود في الشغل ولا في البحث أو حتى إنك تعمل محاولة تانية في الارتباط والبحث عن المواصفات اللي إنت عايزها في فتاة أحلامك.

حل مشكلتك يا صديقي متمثل في إنك تحاول تغيّر من طريقة تفكيرك وطريقة نظرك للحياة، ولازم تعرف إن كل واحد بيبذل مجهود منظّم في شيء معيّن، لازم يلاقي النتيجة اللي بيتمناها، ومش من المقبول إنك تجلس من غير ما تشتغل ولا تعمل أي حاجة، وتقول أنا نفسي ونفسي.. صدقني ماكانش حد غلب، كانت كل الناس جلست دون أي مجهود واتمنّت هي كمان.

علشان كده بص وركّز كويس وشوف نفسك بتعرف تعمل إيه وتتميز فيه، وحاول إنك تشتغل فيه، وإن شاء الله تنجح.

أما موضوع ارتباطك فهييجي بالتدريج، لما تحاول تدي نفسك فرصة تانية للارتباط والاختيار من بين اللي هتقابلهم، بس الأهم أنك تتأنّى في اختيارك ده.

وفي النهاية، أرجو إني أكون قدرت أساعدك في مشكلتك، وقدرت أوصّل لك وجهة نظري.

لو عايز تفضفض لنا دوس هنا