حديث المدينة

مفيد فوزي : الناس عادة لما تقابل بعضها دائما تسال سؤال تقليدي ازي صحتك ، في مصر لو الشخص عنده بلاوي يقول ايه رضا....نحمده انا عندي سؤال ازي صحة مصر بوجهه للدكتور حاتم الجبلي وزير الصحة في مصر ، دكتور حاتم الجبلي ارجوك من اللحظة الاولي نطمن الناس حول ما جرى من الفيروس في العيون ال هاجم الدقهلية
د:حاتم الجبلي: الحكاية من البداية حضرتك عارف القصة دي احنا عندنا حاجة في الوزارة اسمها الترصد الوبائي
مفيد: الترصد الوبائي
د/ حاتم الجبلى :عندنا مراكز منتشرة في كل انحاء مصر اول ما نلاقي مرض معين عدد الحالات فيه تخرج عن نمط طبيعي يجلنا جرس انذار ونبدا نبعت ناس علشان تشوف القصة دي وتستحق نتبحر فيها ولا لاه يعني قصة عادية
مفيد: ما توصلش لمستوى الظاهرة
د/حاتم الجبلى: القصة دي ما وصلتش لمستوى الظاهرة القصة دي جتلنا من يوم الاثنين 18 بدانا كده نحس في عدد حالات التهاب في العين مش طبيعي وكانت في المطرية في الدقهلية ويوم الاربعاء 20 كان العدد وصل 82 ساعتها بقي جرس انذار ضرب بعدها بعتنا فرق من يوم الاربعاء بليل في المطرية وبعدين بدانا نمسح الدقهلية كلها لاحظنا في التهاب والالتهاب ده بدا في مدرسة من المدارس وبعد كده بدا ............
مفيد :عبارة عن اية الالتهاب؟
د/حاتم الجبلي: ببساطة ده احمرار في الملتحمة الحتة الشفافة
مفيد: اية الملتحمة دي؟
د/حاتم الجبلي : غشاء بسيط جدا ادام العين يعني يغلف العين خارجيا ويلتهب بسهولة لو اتعرض لاي نوع من العدوى او الخدش او حاجة من الحاجات دي المهم الملتحمة بتلتهب لاسباب فيروسية او كيمائية او اي حاجة من الممكن تاذيه
مفيد: اشمعنى الدقهلية؟
د/ حاتم الجبلي : انا بقل حضرتك ال حصل الفيروس ده بيجي من جهتين حضرتك تكح مثلا او تنف في ايديك وبعدين تدعك عينك فيجيلك الفيروس
مفيد: تتنقل العدوى ازاي؟
د/ حاتم الجبلي : تتنقل لوحدها العدوى بقي بتتنقل ازاي عن طريق استخدام فوط واحد اصلا عيان او استخدم منديل اصلا عيان او اسلم على واحد عيان كان مسح عينه في ايديه وراح مسلم عليه
مفيد: كلها بتتنقل عن طريق اليد؟
د/ حاتم الجبلي : اه كلها بتتنقل عن طريق اليد كلها من النظافة الشخصية
مفيد: انا بسال واحد من الناس في المنطقة نفسها تليفونيا بيقولي انها ما لهاش علاقة بقش الارز
د/ حاتم الجبلي : ما لهاش علاقة طبعا
مفيد : لكن ليها علاقة مباشرة بظفارة البرلس
د/ حاتم الجبلي : لا طبعا الكلام ده غير سليم
مفيد: غير سليم طب هل ممكن تتوقع انها انا قرات النهارده في الجرايد انها ارتفعت
د/ حاتم الجبلي : ارتفعت امبارح والنهاردةوصلت لمستوى ثابت
مفيد : ازاي تم السيطرة عليها؟
د/ حاتم الجبلي : احنا دايما لما يحصل وباء او بيحصل ظاهرة او وباء بنبدا نحصر المنطقة كلها المحيطة بيها بناخد مساحة معينة حوليها وبندرس توجهات ازاي المرض ده بينتشر عن طريق ايه وايه الكثافة الطلابية في المنطقة دي ايه وسائل انتقال من المنطقة دي لمناطق تانية ايه وسائل نقل العوي وبعدين ذي ما بقل لحضرتك نعمل خطة لمحاصرة المنطقة نفسها ككل وبالنسبة للمطرية فاحنا المطرية مشلتها انها لازقة في ثلاث محافظات على حدود شمال شرق الدقهلية لكنها مرتبطة بدمياط جدا فهى مرتبطة بمحافظة الشرقية جنوبا ودمياط شمالا وشرقا ببورسعيد
مفيد: طب ليه بيرتفع الرقم رغم السيطرة؟
د/ حاتم الجبلي : لاه ما هو اي مرض في الاول مابتبقاش واخد بالك منه بينشر وحتى لو سجلت عدد معين لكن عقبال ما وصلتله عمال ينتشر ولسه ناس مصابة بالمرض في فترة الحضانة فترة الحضانة من 5 الى 12 يوم فطبعا كان في ناس كثير في المرحلة دي وجالها العدوى واحنا لسه ما شوفناهمش لكن بعد ما عدت فترة الحضانة بيظهروا بالنبسة لينا
مفيد: هل يستحق الذعر؟
د/ حاتم الجبلي : لا طبعا لا خلاص مطلقا انا قلت ده مرض بسيط جدا ومن غير اي علاج بيروح لوحده من غير اي علاج بكرر ده ثاني لكن النظافة الشخصية هى الوسيلة لحماية الشخص من انتشاره
او الاصابة بهذا المرض
مفيد: طمن الناس يا افندم حوالين الشتاء قادم وانفلونزا الطيور قادمة وانفلونزا الخنازير قد يتمحور الفيروس طمن الناس يا فندم
د/ حاتم الجبلي : انا طبعا بشكرك على الاسئلة دي احنا نكلم اولا على انفلونزا الخنارير h1 n1 علشان نكلم الكلام العلمي احنا السنة ال فاتت الناس يا استاذ مفيد من التعبئة ال قامت بيها الحكومة ووزارة الصحة والتربية والتعليم الحقيقة المدارس عندنا كانت في وضع احنا ما شفناهوش من سنوات طويلة جدا
