اتكلم

لميس الحديدى:مساء الخير ، حلقة النهاردة عن الاغذية الفاسدة وماذا ياكل المصريون ونوع الاكل اللى احنا بناكله اى الاكل بيجبلنا تسمم ومشاكل كتيرة قوى الحقيقة قبل ما نبتدى الحلقة لازم نتقدم بكثير من التعازى والحزن لاسرة القتيلة مروة الشربينى الفتاة المصرية التى قتلت غدرا وبايدى عنصريا المانيه فى المانيا طبعا هذه القضية هى القضية الشاغلة لكل الراى العام المصرى خلال الايام القليلة الماضية كيف قتلت ؟ الحكاية طبعا ببساطة شديدة جدا ان اكيد سمعتوها وقرتوها فى كل وسائل الاعلام ان هذه سيدة مبعوثة للدراسة هى وزوجها فى المانيا زى مبعوثين كثيرين هى فتاه محجبة وام لطفل عنده 3 سنين وحامل كانت فى طفل اخر او فى جنين اخر كانوا رفعوا قضية على احد الالمان الذين تهجموا عليها منذ سنة واتهموها باشياء كثيرة يعنى انها مسلمة ومحجبة وكلام من هذا القبيل واشياء يعنى صفات سلبية اخرى رفعت قضية زى اى انسان مسلم ايجابى محترم رفعت قضية لكن وغرم الحقيقة المتهم بحوالى 2800 يورو لكن لما كانوا فى جلسة المحكمة طعنها هذا الشخص الالمانى من اصل روسى ب18 طعنه وقتلت مروى فى نفس اللحظة ودخل عسكرى او جندى او ضابط شرطة المانى تخيل طبعا ان الراجل المسلم هو الراجل المتهجم وهو الراجل الارهابى وهما دول الناس الارهابيين فضرب جوزها هو كمان بطلق نارى وجوزها الحقيقة فى حالة خطيره جدا فى احدى مستشفيات ديربن بالمانيا بعد الاذان هنستمع لشهادات مجموعه من الناس هنشوف صور الجنازة وصور تشييع الجثمان النهاردة من الاسكندرية والحقيقة كانت جنازة حافلة وحزينة لان مروة مش مجرد فناه مصرية ولكنها تعبر عن كل انسان مصرى مسلم بيدفع دمه تمن للارهاب وتمن للعنصرية الارهاب بقى مش من ناحيتنا احنا مش احنا ولاد واخوات بن لادن ولكن الارهاب من الجانب الاخر خلينا نكون ايجابيين ونشوف ماذا سيحدث ؟ فى هذا البرنامج سنحاول ان نتتبع ونستمع الى اراء كيف سنكون ايجابيين ؟ ازاى هنبعت رسائل للسفارة الالمانية ندين الحادث ؟ ازاى هنبعت رسائل للحكومة الالمانيه ندين الحادث ازاى سنطالب برفع قضية ؟واعتقد ان سياد السفير هيكون معانا بعد اذان المغرب هيقولنا على هذه القضية هل جنائية و مدنية ؟ لابد ان نطالب فيها مش فكرة الثار ولكن فكرة القصاص العادل حق مروه حق طفل مروه لازم يكون فيه تعويض بشكل معين ولازم فى هذه القضية يدان فيها الجانى مش بس لانوا المانى ومن اصل روسى وابيضانى واحنا المسلمين بقى المحجبين والسمر ينلنا هذا الامر دا هيكون الجزء الاول من الحلقة الجزء التانى هنتكلم فيه عن اغذية المصريين ماذا ياكل المصريون ؟ الحقيقة بناكل حاجات صعبة جدا نخرج لاذان المغرب حان الان توقيت اذان المغرب ونرجع تانى
فاصل
لميس الحديدى: اهلا بكم من جديد بعد اذان المغرب والحقية قبل بس ما نرحب بضيوفنا خلونا ناخد اتصال فى قضية القتيلة مروة الشربينى الاستاذ عادل حموده رئيس تحرير جريدة الفجر مساء الخير يا فندم
عادل حمودة: اهلا بحضرتك مساء الخير
لميس الحديدى: يعنى انا عارفة ان انتم عندكم مبادرة ايجابية اكتر شوية من مجرد التنديد بقصة مقتل مروى فياريت تطلعنا على هذه المبادرة يا ريت المخرج بس يبتدى يذيعلنا صور الجنازة اتفضل يا استاذ عادل
عادل حموده : هو الحقيقة فيه حاجتين الحاجة الاولانيه هى ماساة الطفل الوحيد مصطفى ومصطفى عمره 3 سنين ونصف وكان من سوء حظه انوا كان مع امه فى المحكمة وشاهد عمليه الطعن الطعن كان بالسكاكين الحادة جدا وتناثر الدم بتاع امه على جسمه ثم سقطت الام على الطفل نفسه
لميس الحديدى: يا ساتر
عادل حمودة: وانا اعتقد انوا الان فى حالة نفسية حرجة جدا وصعبة جدا والحقيقة قررنا ان احنا نلجا للدكتور احمد عكاشة ليتبنى مثل هذا الامر سواء كان مباشرتا عن طريق تخصصه او بواسطة ناس متخصصة فى طب الاطفال
لميس الحديدى: اعتقد الطفل فى المانيا انا كنت قريت فى الجرايد ان الشلطات الالمانيه ترفض تسليمه لى خاله اعتقد ولا هو رجع ؟
عادل حموده:لا الحقيقة انا معلوماتى الان من خاله استاذ طارق انوا هيرجع بعد ايام وانوا هما بس طبيب المانى نصح انوا ما يرجعش مصر فى الاسكندرية الا بعد ان تنتهى مراسم الدفن والعزاء حتى لا يتوتر اكتر مما هو فيه وهيرجع هو مع عمته يمكن فى اول الاسبوع اللى جاى
لميس الحديدى: دا الجزء الاولانى الشق الثانى بقى ؟
عادل حمودة: الحاجة التانيه الحقيقة ان مجموعه ممن يمكن ان نطلق عليهم رموز المجتمع المصرى او الرموز المهنيه والسياسية والصحفية والاعلامية فى مصر وجدت ان الشرطة الالمانيه زى ما تفضلتى مش بس اكتفت باطلاق النار على الزوج وانما الاسوء من ذلك انها دخلت على بيت القتيلة وزوجها اللى بيعانى من غيبوبة وبدات تفتش بطريقة همجية جدا بحثا عن ادلة تثبت انها ارهابيه يعنى فيه اصرار وفيه عند غريب جدا على ان احنا نطلع ارهابيين فالحقيقة احنا كتبنا خطاب مفتوح لسفير المانيا الاتحاديه فى مصر وحددنا فيه الجريمة البشعة التى ارتكبت وطلبنا بشكل واضح جدا ان يجرى اعتذار رسمى لعائلة الضحية من الحكومة الالمانيه وللمصريين وللمسلمين وانوا تتعهد علنا بدفع تعويضات مناسبة زى ما فعلت بل اكتر من ذلك فعلت ايضا فى جريمة اقل مع الجالية التركيه فى االمانيا كانت الجريمة ابسط يعنى مجرد تحرش عابر بحجاب سيدة مسلمة تركيه ادت الى غضب من الجاليه التركيه انته الى دفع تعويض واعتذار كبير واحنا بنضيف لذلك
