ركّزي في التجربة الجديدة.. ولا تبحثي عن "كامل الأوصاف"

أنا كنت أعرف ولد على النت، وحبيت شخصيته جدا جدا، هو كان صريح جدا ومؤدّب، وبيحبّني أوي، بس ما كناش بنتقابل خالص، اتقدّم لي بس أهلي رفضوه؛ عشان هو من بلد تانية، وما نعرفش عنه حاجة، وعلشان جالي عريس كويس ومن عيلة معروفة، ومؤدّب ومحترم.
وافقت إني أشوفه، واتقابلنا، وحسيت بارتياح له شوية، وقعدنا مع بعض 3 أيام، وسافر لشغله في الكويت، وكانت وسيلة الاتصال اللي بينا النت والتليفون للتعرّف على بعض، قال إنه حبّني جدا، وإنه بيحمد ربنا إن ربنا كرمه بيّ، هو كان خاطب قبل كده، بس قال لي إنها أسوأ فترات حياته، وإنه نادم على ده.
المشكلة إني مش لاقية فيه الصراحة المتناهية الموجودة عند الأولاني، ولا بيصرّح لي بمشاعره؛ يعني تقيييييل جدا، بعكس اللي كنت باشوفه مِن الأولاني.. أنا مش عاوزة أقارن وبس.. بس عاوزة الصفات اللي بحب ألاقيها فيه؛ حبه ليّ، ولهفته عليّ تبان؛ يعني ممكن يقعد يومين ما يكلمنيش، ولو رنيت عليه يقعد ساعتين لحد ما يرد لي الرنة.. هل ده بسبب البُعد ما بينا؟؟ طب ما أنا كنت بعيدة عن الأولاني، بس كنت مرتاحة معاه؟!! وكمان هو ما بيعرفش يعبّر عن مشاعره ولا باعرف أفضفض له، بيقول لي: معلش أنا ما باعرفش أعبّر كويس!!
قولوا لي أعمل إيه.. أفسخ خطوبتي على أمل إني ألاقي الأحسن منه واللي يفهمني، ويحس بيّ بجد؟!! ولّا أستنى على أمل إنه يتغيّر أو إن الجواز يصحّي كل ده جواه؟
z.shayma

لو عايز تفضفض لنا دوس هنا