فكر ثواني.. تكسب ثواب

رمضان جه بعد طول انتظار.. وفي الشهر الكريم ده بنحب نكتر من العبادات والتقرب إلى الله..

نيتنا قبل الشهر ما يبدأ، أننا هنعمل كل حاجة.. هنقراء أجزاء كثيرة من القرآن.. وهنزود صلاتنا ونحسنها.. وهنزور ملاجئ للأيتام ونعمل خير هناك..

مش كده وبس بنقرر مع دخول الشهر إننا لازم ننزل نصلي التراويح، ونشارك في جمعية ولا اتنين نعمل معاهم شنط رمضان.. وغيرها كتير من الخطط الممتازة اللي كلنا بنعدّها لرمضان..

المشكلة بقى إن أغلبنا ما بيقدرش ينفّذ كل ده.. بندخل في دوامة.. الشغل.. المواصلات.. وقت رمضان بيعدي بسرعة... ونلاقي الشهر خلص من غير ما نعمل حاجة..
علشان كده فكرنا نكسب ثواب سوا.. إزاي؟!
كل يوم هنحدد حاجات بسيطة مافيهاش ضغط كبير.. ونعملها مع بعضينا، وهنيجي هنا ونحكي عملنا إيه، وشعورنا كان إيه علشان نشجع غيرنا.. وكمان هنقترح على بعض أفكار جديدة نقدر نعملها كل يوم..

وبكده نكسب ثواب الفعل وثواب النصيحة على فعل الخير..

وما نخرجش من رمضان من غير ما نعمل حاجة مفيدة لينا ولغيرنا..


*******************************



ثوابت يتم عملها يومياً
* وإحنا بنصلي الفروض الخمسة النهارده، وبعد ما ننهي الفرض، هنسبح (سبحان الله) 33 مرة ونحمد (الحمد الله) 33 مرة، ونكبّر (الله أكبر) 33 مرة، بكدة نبقى اتعودنا نختم صلاتنا في رمضان.
* هنحفظ النهارده آية واحدة بس من المصحف، قبل ما تنام اكتبها في ورقة ملاحظات صغيرة وخليها معاك طول اليوم، رددها وأنت في المواصلات وأنت في البريك في الشغل قبل ما تنام رددها أكتر من مرة، هتلاقي نفسك حفظتها تلقائي.. وما تقللش من فكرة كونها آية واحدة بس، كتير منا مش حافظين تقريباً حاجة، أو كنا حافظين ونسينا مع قلة المراجعة، علشان كده لما نجدد حفظنا ب30 آية من القرآن رمضان ده.. هتبقى حاجة حلوة وهيفضل لساننا طول اليوم رطب بذكر الله وإحنا بنردد الآية علشان نحفظها.


*******************************

أفعال متغيرة يوميًا

اليوم الثلاثون
كل سنة وأنتم طيبين!
النهارده آخر أيام رمضان، علشان كده هنعمل النهارده دمج لكل اللي عملناه سوا طول الشهر.. هنسبّح ونحمِد ونكبّر، وهنحفظ آية..
هنطلّع صدقة، وهنصل رحم، وهنسمع الأذان ونردّد وراه، ونحسن الوضوء، ونحسن صلاتنا..
مش هنكذب، وهنبطّل عادة سيئة مضايقانا، هنبعت نعيّد على جيراننا وأصحابنا، وهننسى الخلافات..
وهنقرأ حديث شريف ونفكّر في معناه، ونتعلم عبرة من سيرة صحابي..
وطبعاً هنسجد شكر لربنا إنه بلغنا رمضان، وندعوه إنه يتقبل منا..