انوا يجب ان تتحمل الحكومة الالمانيه مصاريف علاج الطفل وتعليمه حتى يتخرج من الجامعة انا بعتقد ان هذا الامر بجانب ما هتتفضلى حضرتك مع ضيوفك فى مناقشته قانونا ان هذا يحمى فى الحقيقة مش بس حقوق مروى انما نحمى حقوق المسلمين لانوا لو رجعتى الى وزير الاوقاف هيقولك ان فيه مسجدين واحد فى ليون اغلق يعنى التطرف اغلقه ولو دخلتى حضرتك على كثير من المواقع الانترنت الخاصة بالفاشية الجديدة فى المانيا هتجدى ان فيه تخريب لمقابر المسلمين مع عزائنا الشديد لمروى او لعائلاتها فهى اكتر بكتير انا فعلا بنضم لحضرتك بان يطالب الناس سواء عن طريق الانترنت او الاميل او التلغراف او التليفون ان يكون هناك لوبى ضد الحكومة الالمانية لسبب بسيط ان هذا يحمى ملايين من العائلات المسلمة ليست فى المانيا فقط ولكن فى اوروبا كلها
لميس الحديدى: استاذ عادل حموده انت تتطالب الناس كلنا انا بضم صوتى لصوتك ولصوت كل البرامج والمؤسسات الاعلامية ان الناس تبعت رسالة باى طريقة ما للسفارة الالمانيه ولا لفين ؟
عادل حمودة: تبعتوا للسفارة الالمانية لانوا السفير الالمانى غصبا عنه هيلجا لحكومته لها بكل هذا الامور وانتى و كل الناس تعلم ان الحكومة الالمانيه ما بتحبش العرب كده على بلاطة وان موقف الخارجية المصرية لم يكن على الموقف الكامل اكتفى السفير المصرى فى برلين بانه ارسل الملحق الثقافى وكانها قضية خاصة بمنحة انا احب اضيف برده علشان نعطى للناس حقها انوا فيه عدد اسمحيلى اقول عدد من اسماء الموقعين على الرسالة
لميس الحديدى: اتفضل
عادل حمودة: الحقيقة منهم الدكتور حجازى والدكتور عبد الحليم غزالى والدكتور ممدوح حمزة والدكتور ابراهيم ابو العلا ماضى علاء عبد المنعم عبد المنعم عمارة حسام مصطفى خليل المستشار احمد مكى الدكتور احمد عكاشة والدكتور حسام عبد الصمد رئيس اتحاد الجاليه المصرية فى اوروبا وفاروق جويدة وشاهين ديمترى والسفير ابراهيم يسرى والدكتور هشام صادق والمخرج خالد يوسف والدكتور خيرى عبد الهادى مصباح وماجد حنا المحامى ولميس الحديدى الصحفية
لميس الحديدى: اشكرك استاذ عادل خليك معايا فيه ارجوك خليك معايا لا تقطع الاتصال انا معايا على الخط التانى سياد السفير رمزى عز الدين سفير مصر فى المانيا مساء الخير سياد السفير
رمزى عز الدين: مساء الخير يا فندم
لميس الحديدى: يعنى خلينى بس اسئلك استاذ عادل حموده دلوقتى كان بيقول ان الحقيقة موقف الخارجية المصريه ما كنش بالقدر الكافى ان حضرتك بس ارسلت الملحق الثقافى لمتعابعة الحادث هل هذا صحيح ؟
رمزى عز الدين:لا هذا غير صحيح طبعا هو الملحق الثقافى فى كل الاحوال يا لميس هانم جزء من السفارة الملحق الثقافى راح ومعاه القنصل فى اول وهلة ثم انا انتقلت بعد ذلك فالسفارة من اول يوم ومن اول دقيقة موجوده على الارض فى ديربن
لميس الحديدى: طب حضرتك ما رحتش من الاول ليه يا فندم ؟
رمزى عز الدين: لان ما كنش فيه حاجة ممكن اعملها فى هذا التوقيت انا كنت على اتصال بالحكومة الفيدراليه وزارة الداخليه وزارة الخارجية ومع حكومة
لميس الحديدى:استاذ عادل ارجوك خليك معايا وانت بتستمع لحوارى مع سياد السفير الوضع دلوقتى ايه انا عارفة ان حضرتك كنت عامل مؤتمر صحفى او حاجة كده من هذا القبيل ما هو الوضع الان ؟ ما هو وضع الطفل ؟ ما هو وضع الزوج ؟ وماذا ستفعل الخارجية المصرية ؟
رمزى عز الدين:بالنسبة للزوج انا زرته اكتر من مرة اخر مرة مفغيش من ساعة ونص وهو فى تحسن يعنى من الناحية العضوية فيه تحسن طبعا الله يكون فى عونه بالنسبة للظروف اللى هو فيها الطفل مع عمته هى متواجده هنا وبتراعاه ويعنى برده فى حالة نفسيه ارجوا انها تكون فى تقدم برده الوضع مش سهل دا بالنسبه لزوج المرحومة فدا من الناحيه دى اعتقد ان الامور بتسير فى شكل ايجابى
لميس الحديدى: انتم هتعملوا ايه؟ هترفعوا قضية كيف سنضمن مبدئيا حقوق هذه الاسرة قبل ان نتحدث على فكرة العداء للمسلمين لو كانت هذه ظاهرة ؟
رمزى عز الدين :طبعا بالنسبة للحقوق دى اول شىء تحركنا فيه وانا النهارده كنت فى ولايه وزى ما قلت لحضرتك قابلت رئيس الوزرا ووزير العدل وشرحتلهم انى احنا هنتحرك ازاى؟ سواء فى القضية الجنائية او القضية المدنية ابلغنى طبعا رئيس الوزرا ان هما طبعا متفهمين وهيتحركوا بسرعة معانا وهيحاولوا ان هما اولا ان التحقيقات تنتهى فى اقرب فرصة ثم القضية نبدا فيها الجنائية اما بالنسبة للشق المدنى فا بلغنى ان هناك قوانين بالفعل موجوده وان هما هيسرعوا فى تنفيذ اقصى ما يمكن طبقا لهذه القوانين بالنسبة للتعويض للطفل وللزوج ونح هننتظر وهنشوف هما هيقدمولنا ايه وبعد كده لو لم يكن على المستوى الذى نتطلع اليه ففى اجراءات تانيه طبعا
لميس الحديدى: طيب استاذ عادل حضرتك سامع سياد السفير تحب تعلق ؟
عادل حمودة: انا سامعه طبعا وبرده انا بضم صوتى لصوتك انه جرى تحرك متاخر جدا لانوا هذه القضية تستحق ان ينتقل السفير فورا و لايدعى انوا مش هيعمل حاجة هناك لانوا عندما يقتل مواطن بهذه الجريمة البشعة وانا لا اتصور انوا تحرك الا بعد ان حدث ضغط من الاعلام داخل مصر وحصل اتصال بالحكومة المصرية وحصل طلب من النائب العام يعنى الحقية انا بعتقد ان سعادة السفير تحرك بناءا على ضغوط وليس بمبادرة شخصية منه مكتفيا ان الزوج بيعمل رسالة دكتوراه فكفاية عليه الملحق الثقافى
لميس الحديدى: سياد السفير تحب ترد
رمزى عز الدين: الحقيقة يا عادل بيه انا اختلف مع حضرتك فى هذا لانى انا تحركت بمبادرة منى لم يكن هناك اى ضغط وبالعكس السفارة بتبدا من السفير الى اصغر واحد والكل له دور والسفير له دور فى توقيتات معينة والملحق الثقافى والقنصل فى المرحلة الاولى فى البدء والاعداد حتى يمكن للسفير ان يتواجد ويكون فعال لو السفير تحرك فى المرحلة الاولى خالص وهو ما كنش ممكن يعمل شىء انا رحت فى التوقيت المظبوط واعتقد نتيجة الاتصال مع السلطات كل الامور اتحركت وكان لابد من تحريك الامور بالشكل انا اللى موجوده على على الارض يا عادل بيه واعتقد انوا لما يكون السيد رئيس الجمهورية بيعين سفير فى دولة فهو يثق فى قدرته على تقييم الامور والتحرك بالشكل الفعال واعتقد ان ذلك تم بالشكل وانا راضى جدا على اللى حصل