مفيد: واتهمت بالمبالغة
د/ حاتم الجبلي : اه اتهمت بالمبالغة انما وقتها كنت تلف على المدارس انا لفيت كثير كنت بلاقي المياه اتوصلت الحمامات زي الفل التخت ال بيقعد عليها الطلبة بتتنظف احنا ادينا حق لوزارة التربية والتعليم علشان تعين عمال نظافة
مفيد : الكوارث احيانا تحدث الفرق وتحسن الوضع
د/ حاتم الجبلي : اه طبعا انتهت قصة h1n1 في يناير بدانا العام الدراسي السنة دي وكله مبلط في الخط
مفيد: كله مبلط في الخط
د/ حاتم الجبلي : اه رجعنا ذي زمان مدارس مدير فيها كويس ومهتم بيها فيها مية ونظيفة ومدراس تانية حدث ولا حرج
مفيد : انت لابد وان تواجه المشاكل
د/ حاتم الجبلي : حقيقة دكتور زكي بدر رجل نشيط وعلى اتصال بيه ولما بنبلغه بس انا بستغل المنبر بتاع حضرتك
مفيد: اتفضل
د/ حاتم الجبلي : انا بقل الامهات خلي بالكم احنا داخلين على الشتاء مش عايزين عيالنا يبقى عندهم انفلونزا الانفلونزا حاجة مش كويسة مرض مش كويس زي ما حصل في التهاب الملتحمة لازم نهتم بالنظافة العامة لازم نغسل ايدينا باستمرار مش معنى ان كان في h1 n1 نغسل ايدينا وبعد ما تمشى ما نغسلش ده احنا لازم نعرف ان غسيل الايد بيضيع 50 في المية من الامراض
مفيد: غسيل اليدين
د/ حاتم الجبلي : بالضبط 50 في المية من الامراض انت علشان تتحكم في عدوى في اى مستشفي ما هقلك بيت اول حاجة يقلهالك اغسل ايدك قبل وبعد لما تشوف العيان يعنى دي معناها قضيت على 50 في المية من العدوى
مفيد: سؤال كده فولكلوري هل الصابون الان في مصر جيد؟
د/ حاتم الجبلي : لاه اصل انت حضرتك اصل في نوعين في الصابون المطهر وفي الصابون العادي يكفي لان حضرتك لما بتغسل ايدك ده في حد ذاته الماية نفسها بتزيل اي متعلقات في اليدين سواء كان متعلقات بكتيرية او ترابية او غيرها من الامور فالصابون هنا مش لازم يكون مطهر زي ما بعض الشركات حاولت تستغل ده وتقولك انا عندي احسن صابون لاه مش صحيح الصابون العادي والماية العادية كافية جدا المهم الماية تبقى نظيفة والصابون يبقى عادي ما فيش حاجة زيادة
مفيد: والطيور المنزلية
د/ حاتم الجبلي : دي بقى قضية الحقيقة عاوزين اعلامين ذي حضرتك يتبنوا هذه القضية لية بقه احنا لازم تتنقل من موضوع الطيور الحية الى الطيور المجمدة احنا لما بدانا انفلونزا الطيور في 2006 واجهناها كان عندنا طاقة دبح لاتزيد عن 20 او 25 في المية من انتاج مصر كله دلوقتي طاقة الذبح وصلت ل70 في المية ده معناه ان انا اقدر ابيع فراخ مجمدة موضوع التربية المنزلية لازم يتوقف لانه هودة ال خلى مصر متوطن فيها هذا المرض الخطير
مفيد: د حاتم دي عادات وطقوس مصرية انت بتغيرها ازاي بيهزها ازاي؟
د/ حاتم الجبلي : بص حضرتك انا شخصيا كنت اقترحت ان احنا ننقل بص احد الحاجات ال انا بقترحها ان احنا ننقل صناعة الدواجن الى خارج الدلتا تماما انا عندي جانبين شمال سيناء وجنوب سيناء دي صحراء ودي موازية لمحافظات القناة وعندي محافظة الصحراء الغربية وادي النطرون وغيرها اقدر ازرع هناك ليه انا لازم ازرع في اماكن مكدثة بالسكان وبعدين الادهي من كده حضرتك لما اتفتحت المزارع في التمانينات بطريقة عشوائية وغير منظمة فحضرتك لو مشيت في اي حته خارج القاهرة ولقيت مزارع دواجن تجد مزرعة الدواجن مبنية اربعة ادوار ومنورة بليل وصاحب المزرعة باني عمارة على الحرف وساكن فيها هو وعيالة وقاية ايه ال انت عايز احافظ عليها مش ممكن المرض متوطن في مصر الحالات هتزيد في الشتاء تاني احنا السنة دي كان عندنا 22 حالة و9 وفيات السنة ال فاتت كان عندنا 39 حالة و4 وفيات دة بيقلنا اية بيقول الناس بقت بتستهتر بالمرض
مفيد:بتستهتر بالمرض
د/حاتم الجبلي : الناس بتستهتر بالمرض ما بقوش بيخافوا منه ذي الاول فراحت نسبة الوفيات ارتفعت كل ما الابلاغ بيتاخر خلاص انت بعد ما بتعدي 72 ساعة بتبقى المسالة خلصت
مفيد : مرصدك بيقول الناس برده هتستهتر؟
د/ حاتم الجبلي : اه الناس هتستهتر اه يعنى ال انا شايفه ببداية الشتاء مقارنة بالسنة الماضية تجاه الانفلونزا العادية او اتجاه انفلونزا الطيور انا شايف الناس واخدة الموضوع بتبسط شديد
مفيد: مرصدك بيقولك ايه عن محوره ة المرض؟
د/ حاتم الجبلي : التقرير ال نشر في احد الصحف المستقلة ده تقرير خاطىء
مفيد:صحيح ده خاطىء
