باسم شرف : يسقط يسقط حكم البنجر.. ( من صفحات المجلس وميكي ماوس السرية )

قابلت طفلا يسير بالشارع يملك من العمر عشرة أعوام .. متضايقا .. اقتربت منه وسألته :
- مالك ؟
- رحت أبدل إزازة حاجة ساقعة من البقال قالي إنه عايز رهن مع إن الإزازة بتاعتي .. فمشيت من غير ما أبدلها .. وأمي هتضربني
- متزعلش أنا هاجيبلك إزازة تانية ومن غير رهن كمان ..
- بقولك إيه إنت مش شغال كاتب .. ؟ احكيلي حدوتة أسمعها وانا بشرب الازازة اللي هتجبهالي
لقد أحرجني الطفل .. أنا لا أحفظ الحكايات .. ولكني تذكرت آخر إيميل أرسله لي ميكي ماوس يحكي فيه صفحة من مذكراته عندما زار مدينة البط وشعر بخوف شديد .. سأحكيها له .. اسمع يا سيدي : (كان يا ماكان ..كان فيه مدينة اسمها مدينة البط .. المدينة دي كان فيها ظلم كتير وكان ليها رئيس حرامي بيسرق بيض البط ويبعه بره المدينة .. البيض اللي هيجيبلهم بط صغير يلعب حواليهم ويبقوا سند ليهم لما يكبرو ويعجزو . وبسبب ظلمه الكتير عملوا ثورة ضده وحبسوه .. .
المدينة اتبسطت كتير قوي بعد ما مشي البط الحرامي .. وقرروا إنهم يبنوا عشش صغيرة لأولادهم الصغيرين .. عشان يحطوا فيها خزين الشتا والصيف خوف من هجوم الديابة عليهم و الكلاب المفترسة .. لكن كان عندهم مشكلة كبيرة .. إن فيه أراضي وسط المدينة مزروع فيها جرجير وبنجر .. وكان الجرجير والبنجر شغالين خباصين علي أهل البط الطيب لحساب رئيس البط الحرامي ومش بس كده كانوا بيسببوا قلق ليهم ..
مرة مثلا خرجت بطة تشتري شوية بنجر عشان تعمل برطمان مخلل وتحطه مع اللفت وتسيبه ستين سنة عشان المخلل يطلع حادق ومستوي .. زي ما امها البطة الكبيرة كانت بتقولها .. و اتفقت مع البنجر انه يقعد في البرطمان .. بما ان البنجر كان لئيم فكان بيتجسس علي كلامها هي وعيالها وفي مرة سمع البط بيقول عايزين البط الحرامي يسيب ولادنا تعيش.. ليه بيخطفوا البيض بتاعنا ويبعوه .. ؟ خرج البنجر بسرعة من وراهم من البرطمان وبلغ البط الحرامي وقبضوا علي جدها البط ابوسميرة وحبسوه لحد ما مات ..
وبعد ما اتحبس البط الحرامي فضل البنجر عامل قلق وأقنع البط إنه حبس البط الحرامي .. وعشان بأكد كلامه استعان بحزم الجرجير المسوسين مع إنهم كانوا علي خلاف أيام الحرامي لكن اتفقوا عشان يفضلوا موجودين... وحصل اتفاق علي إن الحياة لو استقرت في حياة البط هيتلغي شغل البنجر ويرجع يتزرع في الأرض ويشتغل مخلل بس .. بعد ما كان ليه شنة ورنة .. في مقابل إنه يسيب حتت من الأراضي لجزم الجرجير .. وجابوا كام شخصية من بتوع الحرامي اللي شغالين في التلفزيون بتاع المدينة .. زي عكاشة البطة .. والمساعد بتاعه زبيادر مقشة ..والمهم انهم بيسمعو الكلام .ويدافعوا عنهم .
- زعيم البنجر : هما مش بيطالبوا بقانون للبط عشان يحميهم من سرقة البيض بتاعهم ؟
- زعيم الجرجير : اه .. إيه اللي في دماغك وأنا تحت أمرك يا كبير..
زعيم البنجر : أنا هعمل استفتاء علي القانون ويوافقوا عليه من خلالكم ونعطلهم حبة لحد ما نظبط شغلانة جديدة .. ودي لعبتك كلام بقي وكده ..
راح زعيم الجرجير ورجع وقاله: خلاص وافقوا .. وقعدوا يتخانقوا مين اللي صح ومين اللي غلط ..
- كويس .. عايزين بقي نفهمهم إننا ناخد البيض بتاعهم نخزنه بعيد عن القلق ده بدل ما يتكسر وولادهم يضيعوا
راح زعيم الجرجير ورجع قاله : حصل با باشا بس هما عاملين قلق ..
- شوية وهيهدوا
- هو انت هتشيله فين ؟
- مش شغلك .. ليك حتة الأرض وتسكت ..
.القلق هياكل الناس .. حاسين بخوف من حاجة مش عارفينها . فبدأو يتجمعو عشان يروحوا ويسألوا علي ولادهم قابلهم زعيم البنجر وطمنهم وقالهم إنهم بخير .. ورجعوا.. لكن وهما في الطريق واحد قالهم ..أنا قلقان .. كان لازم نشوفهم و نتطمن بنفسنا .. رد واحد تاني قاله معاك حق .. قررو يرجعوا تاني .. وفضلوا يطالبوا بإنهم يشوفوا عيالهم .. ولما رفض زعيم البنجر قعدوا يدوروا علي المكان اللي ممكن يكون فيه عيالهم .. واكتشفوا إنهم ورا سور رملي كبير .. طب يعملوا إيه ؟ يعملوا إيه ؟ البط مش بيطير ومش قوي إنه يدخل براسه يهد السور .. بعد شوية اقترح عليهم واحد إنهم يتجمعوا وبخبطه بجناحهم في الهوا مع بعض هيقع السور لأن قوة الهوا قد قوة الدرعات يلاااا .. 1 – 2 – 3- .. هوبااااا وخبطوا بجناحتهم خبطة رجل واحد فوقع السور وشافوا عيالهم .. وخدوهم وحلفوا ما يفرطوا في عيالهم لحد تاني حتي لو حلف .. وهما راجعين فضلوا يهتفوا يسقط يسقط حكم البنجر يسقط يسقط حكم البنجر ..)
قبل أن اختم له الحكاية تركني وأسرع يجوب المدينة ويهتف يسقط يسقط حكم البنجر ..
دون ان أخبره أنها حكاية كرتونية .. ووجدت نفسي اهتف يسقط يسقط حكم البنجر ..وجبتله الازازة ومن غير رهن ..
Basemsharf13@yahoo.com