لميس الحديدى: طيب استاذ عادل حموده اشكرك على هذه المداخله سياد السفير خليك معايا ثانية واحده استاذ عادل اشكرك واحنا بننضم كلنا كا يعنى بنسميها نخبه بنسميها صحفيين بنسميها مواطنين عاديين اطلب من كل مواطن مصرى ان يبعث برسالة هنحاول ان يكون عندنا جملة بسيطة جدا نحاول نبعتها للسفارة فى تلغراف عادى اعتبره زى تلغراف التعزية زى تلغراف التهانى نريد ان نرسل رسالة وراى واضح جدا بالانترنت بالمنتديات للحكومة الالمانية او للسفارة الالمانيه ويعنى لن نقبل ان كده عادى تمتهن كرامتنا كمصريين بهذا الشكل اشكرك استاذ عادل حموده سياد السفير يعنى انت فيه بداية مهامتك لى برلين بعنى هل حاسس ان دى بداية موجه كالذى شهدتها الدنمارك مثلا فى اوقات الرسوم المسيئة للرسول (ص) هل دى موجه كراهية جديدة ضد المسلمين فى المانيا ؟
رمزى عز الدين: يا لميس هان طبعا حضرتك عارفة المجتمع الالمانى مجتمع متعدد الجنسيات والثقافات والديانات الاغلبيه هما من الشعب الالمانى شعب متفتح على الاخر ولكن بالاشك هناك تيار ولكن تيار ليس بكبير موجود فى هذا المجتمع يرفض الاخر ويرفض الاجنبى ودا بيسبب ازعاج شديد للحكومة وللغالبية العظمى من الشعب الالمانى ودا واضح تماما فى كل الاتصالات التى تلقتها ومن موقف الحكومة فى هذا الشان وهما عايزين يتحركوا يتحركوا بسرعة لان ذلك يعكس الوجه السىء لجزء صغير من المجتمع الالمانى وهم مدرجين ذلك تماما ولبن يقبلوه ولن نتركهم يقبلون
لميس الحديدى: مين المحامى اللى هيرفع الدعوى من طرفكم من طرف السفارة يعنى ؟
رمزى عز الدين: بالفعل هناك محامى لكن المحامى فى المرحلة دى هو محامى يتابع التحقيقات ويحصل على كافة المستندات المرحلة التانيه اللى هى المرحلة الادق فنحن طبعا سوف نختار احسن محامى يمكن ونحن فى اتصالات دلوقتى مع عدد من المكاتب حتى نختار افضل محامى يمكن ان يمثل مصالح العائلة
لميس الحديدى: سياد السفير رمزى عز الدين اشكرك وانا على ثقة ان ان شاء الله هتقوم بمتابعة هذه القضية بنفسك وانا عارفة ومتاكده ان حضرتك هتواصل هذه القضية ولن ينتهى بها الامر الى الادراج وان الاسرة دى هيجلها تعويض الاسرة دى هيرد برغم ان الدم لا يعود مرة اخرى والارواح مبترجعش تمنها مش فلوس لكن لابد من رد شرف ليس فقد لاسرة مروه ولكن لنا جميعا كمسلمين قبل بس ما اختم معاك هل الطفل فى مشكلة فى عودته الى مصر ولا عادى ؟
رمزى عز الدين: اطلاقا اطلاقا ماهى دى من ضمن الحاجات برده اللى الاستاذ عادل حموده يحب يعرف انوا هنا فيه اجراءات وفيه قوانين معينة بالنسبة للطفل الطفل ولى الامر الوالد والوالد لم يكن فى وضع يسمحله ان هو يحتضنه فعملنا ترتيبات ولم تكن سهلة انوا اول ما عمة الطفل توصل انها تستلمه ودا لم يكن بالسهل ولكن تم وهو دلوقتى فى كنفها وممكن ان يغادر اوراقه جاهزة ممكن يسافر فى اى وقت ولكن تبقى راى العائلة على حسب علمى انوا الوالد الدكتور عكاظ ووالدته او اخوه افتكر هيغادروا غدا وبعدين ياخدوا القرار بالنسبة للطفل ممكن اعتقد ان ممكن يعودوا به الى مصر اول ما يطمنوا على ابنهم
لميس الحديدى: هل الدكتور علوى يعنى عاد للوعى ولا ؟
رمزى عز الدين: عاد للوعى انا شفته السبت وكان بدا العودة للوعى والنهاردة تانى شفته مرة تانيه وهو طيبعا احسن بكتير جدا والوعى زاد لكن لسه مازال يعنى امامه بعض الايام
لميس الحديدى: اشكرك سياد السفير رمزى عز الدين سفيرنا فى المانيا نخرج فاصل اعلانى ونرجع تانى ونعود لقضية ماذا ياكل المصريون ؟ احنا بناكل ايه وبكام ؟ بعد الفاصل
فاصل
لميس الحديدى: اهلا بكم من جديد بناكل ايه ؟ احنا داخلين على الصيف وحالات التسممم سمعناها يعنى طول النهار لسه واحدة صاحبتى متسممة من شوربة راحت شربت شوربة فى مطعم محترم يعنى فى المهندسين جالها حالة تسمم الاسطف بتاعى برده كان بيصور حاجة ما جالنا كلنا يعنى تسمم موضوع التسمم دا بقى عادى جدا لكن غير التسمم نلاقى بقى بنفتح الجرايد يقولك مش عارف ايه اللانشون مخلوط بالخنزير ماهو قتلوا الخنازير او دبحوها يعملوا ايه بالحم الخنزير ؟ لازم هناخدها ونهرسها كده ونحطها قفلوا بقى مجازر وفيه مطاعم بتتقفل وبنسمع عن مطاعم فاست فوود بتتقفل اللى بيحصل ؟ لماذا نعيش فى حالة او مشهد من الاغذية الفاسدة الدراسات بتقول ان 80 % من غذاء المصريين عشوائى احنا بناكل اكل عشوائى 75% من المعامل الحكومية غير صالحة وحملات الطب البيطرى شكليه يعنى دا دراسات متعمدة بتقول الكلام ده اول ما يحصل عملية مداهمة لمطعم صغير بنسمع كتير بقى عن لحم الحمير والكلاب والحاجات دى كلها انا متاكده ان فى كل بيت فى حالة تسمم وبعدين داخلين على الصيف فياترى ماذا سناكل ؟ طبعا اى حد فينا لديه المقدرة شوية ان هو يسافر يلاقى ان كل طعم الاكل هناك ملوش اى علاقة بطعم الاكل هنا شكل الاكل فى الخارج اى دولة جانبينا انا مش بتكلم عن اوروبا بتكلم على اى دولة زميلة يعنى شقيقة جنبنا طعم الاكل وشكله سواء مزروع او مصنوع او مستورد مختلف تماما عما نعانى منه نحن فى مصر بكام بقى دى قصة تانيه احنا بندفع اعلى سعر غذاء فى العالم وانا بقولك ده وانا بسافر الحقيقة كتير ويشرفنى ان يكون معى فى هذه الحلقة سياد اللوا الدكتور محمد ابو شادى رئيس قطاع التجارة الداخليه بوزارة التجارة والصناعة والاستاذة سعاد الديب رئيس الجمعية الاعلاميه لحماية المستهلك سياد اللوا ليه الاكل بايظ ؟
محمد ابو شادى : لا منقدرش نقول كل اكلنا بايظ والا كنا كلنا موتنا او كلنا مرضنا لقدر الله
لميس الحديدى: بس بنعيا كتير
محمد ابو شادى : ما انا هقول لحضرتك انا شايف انى فيه تهويل
لميس الحديدى: تهويل محصلش طب حالة تسمم فى بيتكم او ..
