جمالك بالألوان مع جيلان.. تألّقي بالإسدال والعباية في رمضان

كل سنة وإنتم طيبين بمناسبة شهر رمضان الكريم..
بناءً على طلبكم، النهارده هاقدّم لكم مجموعة من الموديلات اللي ممكن نلبسها في شهر رمضان الكريم، بحيث إننا نغيّر من الإستايل بتاعنا، ويبقى لنا طلّة جديدة مناسبة مع الشهر الكريم...
* إسدال تركواز × أبيض:
النهارده هنتكلّم عن حاجة مهمة جداً، وأكيد موجودة عند كل واحدة سواء كانت محجبة أو مش محجبة وهو إسدال الصلاة..
والإسدال اللي هنشوفه في الفيديو شكله مش تقليدي ولونه تركواز في أبيض، وفيه إمكانية إنك تقدري توسعيه أو تضيقيه من عند الوسط على حسب الشكل اللي إنتِ عايزاه، والموديل ده مريح جداً وعملي.

إضغط لمشاهدة الفيديو:

* إسدال أسود بتطريز على الصدر:
إحنا لسه بنكمّل مع بعض الموديلات اللي ممكن نلبسها في شهر رمضان، ودلوقتي هنعرض شكل تاني للإسدال، والموديل اللي هنشوفه في الفيديو ممكن نعتبره كإسدال أو عباية، وهو لونه أسود، وطبعاً ناس كتير بتفضّل اللون الأسود بالنسبة للإسدالات والعبايات.
والموديل ده ممكن نخرج به لو معزومين على السحور أو على الفطار؛ لأن شكله شيك وبسيط في نفس الوقت، وهو بيناسب كل الأجسام سواء المليانة أو الرفيعة؛ لأن الإسدالات بطبيعتها بتكون واسعة وفضفاضة وبالتالي بتداري عيوب الجسم.
وخامة الإسدال ده ليكرا مع كريب، والصدر مشغول كله بفصوص بألوان مختلفة، والفصوص لونها هادي ومطفي؛ لأنها مغطاة بطبقة من الدانتيل.
وبالنسبة للطرحة فهي متصلة بالإسدال والطرف عليه شريط من نفس ألوان الفصوص.

إضغط لمشاهدة الفيديو:

* إسدال بني برسومات شرقية:
دلوقتي هنشوف إسدال جديد باللون البني، وهو لون مش تقليدي بالنسبة للإسدالات، والإسدال ده بيميّزه إن القماش عليه رسومات شرقية، وهو فكرته لطيفة جداً، وممكن تخرجي به لو معزومة على الفطار أو على السحور؛ لأن شكله مائل شوية لشكل العباية أو التلبيسة.

إضغط لمشاهدة الفيديو:

* عباية مودرن وشيك:
العباية اللي هنشوفها دلوقتي شكلها مش تقليدي عليها تطريز من على الصدر، والكم بتاعها واسع وداخل فيها ألوان تانية مع الأسود زي الرمادي والفوشيا، والألوان المتداخلة دي عاملة لها شكل لطيف جداً.
وطبعاً في ربطة الطرحة دخّلت نفس الألوان اللي موجودة في العباية، وكمان دخّلت إيشارب فيه عقادة من على الطرف، ودي بتعمل شكل شرقي لطيف جداً.
والعباية دي ممكن تلبسيها لو معزومة بره البيت، أو لو هتستقبلي ضيوف في البيت وعايزة حاجة تكون عملية وخفيفة.

إضغط لمشاهدة الفيديو:
وفي النهاية أحب أشكر كل الناس اللي ساعدوني علشان أقدر أقدم لكم حلقة النهارده:
عبايات: محل "ريحانة" - تليفون 0122808115
إيشاربات: محل "scarfobia" - تليفون 0105246632
إكسسوار: مدام مها - تليفون 0125671899 - 0126767583

وفي النهاية أتمنّى إن الموديلات اللي قدّمتها لكم النهارده تكون عجبتكم..
وتابعوني كل أسبوع في رمضان..
علشان هاقدّم لكم موديلات جديدة مناسبة للشهر الكريم..
ومن هنا للأسبوع الجاي..
هاستنى تعليقاتكم ورأيكم في الموديلات اللي قدّمناها...
سلام،،،