د/ حاتم الجبلي : اه لم يصدر عن منظمة الصحة العالمية اي بيان رسمي دي كانت احد المراكز البحثية المرتبطة بمنظمة الصحة العالمية في استراليا وكلامها مش موثق انما اي فيروس في الدنيا اي فيروس طول الوقت عمال يتغير علشان كده كل سنة بيجلنا انفلونزا مهما طلعنا طعم لسه برده بيجلنا انفلونزا جديدة الفيروس بيتغير لكن h5n1 لسه الفيروس ما اتغيرش تغير جذري فبالتالي هو مازال بمكونه الرئيسي حصل فيه تغييرات بس طفيفة جدا
مفيد : عايزة اقولك انه بمناسبة الفراخ انه حقنها بالمية خلاني اشعر ان انا مش عايز اقرب من الفراخ تاني مهما كنت رجل عاقل مدرك عارف ان في حاجات فيها شكل الاشاعة المبالغة شكل يهز استقرار الناس الغذائي لكن انا بحس اني مش عايز اقرب من الفراخ تاني
د/ حاتم الجبلي : الفراخ المجمدة مضمونة ومتراجعة وفي مدابح نظيفة ومجمدة ومحدش يقدر يحقنها بالمية فراخ تخضع لشروط صحية سليمة انما لو روحت لواحد فرارجي ايش عرفك ان الفرخة دي مش محقونة مية غير لما تجي تطبخها كانت اد كده بقت اد كده
مفيد: واحد قابلته في سوق من اسواق القاهرة قالي انه مسالة الفراخ الحية في اماكن متاحة واماكن مغلقة واديك اهوه شايفني واحنا نكاد نكون على الحديدة فاحسيت بالظلم
د/ حاتم الجبلي : انه مش عارف يبيع فراخه الحية يارت ما تتبعش خالص يتظلم يتظلم المصلحة العامة اهم دي ناقلة للمرض النهاردة احنا بنتفرد ان احنا الوحيدين في العالم ال المصابين بانفلونزا الطيور تحت سن خمس سنوات
مفيد: تحت سن خمس سنوات!
د/ حاتم الجبلي :عيال قاعدة وسط الفراخ حالات قليلة منخفضة جدا لان الام لما تلاقي ابنها سخن او عنده كحة او بلغم بتجري بيه انما الغالبية العظمى من حالتنا تحت سن خمس سنين ده كلا ده
مفيد: ده خطير
د/ حاتم الجبلي : خطير طبعا
فاصل
مفيد : ايه المدخل السري كده على بلاطة لنواب العلاج وهو موضوع شغل الراي العام كثيرا
د/ حاتم الجبلي : ما فيش سري ولا حاجة احنا طبعا علشان حضرتك تبقى عارفة بحجمه الطبيعي احنا بقلنا 3 سنين بنشوف انفاق غير مبرر للعلاج على نفقة الدولة عمال يزيد يزيد
مفيد: تقارير رقابية
د/ حاتم الجبلي : لاه تقارير عندنا كمان عندي انا مابيزيدش بمعدل زيادة السكان بمعدل الامراض بيزيد بدرجة غير عادية فشكلنا لجنة 2008 واللجنة دي اشتغلت 9 شهور وطلعت بتوصيات قالت لازم تتحط ضوابط معينة كان في ضعف الرقابه من ناحيتنا احنا كوزارة الصحة على المستشفيات دي نقطة ضعف كمان كان القرار بيطلع على اي ورقة بيضاء مش ورقة مؤمنة كانت القرارات بتطلع بقيم متباينة يعني حبيبى الاستاذ مفيد اطلعله قرار بعشرة الاف جنية انا مش حبيبه اطلعله قرار بالف جنيه ده طبعا ملوش قواعد او حاجة واضحة تعمل تحقق نوع من الانضباط في هذا المهم طلعت الضوابط في صورة تقرير رسمي وبدانا ناخد اجرائتنا جينا في الاجراءات العنيفة لقينا مقاومة شديدة جدا فكان ادامنا حل من اثنين ياالموائمة سياسيا يا نحل المشكلة جذريا
مفيد: انتهت الى ايه؟
د/ حاتم الجبلي : انا اخترت الحل الجذري
مفيد: ما اخترتش الموائمة السياسية
د/ حاتم الجبلى : لاه وقلتها في مجلس الشعب لانه لو ما كنتش عملت كده يا استاذ مفيد كان النظام الصحي في مصر للناس محدودي الدخل كان توقف تماما هتقلى ازاي هقولك الديون عندنا اتراكمت فال بيورد للمستشفى صمام قلب مثلا له دين ما بيخدوش بقاله ثلاث سنين فمش هيورد بعد كده تيجي عملية القلب تقف ما عندكش فلوس فالنظام كان هيقف عند نقطة مش هيقدر يكمل تاني فاحنا قلنا مش هينفع موائمة سياسيا ينفع هنا حل جذري ما فيهاش استثناءات فيها
مفيد: حضرتك كان عندك خلل في المجالس الطبية؟
د/ حاتم الجبلي : اه طبعا اه خلل اداري مش جنائي
مفيد: ازاي خلل اداري؟
د/ حاتم الجبلي : اولا الحقيقة هما مش عاوز اظلمهم بس لما نرجع للقضية من اصلها سنة 75
مفيد : د حاتم ممكن اقول حاجة انت وزير ابن وزير يمكن الناس ما تعرفش انك ابن الدكتور مصطفي الجبلي وزير الزراعة في يوم من الايام ويمكن ما بيهمكش كتير انك تقعد في المنصب او تمشي الى اخره ولذلك بستشعر انك بتتصرف احيانا في وزارة الصحة برومانسية بينما يتصرف احمد زكي بدر في التعليم بغير رومانسية انا ارجوك ان تنحي الرومانسية جانبا علشان تقول نعم دول اخطأوا بدليل انك لجات للطبى وليس للموائمة السياسية
د/ حاتم الجبلي : هقول لحضرتك علشان ندي لكل واحد حقه ما نتهمش الناس
مفيد: انت مش عايز تعمم