محمد ابو شادى: لا ما انا هقول لسيادتك اولا احنا اكتر سلامة من بلاد تانيه غيرنا كتير احنا عندنا صناعات غذائية بتصدر لدول اخرى بس ليه نسىء بقى الى انتاجنا ؟ انا معرفش ليه نسىء برده الى واقعنا انا مش عارف يعنى احنا مثلا تم دبح الخنازير فعلا احنا طبعا كدولة وكحكومة طبعا لابد ان نترقب الاسواق خشية تسربها اولا دبح الخنازير فى مصر هنلاقى فى داخل كل المجازر عنبر لدبح الخنازير فيه مصانع عندنا على فكرة مرخص لهم بتصنيع لحوم الخنازير ولذلك كان الترقب اكتر
لميس الحديدى: عل فكرة احنا ما بنجبش الكلام من عندنا
محمد ابو شادى: على فكرة بالمناسبة الحالة اللى ضبطت كانت نتيجة لحوم خنزير مصنعة من مصنع بينتج اللانشون بلحم الخنزير والفكرة انوا فسد نتيجة سوء العرض يعنى لحوم خنزير فاسدة انا مع سعادتك احنا عندنا فعلا نظام البقال رالقديم موجود فى الريف المصرى عندنا درجة حرارة فى الصيف رهيبه زى ما سيادتك بتقولى فيه تناول سىء للسلع احنا دخلنا فى دراسة قبل كده بتقول ان 50 % مفقودة من الخضار والفاكهة بسبب اسلوب التدوال فى مصر يعنى احنا عامين دراسة من سنة 90 مع مركز البحوث الزراعية اكتشفنا ان 50 % من حجم انتاجنا من الخضار والفاكهة فى مرحلة ما بعد القطف اللى هى التداول 50 % ومرحلة 30 % فاقد فى مرحلة الزارعة التدوال واساليب التداول عندنا
لميس الحديدى: اه بس انا حضرتك عندى ارقام تم التحفظ على 33 طن غذاء فاسد فى الاسبوع 20 طن ادوية مغشوشة
محمد ابو شادى احنا بنؤكد ان السوق تحت السيطرة القوية من اكتر من جهاز يعنى حتى المنتجين لو كان حضر طارق بيه كان هيشتكيلك كاتحاد صناعات من تعدد الاجهزة وانما بعتبر التعدد ده ضمان على فكرة
لميس الحديدى: اه انا عندى مشكلة فى موضوع التعدد ده بس هرجعل لحضرتك دلوقتى استاذة سعاد يعنى كيف نحمى المستهلك من كل هذا الكم الفاسد من الاغذية قبل بس ما نتبتدى انا عارفة ان فيه تليفونات كتيرة جدا جايه فى قضية القتيلة مروة يا ريت ناجلها بس لاخر الحلقة وبعدين نبقى ناخدها اتفضلى يا فندم
سعاد الديب:انا مع حضرتك ان عندنا مشاكل كتيرة جدا فى موضوع الغذاء لان الغذاء عندنا بيمثل حوالى 80 % من ميزانية الاسرة المصرية وبالتالى دا شق مهمة بالنسبة للى حضرتك سالتى عليه ان هو احنا بناكل ايه ؟ او مطلوب ان احنا ناكل ايه ؟ وخصوصا مع المبالغة الشديدة زى ما قال سياد اللوا فى موضوع لو حتى ضبطوا من السلع الفاسدة فبيبقى فيه نوع من المبالغة الشديدة فيه عرض الموضوع احنا لو اقول لحضرتك مشاكل الغذاء نبدا من زراعته لغاية ما نوصل للمستهلك
لميس الحديدى: ما هو من زراعته فيه مبيدات والحقيقة يعنى الاكل ما بقاش لا الطماطم بتشوفيها زى ما هى و لاالخيار زى ما هوا ولا الفاكهة زى ما هى
سعاد الديب: ما انا لسه بقول لحصرتك على ان الغذاء بيبدا من الاول من زراعته لغاية النواحى المتعددة لغاية ما بيوصل للمستهلك المراحل دى احنا جاتلنا فترة من الفترات كان فيه شبه جهل شديد جدا جدا مبقاش فيه اى نوع من الرقابة القوية على موضوع الزراعة وبقى فيه مبالغة فى موضوع المبيدات موضوع الهرمونات فكانت النتيجة ان بقى فيه اصابات كتيرة من البشر يمكن احنا منساش الفترة اللى كنا شوفنا فيها الخيار مثلا اللى حصلت عمليات تسمم كتيرة جدا لا انا هقول لحضرتك حاجة الزراعة لما بيحطوا عليها اى نوع من الكيماوى او او المبيدات او الحاجات اللى هى بتقتل الفطريات بتاعة الارض المفروض ان هو بيجنيها وةما تنزلش السوق قبل 15 او 21 يوم متنزلش للمستهلك بعد كده لكن هما بيستعجلوا الزراع وبيجمعوا وبينزلوه السوق مره واحدة بتكون اصلا المكونات دى موجوده على الثمرة مع مع عدم اهتمامنا احنا بالغسيل الجيد وعدم اهتمامنا ان نسيبها فترة قبل ما نستخدمها بتكون النتيجة حالات التسمم اللى احنا بنشوفها يعنى احنا النهاردة بيفكروا فعلا فيه جهاز لسلامة الغذاء لان عملية التتبع دى مهمة جدا مش المرحلة الاخيرة هى اللى بتسبب المشكلة فيه موضوع االتدوال زى ما قال سياد اللوا لما سلعة بتتطلع من مصنع حتى وبتيجى هى توصل مثلا للمحل علشان تتباع فيه عمليه النقل ممكن تتحط فى بيئة مش مناسبة خالص للسلعة دى على ما بتوصل للمكان ده بتكون فسدت برده التلاجات الى عندنا فى المحلات بنفس الطريقة
لميس الحديدى: احنا بقى كجهاز حماية المستهلك بنعمل ايه ؟ او كجمعيات حماية المستهلك بنعمل ايه للمستهلك؟ بتوعوا الناس ازاى بتقوللهم تعملوا ايه وما تعملوش ايه ؟ ما هو وصلنا لمرحلة لما بتشوفى البطاطس مش عارفة تحتها لون اخضر و لون ايه ما تكلهاش دا بقى صعب اوى يا استاذ سعاد
سعاد الديب: ماهى دى ادوار برده يعنى انا النهاردة كمسئولة عن جمعية الجمعية دى دورها انى انا بوعى مش بوعى المستهلك بس انا بوعى التاجر وبوعى المنتج وبوعى المستورد اللى بيروحوا يجبولنا سلع 60 % من حاجتنا بنجيبها من الخارج
لميس الحديدى: انا بحس ان الحكومة اخر دور او اخر الخط خالص لكن فى النهاية الحكومة مسئولة عن الرقابة عن مباشرة كل هذه الادوار هى ابتدت الناس كلها تلعب فى الموضوع التاجر يلعب والمستورد يلعب وفى النهاية انا بحس ان فيه حالة من العشوائية فى السوق والحكومة واقفة بتتفرج وبتقولك انا الرقيب مين المسئول عن رقابة الاكل فى مصر ؟
محمد ابو شادى : اولا احنا اى سلعة بتتداول فى السوق احنا مسئولين عن متابعتها من اول تصنيعها يعنى القوانين بتاعتنا الاجرائية منحت مامور الضبط القضائى مفتش التموين انوا يدخل المصانع والمخازن والمحال دخول المصنع الهدف منه ايه ؟ انوا يتاكد ان المصنع ده مرخص ماهواش عشوائى ماهواش بير سليم
