د. محمد أبو الغيط: لعبة كمال الأجسام في حاجه للمياه والبروتين!

السلام عليكم ورحمة الله وبركاته أنا شاب عمري 19 عاما أمارس رياضة كمال الأجسام من سنة تقريباً، أنا كنت مليان جداً ولكن الحمد لله خسِّيت كتير جداً جداً بس مشكلتي إن عندي دهون على العضل وبتخلي شكلي ضخم جداً ودكتور التغذية قال لي على نظام غذائي مش باقدر أعمله مع التمرين لأن التمرين بيحتاج أكل كتير وماقدرش أسيب التمرين، أنا نفسي في نظام غذائي يخسس وفي نفس الوقت يكون مُغذي علشان التمرين لأني جربت أتمرن مع النظام الغذائي حصل لي هبوط، ياريت تساعدوني وتقولوا لي أعمل إيه.. وشكراً
صديق "بص وطل" العزيز... لعبة كمال الأجسام تحتاج إلى بروتين كثير ولكن ليس دهونا أو حلويات، فمن الممكن أن تأكل بروتين كثير مع السلطة والخضار وقبل التمرين تأخذ 1/2 رغيف عيش أو 4 ملاعق أرز حتى يكون عندك الطاقة اللازمة للحرق في التمرين، والإكثار من شرب المياه ضروري علشان الكلى مع كثرة أكل البروتين.

إزيكم يا "بص وطل"، ميرسي جداً على القسم الجامد ده وكان عندي سؤال لدكتور محمد... يا دكتور أنا عندي هرمون الgh نسبته عالية إزاي أنزِّله، أنا باخد "جلوكوفاج" وممنوعة من أكل العيش والأرز والسكريات، فقط لحوم وخضار بس ممنوعة من كل النشويات ساعدني يا دكتور أرجوك؟
الصديقة العزيزة... هرمون ال GH ليس له علاقة بالأكل ولكن ننصح باستشارة طبيب الغدد الخاص بك حتى يتسنى لنا فهم الموضوع كاملاً والرد عليك.

الدكتور العزيز محمد أبو الغيط.. حضرتك اتكلمت على الكميات اللي هنشتريها من الأكل بس أنا كنت عايزة أعرف الكمية اللي المفروض ناكلها من الكحك والحلويات هتبقى بمقدار أد إيه في اليوم؟ وهل ينفع مثلاً إننا نشيل وجبة ونحط مكانها حلويات كنوع من التوازن في السعرات؟ يعني أعتقد إن ده أفضل من إننا ناكل 3 وجبات وكمان معاهم حلويات؟ رأي حضرتك إيه؟
صديقتنا العزيزة.. الحلويات والكحك من الأشياء التي سعراتها الحرارية عالية جداً جداً وسوف تضر ضرراً بالغاً بالنظام الغذائي ولا ينفع أن نستبدلها بوجبة لكن من الجائز أن تكون في الوجبة الحرة مرة أو مرتين فقط.

برجاء إنكم تساعدوني، ماما عمرها حوالي 54 سنة ووزنها 100 كيلو أو يزيد قليلا، عندها خشونة وتآكل في مفاصل الركبة وتعبانة قوي، بالإضافة إلى أنها مريضة وعندها "السكر" أرجو إعطائي الحل المثالي علشان تخس ولو فيه حل للخشونة بدون عملية يبقى كتر خيركم، تحياتي.
الصديقة العزيزة...الحل المثالي للتخسيس هو أن تتبع نظام غذائي كامل متكامل العناصر الغذائية وأن تستمر عليه وأن يكون تحت إشراف استشاري تغذية حتى يكون مستوفيا الشروط الصحية، وبالنسبة لموضوع الخشونة يرجى الاتصال بدكتور لعلاج العظام.