د/ حاتم الجبلي : انا عايز اقول المشكلة جات ازاي وليه هما اخطأوا
مفيد : اه لماذا حدث الخلل الادارى
د/ حاتم الجبلى : اه بالضبط كده ... القرار الى طلع سنة 75 من الرئيس المرحوم انور السادات وده قرار كان بيقول انه الدوله تتولى علاج الغير مغطين بأى نوع من التأمين ..كويس .. ووزير الصحه يطلع الضوابط لهذا استخدم هذا القرار وقتها مع ضوابط وزير الصحه فى تسفير الناس للخارج لانه كان بيشمل العلاج بالداخل والخارج فكانت الكموسيون الطبى وحضرتك طبعا سيد العارفين كان يروح له اثنين كل يوم ثلاثة كل يوم اقصى حاجه عشر افراد فا كان الدنيا محكومة ... لما جاء الدكتور اسماعيل سلام سنة 96 قال طيب ما نعالج الناس جوه زى ما نعالجهم بره
مفيد : داخل مصر
د/ حاتم الجبلى : داخل مصر.. فا ربما ماكنش فى تقدير لحجم الاقبال على هذا النظام داخليا فا اصبحت المجالس بضوابط سنة 75 بتطلع 7000 قرار فى اليوم
مفيد : 7000 قرار فى اليوم !
د/حاتم الجبلى : ايوه فا موظف المجلس الخط العام الى امامه حاجة طالعة سنة 75 مش عاملة حسابها انك ها تطلع 7000 قرار فى اليوم ... فا لما طلع 7000 قرار فى اليوم اصبح فى ناس شافت انه فى عدم رقابه كاف وشافت انى ممكن استخدم نظامين مدام معندهمش سجلات كافية ... ما هم مش عاملين حسابهم على 7000 قرار فى اليوم فا بالتالى ابتدأت ناس تلعب بقه ..يعنى تسمع الواحد تطلعله ثلاث اربع قرارات فى اليوم وواحد مش عارف متوفى يطلعوا له قرار
مفيد : فى قرارات بتتاخد وتتباع ؟
د/ حاتم الجبلى : يعنى احنا عمرنا ما اثبتنا هذا لاكن يعنى كان فى شواهد بتدل على ممارسات غير سليمه ... انما انا بقول ان الخطأ عندنا احنا فى وزارة الصحة كان ينحصر فى بعض النقاط .. اول حاجه التفتيش على المستشفيات كان ضعيف ومتابعة القرار فى المستشفى كان ضعيف
ثانى حاجه عدم الربط بين القرار وصاحب القرار مباشره لانه كان بيجى وسيط
مفيد : مين الوسيط ده ؟
د/ حاتم الجبلى : ممكن مثلا يكون عضو مجلس نيابى او عضو مجلس محلى اى حاجة له مندوب يقول لك ده المندوب بتاعه المعتمد فى المجالس .. ولا هو معتمد ولا حاجه الراجل ده يروح يلم ورق من النائب ومن اى حد تانى ويروح بأسم النائب يطلع قرارات .. ممكن .. ممكن تحصل واشتغل بقى ويروح للناس ويقول له لو طلعت لك قرار بكذا اديك ..يعنى كده حصل خلل .. فا احنا لما لقينا كل هذه المشاكل وحصرناها كان امامنا حل من الحلول احنا د اخلين الانتخابات كان ممكن يقولوا اجلها لما بعد الانتخابات .. ممكن بس كان ها بتكوم علينا دين السنه دى مهول لو كنا مشينا بنفس الطريقه
مفيد : بلغ اد ايه تكاليف العلاج على نفقة الدوله ؟
د/ حاتم الجبلى : السنه الى فاتت بلغ 3.9 مليار
مفيد : مليار !
د/ حاتم الجبلى : اه 3.9 مليار واحنا الموازنه بتاعتنا كلها مليار ونصف كان علينا دين 2.4 مليار زى كده سوق المناخ فى الكويت كل واحد يدى الثانى شيك ومفيش حد يصرفه لما واحد منهم خرج يصرف الفلوس راح موقع كل الناس
مفيد : يعنى دخلت فى منطقة البزنس؟
د/ حاتم الجبلى : لا احنا معندناش ما يثبت انه فى بزنس
مفيد : والاجهزة الرقابية
د/ حاتم الجبلى : الاجهزة الرقابيه قالت ظواهر تستدعى او تثير الانتباه...لاكن عارف حضرتك علشان انا اثبت ان واحد دفعت له الف جنيه علشان اخد قرار منه لازم يبقى هو مبلغ وانا بصوره وبأخذ اذن من النيابه
مفيد : حضرتك عندك 12 كاميرا فى مكتبك زى ما قرات
د/ حاتم الجبلى : لا ده دلوقتى بعد ما حطينا ضوابط
مفيد : عندك 12 كاميرا بتشوف الاداء ماشى ازاى
د/حاتم الجبلى : ده دلوقتى اه بعد 8 فبراير عندى كل يوم ببقى شايفهم طول الوقت
مفيد : وهم حاسين انك بتراقبهم ؟
د/ حاتم الجبلى : اه طبعا انما النقطه ان الوسطاء دول كانوا 50 %
مفيد : انت بتراقب عن عدم ثقه ؟
د/ حاتم الجبلى : لا المراقبه طبعا بتدى دائما ان الموظف فى مصر يحب انه يكون مراقب ولو لم يراقب ما بيشتغلش وده الموظف الحكومى وعرفت ده اخر خمس سنين
مفيد : بالمناسبة لما جبت سيرة الموظف ليه انت بتخاف من الموظف ال ما بيحبش ياخد اجازة ؟
د/ حاتم الجبلى : اه ده فى منتها الخطورة وخاصه فى الادارة المالية لان ال بيشتغل فى الادارة المالية وما بيخدش اجازة اخطر موظف وانا بكلمك جد عن خبرة
مفيد : مع انه التصور العام انه ياسلام
د/ حاتم الجبلى : لا ده مش عايز يسيب حاجة هو نايم عليها
مفيد : مش عايز يسيب حاجه هو نايم عليها !