لميس الحديدى: دا فيه نسبة كبير جدا تصنيع الغذاء فى مصر فى بير السلم
محمد ابو شادى: ماهو دا جزء من العشوائية موجوده فى حياتنا الحقيقة
لميس الحديدى: طب عملنا ايه قفلنا الحاجات دى ؟
محمد ابو شادى: ما انا هقول لسيادتك وزارة التجارة والصناعة الحقيقة عاملة لجان لجنة الكلية الكلية اللجنة المعنية بحماية المستهلك اللى بشرف بعضويتها والاستاذ سعاد بتشرف بعضويتها عاملة لجنة الحقيقة بتنتقل للصناعات العشوائية بتساعد اصحاب هذه المصانع على كيف يدخل الى اطار الموضوع ؟ ازاى نرخصله ؟ ازاى نرتقى باساليب الانتاج بتاعته؟ ازاى نسهله العملية؟ دا موجود الحقيقة ودخلوا اكتر من 25 مصنع فيه بعض المناطق الصناعية واحنا الحقيقة بنتابعهم وبياخدوا كل الاجهزة المسئولة معاهم يعنى انا عايز اقول ان متابعة اى سلعة تطرح فى السوق بتبدا سواءا كانت محلية من المصنع بنشوف المدخلات بنعلم انها معلومة المصدر او مجهولة المصدر انها فى تاريخ الصلاحية ولا لا ؟ بنشوف العملية الانتاجية بنتاكد من سلامة القائمين على العملية الانتاجية من الامراض المعدية وان يكون معاهم شهادات تفيد هذا وانها ساريه بنتاكد من سلامة المنتج النهائى ومطابقته للمواصفات بنتابعه فى مراحل تداوله
لميس الحديدى: اه بس يا فندم واضح ان ده مش كفاية لان مثلا انا عندى تصريح من الاستاذ حسين منصور رئيس جهاز سلامة الغذاء والجهاز ده جهاز حكومى ولا جهاز؟
محمد ابو شادى: دا جهاز ناشىء
لميس الحديدى: اه اللى هو تحت الانشاء يعنى استاذ حسين بيقول فى تصريحات كثيرة واحنا هنحاول نجيبه على التليفون ان انى انا ما بكلش اللانشون ما بكلش الحاجات المصنعه وخلى بالك من الجبنة الرومى لما رئيس هذا الجهاز المزمع انشائه يعنى يقول الكلام ده انا هحس كمواطن بى ايه ؟ لا هشترى جبنة رومى ولا هشترى لانشون ولا هوت دوج ولا هشترى اى حاجة من الحاجات دى انا خايف اذا كان رئيس الجهاز شايف الموضوع كده يبقى انا اشوف ايه ؟
محمد ابو شادى: هذا الاستاذ بيقول ان 80 % من الصناعات الغذائية فى مصر عشوائية وانا الحقيقة انت عارفة سيادتك الارقام فى مصر انا لا اعلم مرجعيته فين يعنى ؟ على فكرة انا بشتغل فى رقابة السوق من 32 سنة مفيش كلام من اللى هما بيقولوه قد تكون منافسة ما بين الصناعات الحديثة والاستثمارية ومابين الصناعات الغير منظمة هقولهلك بصراحة دى لا تبقى الا صور للمنافسة كلنا شربنا من بياع اللبن اللى كان بيجلنا البيت زمان
لميس الحديدى: ما كنش بيعينا
محمد ابو شادى : انا بشترى اللبن ستيب لغاية دلوقتى بس معروف ليا
سعاد الديب : انا عايز اقول لحضرتك حاجة
لميس الحديدى: انا حاسة انى انا جاية من بلد تانية يا اما انا من بلد مختلفة يا اما انتوا من بلد مختلفة
سعاد الديب: لا بصى يا استاذة لميس احنا عندنا على فكرة حتة المبالغة بطريقة فظيعة جدا
لميس الحديدى: انا بقول لحضرتك انا 3 معدين و2 مصورين وقعوا منى امبارح يعنى اعمل ايه ؟ 5 وقعوا منى امبارح
سعاد الديب: احنا عايزين نقول لحضرتك ايه ؟ انى فعلا فيه مشاكل موجوده محدش يقدر ينكرها على قد ما بنقدر احنا بنحاول لكن مفيش حد يقدر يحقق الحماية الكاملة لانوا الخلل ماهواش فى حتة واحدة
لميس الحديدى: المجازر يا فندم حضرتك بتزور المجازر بدرورك كرقيب بتروح تزور المجازر ؟
محمد ابو شادى : بروح مع الطب البيطرى
لميس الحديدى: الحقيقة انا مش هتكلم على الطب البيطرى عندهم حساسية فظيعة جدا لما بتخش المجزر بتحس ايه ؟ اكيد بتحس احساس يعنى المجزر ده نضيف و
محمد ابو شادى :احنا طورنا المجازر على فكرة بعد مجزر السيده انا اشتغلت قبل كده رحنا بعد كده مجزر البساتين ارقى بكتير وهايل زى قبل كده زى ما كان عندنا زمان سوق روض الفرج النهارده عندنا سوق العبور وعلى فكرة احنا برده باستخدامنا ممكن نحوله الى عشوائى للاسف
لميس الحديدى: اه طبعا ما فى مشاكل فى السلوكيات فظيعة يعنى بس كل هذه القصص اللى بتحكى ان فيه مجازر بتاخد احشاء الحيوانات اللى هو المفروض ان يتخلص منها يضيف اليها لون دا التصنيع اللى هو تحت بيرالسلم
سعاد الديب:كلمة تحت بيرالسلم دى كلمة مجازية لانوا تحت بير السلم فيه مصانع احنا يمكن سياد اللوا لما كان بيكلم عن اللجنة الكلية
لميس الحديدى: ايه اللجنة الكليه ؟
سعاد الديب: لجنة الكليه هى لجتة المستهلك المصرية الدوليه اللجنة دى الحقيقة عملت تجربة هايلة وانا بتصوران ممكن ان تتاخد التجربة دى وتستثمر مفيش حاجة اسمها انوا المصانع دى اللى انا بتصورها انها زى المصانع الصغيرة اللى احنا دايما بنشجع
لميس الحديدى: يعنى دى مصانع صغيرة مصانع صغيرة صحية ؟
سعاد الديب: ايوة نراعيها بقى يعنى مثلا ساعديها يعنى ماهو برده المصانع دى عندها مشكلة مثلا فى التراخيص عندها مشكلة فى التدريب عندها مشكلة فى على فكرة مستوعبة عدد كبير جدا من العمالة الموجوده ليه نقضى عليها ؟نحولها الى عمل رسمى وممكن ان احنا نساعدها ودول ال25 مصنع اللى اتعملوا يعنى اتشجعوا جدا وتم تدريبهم فى هيئة المواصفات و الجوده وخدوا التراخيص ,اشتغلوا دلوقتى بمواصفات جيدة
لميس الحديدى: هنخرج فاصل اعلانى ونرجع تانى نواصل حوارنا ونشوف نعمل ايه ؟ يعنى الحكومة دورها ايه ؟ واحنا كمواطنين دورنا ايه وجمعيات حماية المستهلك دورها ايه ؟انا ليه حاسة ان الجمعيات بقت علينا علينا مش معانا ؟ عندى احساس كده غريب ان هناك تغير فى دور الجمعيات الاهليه نشوف بعد الفاصل
