كرويات.. مين بيحب البدري.. ومين بيكره شيكابالا؟!

سلام عليكم مليء بالاحترام والتمام..
السؤال عنوان المقالة محتاجين من معاليكم الإجابة عليه.. بكل هدوء وتركيز.. بدون خروج عن المألوف أو تجني.. مين بيحب البدري.. ومين بيكره شيكابالا؟!!
وقبل الإجابة.. واجبكم عليّ أن أشرح لكم بعض النقاط.. عشّاق الفانلة الحمراء فاض بهم الكيل خلاص، وأصبحت روحهم في الحلقوم -حلوة الحلقوم دي- وأصبحوا "قرفانين آخر قرف" من استمرار حسام البدري كمدير فني للأهلي، برغم الحالة المزرية التي أصبح عليها الفريق، وهم لا يعرفون سبباً وراء استمرار "هذا البدري" الذي يقولون إنه تولّى المنصب "بَدْرِي"، وأنه لم يحسم أموره جيّداً، فجاء المقعد واسعاً عليه، وغرق فيه حتى أذنيه، ويتساءل عشّاق الأحمر: إلى متى سيظلّ البدري مستمراً؟!! ومَن هو حتى يبقى هكذا بدون رادع أو محاسب أو قاطع طريق عليه؟!!

إن هذا البدري الذي تولّى الأمور فجأة -على ملا وشه- (كما يقولون في العامية)، جاء من كندا لا يعلم شيئاً، إلا أن لجنة الكرة فشلت في استقدام مدير فني محترم أجنبي، وجاء هروب "فينجادا" -سامحه الله- ليتولّى البدري المهمة، وهو كان لا يحلم بها. ولأن لاعب الأهلي السابق اصطدم بالدوري فلم يستطِع أن يجدد الفريق أو يدعم صفوفه كما كان يفعل البرتغالي الأسطورة مانويل جوزيه، والذي كان يقوم بعمل سحر للإدارة؛ فتفتَح له مغارات "علي بابا" ليغرف منها، وينتقي اللاعبين كما ينتقي جواربه وكرفتاته وقمصانه، طبعاً فهذا هو المدعو البدري صاحب البشرة السمراء.. أما هذا فهو الخواجة!!
والغريب أن "هذا البدري" حقّق للأهلي أرخص بطولة دوري عام منذ أكثر من خمسة عشر عاماً، ومِشيِت معاه الأمور ووصل لنهائي الكأس، لأ ووصل لدور الثمانية في دوري الأبطال الإفريقي، وكمان جاب سوبر محلي، أيوه ما هو محظوظ.. لا وفي الآخر يزعل إن فيه ناس بتقلب الجمهور عليه.. يا سلام يعني هو فاكر إن فيه حد بيحبّه؟! طب ويحبّوه على إيه؟ أليس هو البدري الذي حصل على كوكبة من النجوم التي أصبحت غير صالحة للعب بعد فشلها الذريع في الخارج؟!! فجاءت "تصنفر" في الأهلي من أجل استعادة البريق الضائع، وفيها إيه إن لجنة الكرة لم تستطِع ضم اللاعبين الذين اختارهم، ما هو الغلطان مش كسب بالشباب إيه اللي يخليه يطلب، ما يحط لسانه في بقه ويسكت!
غريب هو أمر "هذا البدرررري".. يا ترى مين بيحب البدرررري؟
طب ومين بيكره شيكابالا؟!!!
أنا كمان مش عارف إيه الحرب الشرسة دي على "الواد" الغلبان محمود عبد الرازق (شيكابالا)، اللي عقده بتسعة عشر مليون جنيه بس؟! عايزين يخرّجوا الولد عن شعوره بشكل فيه مخطط لإسقاطه واستبعاده من أي انتخابات برلمانية جاية، كما هو متوقّع زي أصحابه: معتمد جمال، وطارق السيد، وعبد الستار صبري، وغيرهم... بصراحة الظاهر إن فيه مخطط أهلاوي وراء تشويه ال"شيكا".
فيها إيه لمّا شيكابالا كان بيعمل حركات البطة أمام الكاميرا لبنت أخته؟!! خصوصاً إنه قاعد قبل الماتش بيحكي لها حكاية البطة المشمشية بتاعت اللمبي، الناس فسّرتها غلط، وإنه بيشاور إشارات ذات معنى آخر لمسئول زملكاوي!! لأ وإيه تفكيرهم المريض قال إن شيكابالا اعتذر للمسؤل، ليه هو أصلاً عمل حاجة من الأساس؟!
هو عشان مرة رفع الحذاء الغالي بتاعه لجمهور الزمالك، ومرة لجمهور الأهلي يعني عمل جرم؟! يعني الراجل عايز الجمهور يشاركه في الفرحة بشراء "كوتشي" جديد للعيد في المرة الأولى، ولما الجمهور اقترح عليه شكل تاني، رفعه "الكوتشي" عشان يعرّف الناس إنه بيسمع كلامهم، ياااااااه.. خير تعمل شر تلقى صحيح!!
يا عالم سيبوا شيكابالا في حاله.. واسألوا أنفسكم هو فيه حد ما بيحبّش "شيكا"؟!