د/ حاتم الجبلى : اه طبعا ده نايم على مصيبه ولذا مهم جدا فى الادارات المالية انك تنقل الناس طول الوقت
مفيد : ده معنى خطير اكتشفته حضرتك فى خمس سنين ؟
د/ حاتم الجبلى : اكتشفته فى القطاع الخاص مش فى القطاع الحكومى ده انا اتعلمته من القطاع الخاص
مفيد : اه ان الموظف ال ما بيخدش اجازات ده تقلق منه
د/ حاتم الجبلى : تقلق منه جدا
مفيد : د/ حاتم الجبلى هل يقترب امل التأمين الصحى فى مصر ؟
د/ حاتم الجبلى : اه اعتقد وانا اقول لك بمنتهى الثقه ان قانون التامين الصحى القيادة السياسية مصممة عليه فى الدورة الجايهة
مفيد : انا اتصور ان التأمين الصحى فى مصر هو صوره من صور العدالة وصحح لى
د/ حاتم الجبلى : اه طبعا هو اصلا اجتماعى قبل ان يكون صحى وده الناس مش فهماه
مفيد : علشان كده انا قلت العداله
د/ حاتم الجبلى : انا عايز اقولك ايه تعالى نبص للصوره الاكبر انا متأكد لما نخش فى مناقشات مجلس الشعب ها يبقى المناقشات كلها الاشتراك ب خمسه جنيه ولا سته جنيه ونضيع عمرنا كله ووقتنا كله فى الحته دى انما ها ننسى الصورة الاخطر والاكبر ... الوضع الصحى فى مصر النهارده ..الانفاق الصحى ال هو كل حاجة بتتصرف جوه النظام الصحى المصرى غريبه جدا ... ثلثين المبالغ ال بتتحط فى النظام الصحى جايه من جيبى وجيبك والثلث من الحكومة ... تصور .. الصح هو العكس ان الثلثين من الحكومة والثلث من جيبى وجيبك
مفيد : طيب ايه سبب غرابة المعادله ؟
د/ حاتم الجبلى : غرابة المعادلة سببها حاجتبن اولا ان الانفاق الحكومه فى النظام الصحى اقل من المعدلات الدولية ده اول حاجة والحاجة الثانية عدم ثقة المواطن فى النظام الصحى الحكومى فا بتخليه يلجأ الى نظام صحى بديل وهو الخاص
مفيد : كم ميزانية وزارة الصحة السنه دى اذا سمحت ؟
د/ حاتم الجبلى : وزارة الصحة السنة دى توصل حوالى ال15 مليار تقريبا بس خلى بالك حوالى 45% منها مرتبات واجور
مفيد : 45% !
د/ حاتم الجبلى : انا عندى 760000 واحد والغريب جدا انا عندى الهرم مقلوب
مفيد : يعنى ايه مقلوب ؟
د/ حاتم الجبلى : احنا قارنا بينا وبين انجلترا .. انجلترا 70% من العاملين فى وزارة الصحة دكاتره وممرضات وفنين و 30% ادارين .. انا عندى 70% ادارين و 30% دكاتره وممرضات وعايزين يحدفولى كمان بتوع مراكز المعلومات هو انا ناقص انا عندى جاهز 70%
مفيد : حضرتك بتقول هو انا ناقص يا خويا
د/ حاتم الجبلى : يقول لك بتوع المراكز والمعلومات رايحين الصحة والسكان
مفيد : د / حاتم 70% ادارين !