فاصل
لميس الحديدى: ماذا ياكل المصريون ؟ الاستاذة سعاد كانت بتقول فى الفاصل ان احنا معندناش رقابة كافية انا راى ان احنا عندنا رقابات كثيرة كام 17 لجنة
محمد ابو شادى : لا لا لابدون مبالغة يعنى ما بيتجاوزوش الايد الواحدة احنا عندنا الصحة و الزراعة والصناعة والتموين فى التضامن والصناعه بس
لميس الحديدى : وكل دول لسه فيه كم كبير من الاغذية الفاسدة ؟
محمد ابو شادى: ما انا هقول لسيادتك اولا يعنى كل مجتمع فى الخير والشر زى ما ربنا خلق جبريل للهداية خلق ابليس للشر احنا مش قاعدين فى الجنة ولا
لميس الحديدى: بس واضح ان احنا قاعدين فى النار
محمد ابو شادى : لا مش بالصورة السوداوية دى معانها ان الدنيا بيضة
لميس الحديدى: الحكومة بس اللى شايفا الدنيا بيضة
محمد ابو شادى: انا هقول لسيادتك احنا عندنا خطوط ساخنة عندنا حملات يوميه مش احنا بس كل الاجهزة الرقابية احنا برده مستهلكين انا ولادى مستهلكين بيتى مستهلك اخواتى مستهلكين
لميس الحديدى: يعنى حضرتك مش شايف مش حاسس ان هناك زيادة فى كم الاغذية الفاسدة
محمد ابو شادى: الولايات المتحدة الامريكيه فى اتفاقات التجارة العالمية اعلنت بسبب اقحامها الملكيه الفكرية فى اتفاقاتها اللى بتتعلق بتجارة السلع ان سبب اقحامحها الملكية الفكريه هى ان 3 الى 6 % من حجم التجارة الدوليه سلعة مقلدة ومغشوشة دا على مستوى العالم انا حضرت اكتر من مؤتمر دولى فى لندن وفيه اسطنبول عن غش الادوية منظمة الصحة العالمية نفسها بتعلن ان 10 % من حجم التجارة العالمية للادوية مغشوشة ومقلدة مش عندنا احنا بس هذه الظاهر ظواهر عالمية
لميس الحديدى: جميل بس ماهى كلها ظواهر عالميه لكن فى امريكا مثلا
محمد ابو شادى : احنا عملنا على فكرة دراسات يا استاذة علشان نعرف اسباب زيادة هذا الظاهرة ؟ التقدم العلمى ليه دور زمان كان غش العملة بالرسم دلوقتى بالكمبيوتر الحاجة التانيه المستوى والاخلاقى على مستوى العالم كله مش عندنا بس احيانا المواطن بيشترى سلعة مغشوشة ويشجعها لانوا ما يقدرش يشترى الاصليه لغاية الشركات المنتجة وصاحبة براءات الاختراعات الاسعار كل دى الاسباب الحقيقة بتساعد على وجود الغش النهاردة البطالة البكالة بتؤدى ان الناس تشتغل التراخيص
لميس الحديدى: انا عندى مشكلة كمواطن دلوقتى حضرتك ذكرت امريكا فى امريكا والله لو اكتشفوا ان فيه محل سوبر ماركت الصغير دا او هذا المكان بتاع الادوية بيبيع حاجة مغشوشة دا بيتسحب ترخيصه فور مفيهاش هزار
محمد ابو شادى فى مصر وجمعيات حماية المستهلك مع شركات المياه المعدنية حصل قبل كده لما حللوا واكتشفوا ان بعضها فيها غش اعلنوا اسماء الشركات وجرسوها احنا النهاردة بدلاانا نعمل هذا الاسلوب فى مصر
لميس الحديدى: اه بس انا عايزة اقولك ان كمان فيه هناك اغذية اخرى لان هما ابتدوا يتجراوا شوية بعد موضوع الميه المعدنية ابتدت الصناعيين بعد الضغط عليهم ولا ايه يا مدام سعاد
سعاد الديب: الحقيقة يمكن عندك حق فى كده زى ما بيقولوا انوا اللى بيتلسع من الشوربة
لميس الحديدى: فانتم نفختوا فى الشوربة
سعاد الديب: لا مش احنا يعنى احنا مثلا لما يكون فيه سلعة مش مظبوطة لابد ان انت تتحققى منها مش مجرد الرؤية العينيه المظهرية يعنى لازم على الاقل يتاخد منها عينيات وتروح للتحاليل واحنا عندنا المعامل المعتمدة هى معامل وزارة الصحة فيمكن اوى انوا ما يتعملش عادى وبعدين دى تكلفتها عاليه تكلفتها على انوا جمعية من الجمعيات تقدر تدفعها
لميس الحديدى: فى الخارج من يتكلف هذه الاموال ؟ يعنى جمعيات حماية المستهلك دى مين بيصرف عليها ؟
سعاد الديب : انا عايزة اقولك حاجة الوضع مختلف فى الخارج عنننا يعنى مثلا فى انجلتر 2 مثلا من الجمعيات عدد الاعضاء فى واحدة منهم مثلا مليون واحد انتى عندك هنا الجمعيات لا زالت الجمعيات ضعيفة الاقبال عليها قليل فالدخل بتاعها قليل فانا يعنى علشان احقق الحماية المطلوبة لابد انى انا علفى الاقل بدفع من جيبى بحاول انى انا اعمل جهد جامد جدا جدا لكن الناتس لابد انها تساعدنى
لميس الحديدى: وخلينا احنا نساعدك يعنى حضرتك لما يبقى عندك شك فى منتج ما او عندك مشكلة فى منتج هاتلنا دا دورنا احنا الاعلام دا دورنا احنا زى ما حضرتك بتقول بنجرسهم دى شغلتنا لما نجرس واحد كده ان شاء الله بعون الله ميسممش الناس هيخاف طب هيجى للحكومة بعد كده وياخد دعم ويقولك والكلام ده دا قصة تانيه لكن فى النهاية الاعلام الاعلام يجب ان يحى المواطن قبل
سعاد الديب : الانفلونزا الخنازير لما جاء عملية الدبح طبعا الناس متخوفة جدا من لحوم الخنازير انا رحت لسياد الوا وقلتله الناس متخوفة جاب الناس بتوعه فعلا ونزلوا على المصانع اللى هى بتعمل المصنعات فاحنا برده لازم كلنا كمجتمع لازم نتعاون مع بعصينا على الاقل ما هو برده احنا كلنا مستهلكين
لميس الحديدى: طب ناخد راى الناس استاذ سعيد من القاهرة اتفضل يا استاذ سعيد
سعيد: مساء الخير يا مدام لميس
لميس الحديدى: مساء النور اتفضل
سعيد: هو بس هسال سؤال الاول معلش بعد اذن حضرتك هو سياد اللوا من القاهرة ولا من حته تانيه ؟
لميس الحديدى: حضرتك من القاهرة ولا منين ؟
محمد ابو شادى: من القاهرة
سعيد: اه يعنى من جمهورية مصر العربيه يعنى مش من اى كوكب تانى يعنى
محمد ابو شادى: لا والله من جمهورية مصر العربية
سعيد: طب الحمد الله رب العالمين يعنى بس منايا حاجة واحده كان عندى حالة تسمم امبارح
