حنان العسيلي تكتب.. الرئيس الصيني

الصين بكل منتجاتها ،حققت نجاح كبير جدًا في مصر ،ومش في مصر بس ..نقدر نقول كده إن الغزو الصيني استعمر في معظم دول العالم ،وده لأسباب كتير ..أهمها إنه ما بيلزقش ،يعني منتج خفيف وأسعاره في متناول اليد ،ونقدر نتخلص منه في أي وقت ومن غير خساير .
المنتج الجديد اللي بتقدمه شركة "الهلال والنجمة"الصينية ،"الرئيس الصيني"،والمنتج ده هينجح وباكتساح في كل الدول العربية ،بعد ما شفنا قد إيه تعبنا علشان نشيل بن علي ،مبارك ،القذافي،ولسه برضه فيه ناس لازقين مش عارفين نشيلهم من كراسيهم،المنتج اللي بتقدمه الشركة هيوفر الحماية والأمان والاستقرار لكل الدول العربية ،ومعاه كمان شهادة ضمان لمدة 3 سنين .
تعالوا بقى نشوف ميزات المنتج الجديد اللي نازل لمصر:
-ما بيلزقش ..وحط 10000000000000 خط تحت ما بيلزقش !!.
-حساس جدًا؛ ولو حس مجرد إحساس إن شعبه مش عايزه ممكن يُصاب بحالة اكتئاب، وبأنيميا حادة.
- بيفهم عربي كويس ..يعني لو قلتوا له ارحل ..هيفهم إن معناها إمشي ..وسيب الكرسي يا مرسي.
-ديمقراطي لأبعد حد ؛لدرجة إنه ما عندوش مانع إن مقال زي اللي بيتكتب دلوقتي، يتكتب عنه؛ ويقراه بسعة صدر .
-ضميره حي ،وما يرضاش بالظلم لحد أبدًا ..مستحيل يغير جو في شرم ،لو عرف إن حد من شعبه واخد على خاطره منه.
-بيكره الستات ،يعني مش متزوج ولا عنده أولاد ..وده يضمن لحضراتكم إن مافيش جيمي ولا علاء ممكن ياخدوا الكرسي ،بعد ما ربنا ياخد أجل سيادته.
-لو حد من الوزرا اللي معينهم قصر في واجباته تجاه الشعب ..بيعلقه في" الفلكة"، وبيمده على رجليه في ميدان التحرير.
-لو أي حد من شعبه اتقدم ليه بشكوى، إنه مش عارف يخرج ويصيف السنة دي مع المدام والأولاد ..ممكن يصاب بذبحة صدرية من كتر الزعل.
-لو أي حد تاني من نفس الشعب برضه عنده مشكلة في إنه يوفر لنفسه أو لعائلته لو كان بيعول ..الباتيه أو الكورن فليكس علشان الفطار ،ممكن نفس سيادته تتسد خالص عن الأكل وعينيه ما تنشفش من العياط؛ غير لما يطمن على أوضاع الباتيه والكورن فليكس في البلد.
قلبه رقيق وحنين.. زي بكار كده بالظبط.
-أي انتخابات بتحصل في البلد في عهده لاااااااازم تكون شريفة ونزيهة ..يعني مش هنشوف الانتخابات شريفة وبس، لأ وكمان هنشوف نزيهة!.
-مش محتاج لقصر رئاسة ..مكن تحطه في أي قسم من أقسام الشرطة الراقية ،وبالمرة ياخد فكرة عن اللي بيحصل في أقسام الشرطة ،علشان يوم ما الشعب يقول له مش عايزينك .ما يقولش ما كنتش أعرف والله إن كل ده بيحصل لكم ..سامحوني يا ولاد.
-ما بيحبش يسمع كلمة آسف ..بتثير أعصايه وبتحوله لوحش كاسر ..والكلام ده تحذير لجماعة "آسفين يا ريس"،وانتوا فاهمين بقى.
-ما بيحبش طلعت زكريا ..يعني لو فضل يمثل في عهده هيُعتقل، أو هيتم فقع عيون سيادته!.
-ما بيحبش الكنتاكي ،وما بيحبش يشوف عساكر أمن الدولة وهم بياكلوه في ميدان التحرير ..ولا بيحب يشوف عساكر أمن الدولة في ميدان التحرير بالمرة !.
-ما بيحبش الأحزاب ولا الائتلافات ولا الجماعات ولا بيحب البشر من الأساس!
-مخلص لبلده ..يعني مش هنسمع عن أي حركات من اللي كانت بتحصل أيام المخلوع مع إسرائيل وغيرها ،وإسرائيل كمان بتكرهه موووووت.
-لما النائب بتاعه يظهر في أي خطاب عنه ،مش هنلاقي حد واقف وراه ،وده يضمن لحضراتكم إن مافيش صفحات هتنتشر على الفيسبوك وغيره من المواقع اسمها الراجل اللي واقف ورا فلان الفلاني ،وبكده مش هتحصل أي مشاكل ولا خناقات بين الناس.
الرئيس الصيني باختصار ....ملاك نازل من السما ومعاه شوية ملايكة.
-تاريخ صلاحيته مش بيستمر لأكتر من 3 سنين؛وده يضمن لحضراتكم إنكم مش هتحتاجوا تعملوا أي ثورات ،ولا اعتصامات ..لأنه تلقائيًا هيكون انتهى من نفسه بعد المدة الزمنية المحددة على المنتج.
-أما السعر بقى فدي مفاجأة العرض ..اتصلوا على 000000وهتعرفوا إزاي يوصلكم المنتج وانتوا في بلدكم ،والسعر مفاجأة وفيه هدية رئيس صيني زيادة مجانًا مع أول عشر متصلين هيشتروا المنتج.
شركة الهلال والنجمة..مع الرئيس الصيني ..وداعًا للزقة ..وداعًا للديكتاتورية .