عزومة سهلة وأكلات سريعة التحضير على "سفرة دايمة"

عزومة النهارده اهتمينا إن كل وصفاتها تكون سهلة وبسيطة وأي حد مبتدئ في المطبخ ممكن يعملها بمنتهى السهولة...
وده بناء على طلب كتير من أصدقائنا، وخاصة الشباب المغتربين اللي بيتابعوا وصفاتنا، ونِفسهم يدخلوا المطبخ علشان يعملوا أحلى الأكلات وفي نفس الوقت ما تاخدش منهم وقت كبير...
أتمنّى إن عزومة النهارده تكون سهلة وبسيطة على كل الناس، وتقدروا تجرّبوها...

*******************
عند التقديم ممكن نزيّنها بالبقدونس المفروم
سلطة البطاطس بالزبادي
المقادير:
* 2 ثمرة بطاطس مسلوقة ومقشرة
* 2 ملعقة خل
* كوب زبادي
* ملح
الطريقة:
1- تبرّد البطاطس بالماء بعد ما تتسلق، وبعد كده نقطّعها لشرائح صغيرة، ونضيف عليها الزبادي والخل والملح، وبعد كده نشيل السلطة في الثلاجة، وعند التقديم ممكن نزيّنها بالبقدونس المفروم.. وبالهنا والشفا.

*******************
ممكن نقدّم معاها بعض قطع الخبز المحمّص
شوربة بالشوفان
المقادير:
* كيس شوربة جاهزة "موجودة في السوبر ماركت"
* 3 ملاعق لبن بودرة
* 3 ملاعق شوفان
* 2 كوب ماء ساخن
* 1/4 كوب كريمة طبخ
الطريقة:
1- نضرب كل المكوّنات في الخلاط، لغاية ما نحصل على خليط متجانس، وبعد كده نصب كل المكوّنات في إناء ونحطّه على النار، مع التقليب من وقت للتاني، ونسيبها على النار لمدة 10 دقايق أو لغاية ما الشوربة تغلي.
2- بعد كده ممكن نضيف بعض قطع الفراخ المقطّعة والمسلوقة، ونصبّها في أطباق الشوربة، وممكن نقدّم معاها بعض قطع الخبز المحمّص.

*******************
ممكن نقدّم معاها بطاطس محمّرة أو مكرونة مسلوقة
فراخ مقلية بالكورن فليكس
المقادير:
* صدور وأوراك فراخ مع العظم
* 1/2 ملعقة صغيرة فلفل حامي
* 2 كوب كورن فليكس
* ملح وفلفل أسود
* زيت زيتون
* بيضة
الطريقة:
1- نغسل قطع الفراخ كويس جداً، ونسيبها لغاية ما تنشف، وبعد كده نتبّلها بالملح والفلفل.
2- بعد كده نضرب البيضة كويس مع كمية صغيرة جداً من المية.
3- نخلط الكورن فليكس مع زيت الزيتون والفلفل الحامي مع كمية صغيرة من الملح.
4- بعد كده نجيب الفراخ، ونحطّها في البيض، وبعد كده نغطّيها بخليط الكورن فليكس من كل الجوانب.
5- نرص الفراخ في صينية، وندخلها في فرن ساخن لمدة 30 دقيقة لغاية ما تتحمّر أو لونها يبقى ذهبي، وممكن نقدّم معاها بطاطس محمّرة أو مكرونة مسلوقة.. وبالهنا والشفا.

*******************
لو عايزين قوامه يبقى شبه الآيس كريم ممكن نحطه في الفريزر
بودنج إكسبريس
المقادير:
* بيضة لكل فرد
* ملعقة كبيرة سكر لكل بيضة
* فانيليا
* كوب كريمة طبخ لكل بيضتين "موجودة في أي سوبر ماركت"
الطريقة:
1- نجيب إناء به كمية من الماء ونضعه على النار، ونضع فوقه إناء تاني أصغر منه؛ بحيث إنه يدخل في الإناء الأول، ويغطيه تماماً علشان يحبس الحرارة والبخار، ونبدأ نخلط فيه البيض والسكر والفانيليا كويس جداً بمضرب البيض، وهما على النار لغاية ما قوامهم يبقى ناعم جداً زي الكريمة، وبعد كده نضيف كريمة الطبخ مع الاستمرار في التقليب فوق الحمام المائي لمدة خمس دقايق لغاية ما البودنج يستوي.
2- بعد كده نصبه في أكواب صغيرة، ونسيبه يبرد شوية، وبعد كده نشيله في الثلاجة، ولو عايزين قوامه يبقى شبه الآيس كريم ممكن نحطه في الفريزر.. وبالهنا والشفا.

وبكده تكون خلصت عزومتنا النهارده
أتمنى إنها تكون عجبتكم
وتجرّبوا كل الوصفات اللي قدّمناها
وتبعتوا تقولوا لي النتيجة كانت إيه
*********************
للتعرف على مزيد من الوصفات الشهية
اضغط هنا "سفرة دايمة"
*********************