د/ حاتم الجبلى : كثير جدا احنا بنروح وحدات صحية عدد الادارين فى الوحدة الصحية قد الدكاترة والممرضات والفنين ثلاث اربع مرات
مفيد : عايز اقول لحضرتك هنا عبارة شديدة الاهمية سمعتها مرة من نجيب محفوظ ويقول ( ان عدد الافراد الزائدين عن الحاجة يساوى تماما عدد البطالة من هذه المؤسسة )
د/ حاتم الجبلى : طبعا طبعا النهارده انا بالنسبه لى الانفاق الصحى لازم اوجهه بطريقه سليمة وارجع اعدل الميزان بحيث اخلى 66 % من الانفاق الصحى قادم من الحكومة و 33 % قادم من جيبى وجيبك وعارف لو انا معملتش كده ها يحصل ايه اوصلك الصورة الكبيرة خلال 20سنة الجاية ها تطلع نسبة الانفاق الصحى ال من جيبى وجيبك من 66 % الى 70 و 76 % والانفاق الحكومى ها ينخفض من 33% الى 23 او 24 % ده معنا لو احنا 80 مليون واحد فى 11 مليون انسان بسبب الانفاق الصحى ها ينزلوا من الطبقه المتوسطة للطبقة الفقيرة هى دى الصورة الكبيرة
مفيد : هل ترى ان المنشأة الصحية قطاع خاص ؟
د/ حاتم الجبلى : فين فى مصر اه طبعا
مفيد : هل يمكن الزيادة فيها ؟
د/ حاتم الجبلى : احنا النظام الجديد ها يتيح لحضرتك انك تختار بين الخاص والحكومة الاثنان فى منافسة
مفيد : اه اثنين فى منافسة
د/ حاتم الجبلى : اه طبعا انا بالنسبة لى فى مبدأ اساسى فى نظام التأمين الصحى الجديد حاجة اسمها فصل التمويل عن الخدمة يعنى الاستاذ مفيد دفع اشتراك شهرى 20 جنيه فى هيئه بتلم ال 20 جنيه دول منى ومن حضرتك ومن كل الناس ال معانا دى تبقى زى الخزنة وتروح للمستشفى الحكومى او الخاص تقول له انا ها ابعتلك فى السنة 100 عيان العيان ها ادفعلك فيه وليكن 150 جنيه بس تلتزم بمعايير الجودة وانا فرق التفتيش بتاعتى لو لقتك مش ملتزم مش ها ابعتلك ال 100 عيان دول
مفيد : عايزك تقول لى ايه العراقيل بأعتبار انك ها تناقش ده ؟
د/ حاتم الجبلى : اكبر مشكلة او عقبة كانت التمويل
مفيد : التمويل.. طيب هل تعتقد ان الناس فى مصر بفهم عاقل و بوعى ممكن انهم يشاركوا فى ملأ هذا التمويل
د/ حاتم الجبلى : ده املى بس اعتقد ان طبيعة المصرى .. لا
مفيد : منا علشان كده عايز اعرف ايه العرقلة ؟
د/ حاتم الجبلى : طبيعة المصرى يقول لك ياعم مين يعيش لما ابقى امرض ولما تقول له ادفع اشتراك علشان يحميك فى المستقبل يقول يا عم مين يعيش لما امرض ابقى ادفع
مفيد : هو ال بيعمل تأمين للعربية مستنى لما تحصل كارثة
د/ حاتم الجبلى : لما يكون فى اجبار القانون ها يجبره
مفيد : هل لن يجبر القانون الناس فى مصر ؟
د/ حاتم الجبلى : لا ها يجبر ها يبقى الزام
مفيد : علشان كده انا بقول الالزام فقط
د/ حاتم الجبلى : الالزام على القادر اما الغير قادر النظام الجديد هيعالجهم مجانا تماما ( عمليات , ادويه , استشارات , عيادات خارجية )
مفيد : اقدر اطلع من قلبى الجملة التالية هل حقيقى ان الناس بالمجان بيحصل ؟ ده الاسعاف مش بالمجان
د/ حاتم الجبلى : لا الاسعاف مجان ازاى بقى
مفيد : بيخدوا فلوس
د/ حاتم الجبلى : بيخدوا فلوس امتى لما انت تطلبه تقول له لو سمحت انا عايز اتنقل من بيتى اروح المستشفى الفلانيه علشان هناك ها يجبسونى ..لاكن لو حالة طوارىء لايمكن ادينى واحد اخد فلوس فى حالة طوارىء وانا اقطع لك رقبته الا الطوارىء ده خدمه من الدوله ملتزمه بها
مفيد : ليه اطباء التخدير مهمشين وفى حاله لا تليق بهم وانا كنت ناقشت هذا فى حلقه سابقه؟
د/ حاتم الجبلى : اطباء التخدير وغيرهم بصفه عامه الاخصائين والاستشارين فى مصر محتاجين ان احنا نحسن اوضاعهم الماليه وقانون التأمين الصحى الجديد لو طبق بحزافيره ها يكون دخل الطبيب من القطاع الحكومى يصل الى حوالى 70 % من دخله فى القطاع الخاص وبالتالى كثير جدا منهم ها يكتفى بالعمل الحكومى ومش ها يروحوا للقطاع الخاص .. اطباء التخدير تحديدا بالعكس هم مش مهمشين وعددهم قليل جدا فى مصر
مفيد : ليه يا فندم
د/ حاتم الجبلى : احنا عندنا خلل فى توزيع التخصصات بمعنى بالارقام علشان اكون واضح الدقهليه كا محافظه فيها 900 دكتور اطفال وامراض نساء ووزارة الصحه فى جمهورية مصر كلها فيها 1000 دكتور تخدير وده خلل فضيع علشان كده بعتنا جواب لكل الجامعات وده اثار الناس ضدى بمنع التسجيل الدراسات العليا فى امراض النساء والاطفال لمدة خمسة سنوات قادمه .. والقرار هدفه ان انا اعيد توجيه الشباب حديث التخرج الى التخصصا ت البلد فى حاجه اليها
مفيد : كيف قبل؟
د/ حاتم الجبلى : احنا ادناهم ميزة فهم مش ممكن يقبلوا واعترضوا طبعا بس بعظهم مش اغلبهم لاكن احنا استثنينا المحافظات الحدوديه يعنى مرسى مطروح ,الوادى الجديد, اسوان, البحر الاحمر وشما ل وجنوب سيناء دول استثناهم من هذا القرار لان هم محتاجين دكاتره نساء وتوليد امنا انا عايز ادفعهم للتخصصات الناقصه عندى
