أنا فتاة أبلغ من العمر 23 سنة مرت عليّ تجربة قاسية جداً جعلتني أخذ الحذر من أي شاب يريد التقرب مني حتى لو كان التقرب ده عن طريق الخطوبة. ولكن بعد الفترة اللي مرت عليّ من علاقتي الأولى جعلتني أنتقم لنفسي من أي واحد كان بيتقرّب ليّ كنت أخليه يحبني أوي وأنا اللي ما أكملش معاه، حسيت بنفسي مرة واتنين قلت أنا جات ليّ حالة نفسية اتقربت من ربنا الفترة دي والحمد لله هداني. لكن أنا مجال شغلي كله في النت اتعرفت بشخص من 9 شهور بالظبط، وكل يوم نتكلم اتعرفنا ببعض كتير لدرجة إني كنت بتضايق لو ما كلمنيش في يوم لاحظت اهتمامي بيه وإني اتعلقت بيه كتير، وهو قال لي الكلام ده فعلاً وقال لي إنه معجب بيّ وبشخصيتي المهم حبينا بعض بس هو مسافر بره واتفقنا لما ينزل هنتقابل العلاقة بينا كانت كويسة جداً..
لكن في الفترة الأخيرة قال لي إن النت عنده بيفصل وبايظ بصراحة لما بشك في حاجة لازم أتأكد منها وده فعلاً اللي حصل عملت ميل باسم تاني وكلمته لاقيته بيتكلم مع الشخصية التانية اللي هي في نفس الوقت أنا. فضل الموضوع كده أسبوع ما كلمنيش إلا مرة واحدة بصراحة ما قدرتش أستحمل قلت له وبعت له رسالة على الإيميل فيها كل حاجة قال لي والله أنا كنت باحاول أبعد الفترة دي؛ علشان أنا لاحظت إننا اتقربنا من بعض الفترة اللي فاتت وأنا خايف من الظروف لا تفرق بينا وبصراحة لما بعدت عرفت أنا بحبك أد إيه وما قدرش أبعد عنك وسامحيني.
بصراحة كنت زعلانة جداً من اللي حصل ما كلمتوش تاني من وقتها وهو كل يوم يبعت ليّ رسايل ويتصل بيّ، لكن أنا خايفة وحاليا في واحد متقدّم ليّ هو شخصية كويسة وطيب وبيحبني، لكن أنا اللي خايفة إني أوافق عليه وأظلمه معايا يا ريت تردوا عليّ؟؟