سعيد : كلت ايه يا استاذ سعيد ؟
سعيد: لو قلت لحضرتك هتستغربى طماطماية والله
لميس الحديدى: طماطماية
سعيد: اه عملتى تسمم اقولك الادوية اللى قدامى شكلها ايه؟ واسمها ايه كمان اللى انا خدها من امبارح للنهاردة
لميس الحديدى: اه قول
سعيد: انتى مان وانتوسيد وفسيلاجين وامبارح يعنى قىء واسهال بشكل غير طبيعى انا عايزة اسال سياد اللوا بس اللانشون اللى هو بيقول مفهوش حاجة يقوللى مكوناته ايه ؟ اللانشون اللى بيتباع فى السوق مكوناته ايه ؟
محمد ابو شادى: اصل لو ادينا حكم معمم يبقى معنى كده ان احنا كلنا هنموت
سعيد: يا سياد اللوا سعادك فاهم كويس ان اللانشون دا ما هو اللى السميد اللى هو بتاع البسبوسة ودهون خنزير ولون صناعى
لميس الحديدى : لا مش كله يا سعيد
سعيد: انا مع سعادك مش كله بس اللى الناس الغلابة بيشتروه هو ده انا بكلم حضرتك بمنتهى الامانة اللى موجود فى المحلات الكيلو بى 6 جنيه وب7 جنيه فيه لانشون منتجات لحوم الكليو ب6 جنيه وب 7 جنيه
لميس الحديدى: اشكرك يا سعيد
محمد ابو شادى: معلش يمكن تكون الطمطمايه اللى هو خدها
لميس الحديدى: وانا هعرف منين ان الطمطماية اتفضل يا استاذ علاء
علاء: الو سلام عليكم
لميس الحديدى: وعليكم السلام
علاء: انا معايا ازازة بيبسى فيها لايقل عن 10 دبانات
لميس الحديدى: بيبسى بيبسى
علاء: بيسبسى مقفولة فيها 10 دبانات اتصرف ازاى ؟ علشان اتعامل مع الشركة دى ؟
لميس الحديدى: هتقفلها كده حضرتك وتجيبهالى المكتب
علاء : هى مقفولة
محمد ابو شادى : شارع القصر العينى قطاع التجارة الداخليه واحنا فى انتظار سيادتك بكره
لميس الحديدى: وتكتبلى جواب يا علاء وصورها يا لو سمحت وتبعتلى الصورة
علاء: عينيا الاتنين ابعتها على فين يا فندم ؟
محمد ابو شادى:99 شارع القصر العينى قطاع التجارة الداخليه
لميس الحديدى: سيبها زى ما هى كده يا استاذ علاء سيبها ارجوك بالدبانات يعيشوا مع بعضيهم فيها طارق من اسكندرية اتفضل يا طارق
طارق: السلام عليكم
لميس الحديدى: وعليكم السلام
طارق: بمسى على حضرتك وعلى ضيوف حضرتك والله انا هسال ضيوف حضرتك سؤال انا بتعامل مع جزار بيقولى انا ببيع كيلو الدهن الصافى ب 8 جنيه ختى بال حضرتك فما بالك لانشون 10 همبورجرات ب 4 جنيه ونص فدا بيتعمل من ايه من لحم ايه ؟ علشان الاخ اللى اتصل قبل منى فعلا انا بصدق كلامه سعيد اللى اتصل من القاهرة فعلا وبعدين انا كنت قريت فى جريدة من الجرايد القومية تقريبا جريد مش عيز اقول اسمها مش فاكر اسم مين بالظبط مسئول عن الاغذية فى مصر او للرقابة بيقول انا ما بدخلش ال3 حاجات دى لا اللانشون ولا الهمبورجر ولا الجبنة الرومى
لميس الحديدى:اه ما هو دا فعلا سمعناه شكرا يا استاذ طارق مين معايا ؟ دكتور طارق اتفضل يا دكتور طارق
طارق: مساء الخير يا فندم
لميس الحديدى: مساء النور
طارق: لو سمحتى انا بصفتى انا بعمل فى الامم المتحده فكنت بسافر كتير وبشوف فى دول كتير نوعيات وانماط الطعام وبعتقد ان احنا فى مصر انواع الغذاء اللى موجوده عندنا مش بالسوء اللى احنا بنحاول نصوره اعتقد احنا على مستويات كتيرة فيه انواع من الغذاء اللى بيتم انتاجها فى مصر ويمكن لو اتكلمت على الاغذية خاصة الزراعية منها التى لم يتم طبخها اعتقد ان فى مصر مستواها جيد جدا بالمقارنة اللى انا شفته فى دول تانية اخرى ويمكن حضرتك الدول التانيه على مستوى اعلى من يمكن اقتصاديا فى التقدم الاقتصادى ومستويات معدلات التسمم فيها نتيجة لارتفاع درجات الحرارة اكبر بكتير من اللى احنا بنسمع عنه
لميس الحديدى: وجهة نظر بنحترمها برده شكرا يا دكتور طارق مين معايا هند اتفضلى يا استاذة هند
هند : ايوه من فضلك ان كنت عايزة اعلق على موضوع الوفاة بتاع اللى هى اتقتلت فى المانيا
لميس الحديدى: ايوه يا فندم
هند: انا من 9 سنين طلعت بعثة المانيا وخد الدكتوراه من المانيا وانا اساسا خريجة المدرسة الالمانيه فعلشان كده يعنى بعثتى اخترت انها تكون المانيا وانا اللى هقولوا دلوقتى سلبى اللى انا شفتوا هناك حاجات سلبية فى المانيا ولكن برده بشهدلهم انى انا اتعلمت احسن تعليم فى المدرسة الالمانى افضل بكثير جدا من المستوى فى المدارس المصرية ولكن اللى انا شفتوا فى المانيا منتهى الاستهانة بالمصرى هما يعلموا جيدا ان مهما عملوا مهما طولوا لسانهم مهما سرقوا الرسالة مهما مهما مهما ولا حد هيسمع المصرى وكلوا هيسمع الاجنبى و لاالحكومة هتقدر عليهم ولا القنصل حتى يقدر ينطق فى بلدهم القنصل المصرى ولكن اشهد لمستشار الثقافى اياميها وقفوا معايا فى بلد كان حصل فيها مشكلة ورحت مكان تانى ما كنش الوضع بهذ السوء ولكن اول ما رحت كان بمنتهى السوء ومنتهى الاجرام واللى ينطق اى مصرى ينطق كانوا بيلفقوا تهم وطبعا بيصدقوا الاجنبى ومبيصدقوش المصرى
لميس الحديدى: اشكرك يا هند يعنى واضح انها ظاهرة فى المانيا بالذات هذا التصعب ضد المسليمين والمصريين معانا اتصال تانى مين معانا طيب لحد ما نجهز باقى الاتصالات يعنى غضب الناس يعنى الواضح ان الناس غضبانة وحاسه ان في فعلا نوع الاكل اللى بناكله مش اكل طبيعى ماذ يجب الان نفعل ؟
محمد ابو شادى: في توازن
لميس الحديدى: فيه توازن لا مفيش دا مكالمة قدامها 10 يعنى ماذا نفعل ما هو المطلوب من الحكومة؟ وماهو هو المطلوب من الجمعيات الاهليه؟
محمد ابو شادى : اولا الحكومة لا تدخر جهدا بكل اجهزتها انها بتراقب السوق وبتكثف حملاتها عاملين خط ساخن للمواطن بيعمل على مدى ال 24 ساعة لما بيتعرض لاى مشكلة بيتصل بينا لوشك فى صلاحية اى سلعة يتصل بينا بيجد استجابة وحل فورى