مفيد : زى ايه يافندم
د/ حاتم الجبلى : ناقص عندى التخدير , طب الاسرة , الاشعه , المعامل التخاليل ولو اخذت من اول القاهرة حتى اسوان 90 % من المعامل الطبيه يديرها كميائيين وليس اطباء او فنين معامل ..معنديش دكاتره وفى احدى المحافظات فى اثنان دكاتره اشعه فقط من اول المحافظه الى اخرها .. انا محتاج التخصصات دى .. محتاج طب الطوارىء ومحتاج النفسيه وهى مهمه جدا ومحدش يعطيها اى اعتبار ومحتاج العظام ... هم سبع تخصصات فا انا بعمل دلوقتى ان حطينا نظام جديد هذا تطبيقه فى شهر مارس القادم فى التخصصات السبعه .. الطببيب ال ها يتقدم لدراسة الزماله ها يعفى من التكليف الملزم به يروح الريف بس الطبيب ده لازم يجى من المحافظه ال انا عندى فيها نقص .. مش ها ختار بالمجموع ها اختار بالاقامه الاول كنت بديله بالتخصص طبقا لممجموع فا يجى كلهم من القاهرة ويتخرج كلهم ويقعدوا فى القاهرة .. لا يعنى مثلا قنا انا محتاج عشرة يبقى اخذ عشرة من قنا وافترض جالى عشرين واحد من قنا ها اخذ احسن عشرة بالمجموع انما الاول لازم اخذ ال جاى من قنا لان ده ها يرجع تانى يدرس فى قنا ويشتغل فى قنا ال فيها نقص شديد جدا من تخصص التخدير او من تخصص طب الاسرة او تخصص العظام او تخصص النفسيه او تخصص الاشعه والمعمل
مفيد : هل تعتقد ان هذا المشهد الطبى ال بيخليك تشوف اوجه النقص فى حتت يبدء من كلية الطب ؟
د/ حاتم الجبلى : اعتقد انه ها يبدء من الدراسات العليا فى كلية الطب
مفيد : يعنى تستطيع ان تسمح لعمر ابنك يديلك حقنه ؟
د/ حاتم الجبلى : اه بس عمر ساب الطب وراح يدرس ادارة اعمال
مفيد : حلل لى
د/ حاتم الجبلى : عمر كان كويس جدا فى الكليه وكان من الاوائل واخذ نياببة تحاليل وبعد ما دخل الامتياز وخلاص بيستلم النيابه قال لى انا مش ها اشتغل فى الطب وراح قدم فى شركه دوليه وراح لندن ثم دبى ثم قدم فى احدى الكليات المرموقه جدا فى الاداره وقبل من ضمن 4000 متقدم فى سويسرا وها يدرس فى سويسرا من اول يناير
فاصل
مفيد : القنوات المضلله صحيا .. كيف قرأت عملية اغلاقها ؟
د/ حاتم الجبلى : اولا نحيى وزير الاعلام على هذا لاكن احنا لنا قصه فى هذا الموضوع فا فى 2007 ارسلنا للنائب العام وتفضل مشكورا بعت منشور دورى لكل نيابات مصر على هذا الموضوع و لو حضرتك تتزكر كان فى واحد من هؤلاء مدرس تربيه رياضيه كان بيطلع فى قناه من القنوات قبض عليه فى مطار القاهرة وسجن وبعد ما خرج جرى على الامارات
مفيد : كان بيعمل ايه ؟
د/ حاتم الجبلى : كان بيفتى بقى ويقول العشب ومش العشب والطب الدينى وطب مش عارف ايه .. الكلام الى بتسمعه ده وطبعا هم يمسكوا فى الحاجات ال بتفرق مع الناس زى المقويات الجنسيه والكلام ده ويشتغلوا عليها وده طبعا احنا ومعنا النقابه وكان لها دور مهم د/حمدى السيد فا بنشكر جدا وزارة الاعلام
مفيد : هل ده ريحك نفسيا؟ خصوصا من التأثير على الناس
د/ حاتم الجبلى : طبعا
مفيد : عدوك فى مصر ايه يا دكتور ؟ الجهل ولا التخلف ولا عدم القدرة نفسى اعرف
د/ حاتم الجبلى : اللا مبالاه
مفيد : اللامبالاه ده عدوك الحقيقى ؟
د/ حاتم الجبلى : عدوى الحقيقى نعم يعنى مثلا محطة مصر للسكه الحديد وعاوز تطلع قطار اسكندريه والولد على الشباك ما يعرفش انت مين وطلبت منه تزكرة يقول لك استنى خمس دقائق وتقول له انا الاستاذ مفيد يقول لك اهلا اهلا ازى سعادتك ويبتدى يطلع لك التزاكر ويعاملك معامله متميز فى حين انت تروح بره حضرتك اكيد رحت قطعت تزكرة بره ولا حد يعرفك ولا تعرفه معندوش اللامبالاه معندوش اللامبالاه حضرتك عنده شغلانه لها توصيف دقيق بيروح الصبح زى الماكنه يفضل شغال لحد ما يخلص ما يفرقش معاه الاستاذ مفيد ولا الدكتور حاتم ولا عم محمد هو كل الناس عنده سواسيه احنا عندنا لا
مفيد : بكشف الاشعه سببه ايه اللامبالاه ؟ وكأنك ترى صورة اشعه امامك
د/ حاتم الجبلى : اعتقد اسباب متعدده منها اسباب تاريخيه ومنها اسباب وضعيه .. والاسباب التاريخيه اعتقد احنا اصحاب الحكومه فى مصر احنا ال خلقنا النظام ده احنا ال اخترعناه انما احد اسبابها مثلا انك اخذت الخطوة ال بيعملها شخص وقسمتها على عشر اشخاص كل واحد بيعمل عشر الخطوه دى فا شغله بقى قليل جدا فا مابقاش عنده الحافز يعمل حاجه واديته شوية ملاليم وقلت له اعمل الخطوه دى فا عنده حاجه من اثنين يا اما هو مش مهتم بيها ها يتعامل معك بمنتهى اللامبالاه ولا يفرق معاه الا لو طلعت انت حد مهم او قادم بواسطه شوف الواسطه فى مصر احد دوافعها الرئيسيه اللامبالاه ده حتى مع الدكاتره ال بتروح لهم خصوصى حضرتك لما بتروح لدكتور خصوصى بتكلم حد من اصحابه بتقول بس والنبى وصى على مع انك رايح تدفع ورايح بفلوسك وقاعد منتظر
مفيد : غريبه !