وكل سنة وأنتم طيبين، وربنا يعيد علينا الأيام الحلوة دي تاني بالخير..
وطبعًا هنقولكم "عيّدوا معانا"



*******************************

لو عايز تتابع الحلقات (1-5) من فكر ثواني.. تكسب ثواب (اضغط هنا)

لو عايز تتابع الحلقات (6-10) من فكر ثواني.. تكسب ثواب (اضغط هنا)
لو عايز تتابع الحلقات (11-15) من فكر ثواني.. تكسب ثواب (اضغط هنا)

لو عايز تتابع الحلقات (16-20) من فكر ثواني.. تكسب ثواب (اضغط هنا)

لو عايز تتابع الحلقات (21-25) من فكر ثواني.. تكسب ثواب (اضغط هنا)

******************************

لو عايز تفكر ثواني.. وتكسب معلومة (اضغط هنا)

*******************************

الليلة دي هنصلي على قد ما نقدر وهندعي كتير ونبتهل لربنا
اليوم السادس والعشرون

ناس كتير بتعتقد إن الليلة هي ليلة القدر، والحقيقة إن موضوع سبعة وعشرين ده غير مؤكد، المؤكد أنها ليلة فردية..

ولكن رغم كده فإيه المانع إننا نحيي الليلة، فهي ليلة من رمضان في الأساس، وليلة فردية على الخصوص، ولها في قلوب المسلمين عبر العالم الكثير..

علشان كده النهارده، لو كنت مشغول بعد الظهر أجّل انشغالك، لو وراك عزومة غيّر ميعادها، لو كنت بتتابع برامج في التليفزيون فبلاش النهارده..

خلي النهارده ليلة صافية جداً هنصلي على قد ما نقدر وهندعي كتير ونبتهل لربنا..

وهنسبّح ونحمد ونكبّر، ونقرأ أجزاء من القرآن طبعاً.. ومش هننسى إننا وإحنا بنصلي التراويح هندعي زيادة شوية.. وزي ما بنعمل في كل ليلة فردية هنصلي التهجّد الليلة دي..

وهنكتّر من دعاء ليلة القدر "اللهم إنك عفوّ تحب العفو فاعفُ عني" كتير أوي النهارده..

وطبعاً زي ما إحنا عارفين ليلة القدر مش بتطلع على متشاحنين أو ناس متخانقة أو بينها خصام، لو بينك وبين أي حد مشكلة لازم تنهيها النهارده وابدأ اليوم بقلب صافي..

وإن شاء الله ربنا يبلّغنا ليلة القدر..

قولوا آمين.

*******************************

كم مرة نسبنا للرسول أقوالاً خطأ
اليوم السابع والعشرون

الحقيقة إن في حياتنا أقوال كتير خاطئة، وبنظن إنها أحاديث عن الرسول، بعضها أقوال مأثورة أو لبعض الصحابة وبعضها نسبت للرسول، ولكن بالبحث عنها نجد أنها أحاديث موضوعة أو ضعيفة..

كم مرة سمعت هذه الأقوال ونسبتها للرسول؟؟

- اعمل لدنياك كأنك تعيش أبدا، واعمل لآخرتك كأنك تموت غدا.

- الساكت عن الحق شيطان أخرس.

- إن الله لا ينظر إلى الصف الأعوج.

- إن الله يزع بالسلطان ما لا يزع بالقرآن.

- رجعنا من الجهاد الأصغر إلى الجهاد الأكبر.

- أصحابي كالنجوم, بأيهم اقتديتم اهتديتم.

- من حج ولم يزرني فقد جفاني.

- ما خاب من استخار, ولا ندم من استشار, ولا عال من اقتصد.

- نحن قوم لا نأكل حتى نجوع، وإذا أكلنا لا نشبع.

- يحشر قوم من أمتي يوم القيامة على منابر من نور, يمرون على الصراط كالبرق الخاطف, نورهم تشخص منه الأبصار لا هم بالأنبياء, ولا هم بصديقين, ولا شهداء. إنهم قوم تُقضى على أيديهم حوائج الناس.

- يأتي زمان على أمتي يحبون خمسا، وينسون خمسا: يحبون الدنيا، وينسون الآخرة، يحبون المال، وينسون الحساب، يحبون المخلوق، وينسون الخالق، يحبون القصور، وينسون القبور، يحبون المعصية، وينسون التوبة، فإن كان الأمر كذلك ابتلاهم الله بالغلاء، والوباء، وموت الفجأة، وجور الحكام.