لميس الحديدى: فيه قانون انتم تقدمتم بيه اعتقد كوزارة لسلامة الغذاء وفيه قانون اخر من النائب محمد ابو العينيين دول نفس القوانين؟
محمد ابو شادى: نفس القوانين
لميس الحديدى: نفس القوانين هو الموضوع قانون ولا الموضوع رقابة؟
محمد ابو شادى: لا اللى بينظم الاجراء هوالهدف من القانون توحيد كافة القوانين المتعلقة بسلامة الغذاء وتوحيد اجهزة الرقابة و دا لتفعيل حماية المستهلك اكتر وحماية السوق
لميس الحديدى: استاذة سعاد
سعاد الديب: لا انا شايفة الحقيقة القانون العملية مش قانون بس يعنى مش مجرد قانون هو انا اخشى ان الجهاز لما يطلع ميبقاش عنده الاليات الكافية اللى تحقق له بالفعل اللى هو جهاز سلامة الغذاء بيقوم اساسا على انو ا كل الاجهزة اللى بتشتغل فى المجال ده هيبقى هو مسئوليته يعنى من الاول بيتبع نظام التتبع عن بعد لانى انتى النهارد اى سلعة بتصديريها للخارج بيجليك مندوب من الخارج يتابع معاكى اى سلعة منتجة من اول
لميس الحديدى:اه عندى مشكلة بقى فى التصدير والمحلى ليه دايما المصدر هو المحترم ؟ واللى بنستهلكه هو اسوا شىء موجود يعنى انت عندك نفس خط الانتاج اى منتج جبنة رومى بتصدر الجبنة شكلها مختلف عن الجبنة اللى بتاكلها ليه ؟
محمد ابو شادى: لا مش شرط
لميس الحديدى: لا شرط
محمد ابو شادى: فى بعض الاسواق بتشترط اشتراطات معينة فى السلعة اللى مصدرة ليها
لميس الحديدى:طب احنا مالنا
محمد ابو شادى: ايوه يا فندم ما هو بعض المنتجين اساءوا برده للسوق المصرى صدروا زتون معمول بالورنيش وبالبوتاس لفرنسا قبل كده واساءوا لينا برده
سعاد الديب: انا سالت السؤال ده قبل منك ان المستهلك المصرى يعنى المفروض انوا يعامل نفس المعاملة اللى بيتعامل بيها الاجنبى لكن الحقيقة المنتجين رد عليا بعضا منهم وقاللى ان المصرى مش هيقدر على التكلفة اللى يعنى انا تصورت انوا يقولى حاجة تانيه انوا هو ما يقوليش التكلفة قلتله يعنى دى اسعارنا اللى احنا بناخدها منك اغلى بدليل انت لما مثلا فى السعوديه بتشترى لتر اللبن مثلا ب 2 ريال
لميس الحديدى: يا سيدتى فى انجلتر بتشترى لتر اللبن ب99 فلس يعنى اقل من جنيه انتى هنا بتشتريه بكام ؟ بتشتريه ب 6 جنيه ونص
سعاد اديب: الفترة اللى فاتت كنت بتشتريه ب 7 جنيه ونص
محمد ابو شادى : بس انا عايزة اقول ان النهاردة فيه ارتقاء بعمليه السوق المصرى فى السوبرات ماركت فى الهايبر ماركت
لميس الحديدى: لا لا لا دى مش منافسة يا فندم يا فندم لا توجد منافسة فيه تكتلات لرجال الاعمال ولاصحاب هذه الصناعات مع بعض لا توجد منافسة
محمد ابو شادى :ماهو فيه مصرى وفيه مستورد
لميس الحديدى : ماهو المستورد بيرفع سعره زى المصرى خلاص بقى
محمد ابو شادى:ماهو فيه مستورد وفيه محلى وتقدرى حضرتك
لميس الحديدى:لا لا المستورد قليل جد المستورد احنا المواطن المصرى بيدفع اغلى تمن لاسوا نوع غذاء احنا بندفع اعلى سعر واقل كواليتى او اقل جوده موجوده فيعنى انا بسافر وشايفة و لاتوجد منافسة
محمد ابو شادى : وانا برده بسافر
لميس الحديدى:ايوه بس يا فندم انا ما بشفش السوبر ماركت اللى بتخبط فى بعض اللى بتحطم الاسعار
محمد ابو شادى: فى الصحف بتلاقى عروض كل اسبوع وكل يوم النهاردة فيه عروض بيخفض وبيضربوا فى بعض مين اللى قال مفيش؟
لميس الحديدى: ما بيضربوش فى بعض يا فندم
محمد ابو شادى: دا معمول جهاز كامل لتنمية التجارة النهاردة هيتولى ليرتقى باسلوب البيع بيرتقى باسلوب العرض بيقلل
لميس الحديدى: احنا محتاجين واعتقد ان دا كان طلب من المهندس رشيد برفع العقوبات وتغليظها فى موضوع الاكل واتمنى انوا تقدموا التعديلات فى الدورة اللى جاية فى مجلس الشعب
سعاد اديب:انا بتمنى ان هى ما تبقاش بس عقوبات بس انا بتمنى انها تكون عقوبات جنائية
محمد ابو شادى:الحديد مفيش ارخص منه
لميس الحديدى: ايوه بس الاسمنت غلى
محمد ابو شادى : ازمة وبنتصدى اليها وانتى عارفة سيادك ان احنا بنتصدى اليها
لميس الحديدى: يعنى انا بشكركم شكرا جزيلا اولا طبعا ارقام الشكاوى موجوده على الشاشة
سعاد اديب: بتمنى الحقيقة ان يكون عندنا جهاز امنى هام جدا وهو مباحث التموين بتمنى انوا يبقى جهاز امنى لحماية المستهلك ميبقاش للتموين بس لانوا التموين مسئولياته اختلفت النهاردة هو مسئوليته الحقيقة يبقى دعم كامل لحماية المستهلك علشان احنا الحقيقة محتاجين برده لحد يدعمنا
لميس الحديدى: انا بشكركم شكرا جزيلا وقت النشرة قد حان المواطن المصرى يدفع بالفعل سعر غالى جدا لمنتج انا شايفة يعنى هو مش بنفس هذه الجوده اكيد كان نفسنا يكون معانا الاستاذ طارق توفيق يرد عن اهل الصناعة اللى مش عارفة هل هما بيتكتلوا لصالح الصناعة ضد مصلحة المواطن؟ ولكن حماية المواطن يجب ان تكون الهم الاول قضية الاكل والغذاء دى قضية مهمة جدا عندنا تليفونات كتيرة جدا بتطالب بتغليظ العقوبة على التكتلات وعلى الاحتكارات التى تتضر طبعا بمصلحة المواطن اما قضية القتيلة مروة ارجوكم كونوا فاعلين الحجاب ليس فقط غطاءا للراس دعونا ندافع عن هذا الدين دعونا ندافع عن هذه الهوية دعونا نرسل جميعا برسائل بدل ما نقعد نشتم بعض على الانترنت دعونا نرسل برسائل فاعلة للسفارة الالمانية وللحكومة الالمانيه نطالب فيه باخذ القصاص وبان يكون هناك كرامة للمصرى فى الخارج اشكركم وهذه لميس الحديدى تحييكم وتصبحوا على خير .