د/ حاتم الجبلى : طبعا لانه دى حاجه مبنيه داخلنا
مفيد : فيما تطالب اطباء التخسيس ؟
د/ حاتم الجبلى : اطباء التخسيس مشكلتهم ان اى واحد بيخش فى هذه المهنه بدون ان يكون له علم كافى فى التغذيه والقصه كمان دخلت فى حته دينيه
مفيد : بمعنى
د/ حاتم الجبلى : يعنى البعض يربطها باالاديان ان ده اسلوب دينى ويبدأ يقنع الناس بيها وهكذا انما هم مش اسمه دكتور تخسيس اسمه دكتور تغذيه
مفيد : ده الاسم العلمى الحقيقى ؟
د/ حاتم الجبلى : اه ده ياخذ يا ماجستير يا ياخذ دكتوراه ويقول لك تأكل ايه الصح وعلى فكره وكمان يمسك رياضين يحسب السعرات الى هو محتاجها قد ايه والمجهود الذى يبزله ولما ينام ولما يصحى الصبح ده علم فى منتهى التعقيد انما مش اى واحد يطلع شكله حلو ويطلع فى التلفزيون ويقول اصل احنا ياجماعه ناكل فراوله مع شوية بندق وشوية لوز وها نخس كويس قوى .. لا ده مش كلام ده
مفيد : بتشوف البرامج ال فيها اكل ؟
د/ حاتم الجبلى : لا مش كثير بشوف الطباخين بس
مفيد : ملاحظة حضرتك عليها ايه ؟
د/حاتم الجبلى : مش بتابعها قوى
مفيد : هل فى مصر أميه غذائيه ؟
د/ حاتم الجبلى : اه طبعا فظيعه .. فظيعه
مفيد : بالمناسبه ..حوادث التسمم ال بتحصل احيانا فى مطاعم كبيره وشهيره ..هل هى بسبب موظف فلان اسمه مفتش الصحه ؟
د/ حاتم الجبلى : بص مفتشين الصحه انا فاكر كويس فى سنة 2006 لما جيت وعملت مسح وجدت عندنا 5000 واحد
مفيد : 5000 مفتش صحه !
د/حاتم الجبلى : اه وكان معندهمش اى ادوات يشتغلوا بيها مكنش حتى عندهم ثلاجه لما ياخذ عينه من مطعم يحطها فيها فكانت تفسد وعمال لما يعمل قضيه لواحد يكون الحاجه دى راحت النيابه بايضه ويقول له لا انت ال بوضتها ويطلع الشخص برىء جدا واحنا جبنا لهم ادوات فى 2007 كويس ... انما بعض هؤلاء لا يؤدى عمله بطريقه سليمه واحنا نحاول نأخذ اجراء ضدهم والبعض يؤدى عمله كويس جدا .. فى النهايه الرقابه لا تزال مش فى المستوى ال احنا عايزينه
مفيد : هل عنده الضبطيه القضائيه ؟ ويقدر يدخل محل ويقول انا عندى
د/ حاتم الجبلى : اه عنده وفى ناس كويسه جدا وفى ناس تسيىء استخدام هذه الضبطيه
مفيد : هل بيمدوا ايديهم ؟
د/ حاتم الجبلى : بعضهم اه
مفيد : هل ده معناه انه بيفوت ؟
د/ حاتم الجبلى : اه بيفوتوا بعضهم
مفيد : فى احد المطاعم العامه دخلت الحمام بس عينى جابت صوره للمطبخ ... لم اعد ادخل المكان مره اخرى لان حسيت ان المواصفات ال اتخيلها ال ممكن الواحد يشفها بره
د/ حاتم الجبلى : لا لا وعلى فكره دى فى اكبر المطاهم
مفيد : ايوه انا عارف وعلشان كده ده ال انا عايز اقوله
د/ حاتم الجبلى : دى نقطه لاكن اعتقد انه مع الوقت بالثقافه ال حضرتك بتنشرها وال الناس بتتكلم عليها وان الاكل مش كويس بره بيفرض على الناس حد من الالتزام ببعض القواعد
مفيد : لما سئلت حضرتك مين عدوك فى مصر قلت لى اللا مبالاه معرفش ليه تخيلت انك ها تقول لى عدم الوعى
د/ حاتم الجبلى : لا عدم اللامبالاه اكثر من عدم الوعى لان الشعب المصرى واعى قوى لا يعرف يقراء ولا يكتب بعض الناس انما اوعى مما تتخيل مثلا تلاقى يكون عندك بواب راجل بسيط جدا وقدراته على القراءه والكتابه ضعيفه انما كلمه فى السياسه يكلمك واعى
مفيد : صحيح .. الحس السياسى فى مصر عن البسطاء قد يفوق النخبه
د/ حاتم الجبلى : جدا والحس الاجتماعى جدا احنا الوعى عندنا لا .. الوعى عندنا ضعف فى حاجات ..ليه بقى الوعى بالصحه العامه , الوعى بالنظافه العامه وال بدء به حديثنا دى بقى محتاجه نهتم بها ثانى احنا زمان لو تفتكر الكراسات فى المدرسه به مربع يقول لك غسيل الايدى ومش عارف ايه
مفيد : هو ده اتلغى ؟
د/ حاتم الجبلى : ما بشفهوش لا انا مشفتش كراسه من زمان بس مش فاكر ان كان موجود ولا لا
لمشاهدة الحلقة كاملة "فيديو"