- رحم الله امرأ أهدى إلينا عيوبنا.

وغيرها كثير، فللأسف إحنا أي مقولة بتعجبنا ويقال عنها إنها منسوبة للرسول مش بنعمل أي مجهود علشان نعرف الحقيقة مع إن الموضوع ده بقى سهل جداً خاصة مع انتشار النت، وببحث بسيط تقدر تعرف إذا كان الحديث صحيح ولا لا..

وعلشان كده النهارده ثوابنا هيكون إننا نعرّف المحيطين بينا ببعض الأقوال دي ونوضّح لهم فكرة التأكد من صحة ما ينسب للرسول بعد كده..

يعني النهارده لما تقابل زمايلك في الشغل أو المدرسة، لما تقعد ما ماما وبابا أو أولادك قبل الفطار، وضّح لهم النقطة دي وتبقى كده كسب ثواب كبير بإذن الله.

وطبعاً وعندك معرفة بأقوال تانية غير دي يا ريت تشاركنا بيها ونبقى كلنا استفدنا.

*******************************

فكرت إن فيه ناس مش هتقدر تجيب كحك في العيد؟
اليوم الثامن والعشرون
جبت كحك العيد؟؟ أكيد جبته..
طبعاً كلنا بنستنى الكحك من العيد للعيد.. سواء كنا بنشتريه أو بنعمله..
فإحنا بنجهّز له من دلوقتي..
طيب لو كنت لسه شاب صغير ومالكش في شراء الكحك فأكيد ظبّط أمورك علشان تجيب بلالين أو تخرج مع أصحابك أو تروح السينما.. عيد بقى وكل سنة وأنت طيب..
طيب سواء كنت رب الأسرة أو الشاب فكرت إن فيه ناس مش هتقدر تجيب كحك ومش هتقدر تتفسح في العيد ويمكن حتى مش هيلاقوا أكل اليوم ده بعد ما موائد الرحمن قفلت؟؟
فكرت إنك هتبقى سعيد في العيد وهما لا..
طيب ليه ما تجيش نعمل سوا حاجة بسيطة.. ناخد من المبلغ اللي إحنا عاملينه للكحك أو للفسح 10% بس..
يعني لو هتجيب –على سبيل المثال- كحك ب100 جنيه، خذ منهم 10 جنيه وجيب كحك ب90 جنيه بس، والعشرة جنيه اديها لأسرة بسيطة تدخل عليهم فرحة العيد..
ولو هتتفسح ب10 جنيه -على سبيل المثال- خد منها جنيه واحد واتفسح بتسعه جنيه وادّي الجنيه ده لطفل أو شاب زيك نفسه هو كمان يشعر بالعيد..
إنت مش هينقص عندك كتير، ولكن هو هيشعر أن العيد بالنسبة له مختلف..
وإن شاء الله هتكسب ثواب كبير.

*******************************

النهارده هتدخل السرور على الأطفال الصغار..
اليوم التاسع والعشرون

تعالَ معايا خطوة بخطوة كده أقول لك النهارده هنعمل إيه..

النهاره هتشتري عدد من أكياس الهدايا الملونة على حسب مقدرتك إن شاء الله 5 أكياس فقط.. المهم إنك تشتري..

وهتعدي على السوبر ماركت أو البقال وتجيب منه شوية حلويات..

شوية بونبون وشيكولاتة وبسكويت ولبان وكيك برضه على حسب مقدرتك..

وما تنساش تجيب كام بالونة ملونة..

وهتوزّع الحاجات دي على أكياس الهدايا..

وبما إن النهارده إما إنها ليلة العيد أو الليلة اللي قبلها.. فإنت هتدخل السرور على الأطفال الصغار.. ويا حبذا لو كانوا من أطفال الشوارع تحت الكباري، حسّسهم إنهم لسه أطفال ومن حقهم يفرحوا..

أما لو ماقدرتش فأي أطفال غير متيسّرين حواليك دخّل عليهم الفرحة النهارده.. وإن شاء الله ربنا يجازيك خير..


*******************************