عزومة 14 رمضان

عصير الأفوكادو بآيس كريم الفانيليا
العصير ده بجد من العصاير المفيدة جداً، لإن الأفوكادو فاكهة من الفواكه المفيدة جداً واللي بتحتوي على فيتامينات مفيدة جداً للبشرة والشعر..
المقادير:
* 3 ثمرات أفوكادو
* 1/2 كوب سكر
* 3 أكواب لبن
* 1/2 كوب آيس كريم فانيليا
* مكعبات ثلج
الطريقة:
قشري الأفوكادو وشيلي منه البذور، بعد كده قطعيه قطع صغيرة، حطي الأفوكادو في الخلاط وضيفي إليه باقي المقادير واضربيهم مع بعض كويس في الخلاط، بعد كده صبي العصير في كاسات العصير وضيفي إليه مكعبات الثلج.

**********************
شوربة كريمة الفراخ
شوربة كريمة الفراخ
المقادير:
* 1/2 كيلو صدور فراخ مخلية ومقطعة قطعا صغيرة
* علبة زبادي
* 3 معالق دقيق
* 1/2 كوب زبدة
* جزرة مقطعة قطعا صغيرة
* 1/2 كوب حبوب الذرة (حسب الرغبة) "من السوبر ماركت"
* 1/2 مكعب مرقة دجاج
* 3 أكواب مية
* ملح وفلفل أسود
الطريقة:
1- اضربي الزبدة السايحة مع مرقة الدجاج والدقيق والزبادي والمية في الخلاط كويس.
2- حطي الخليط على النار لغاية ما يغلي مع التقليب المستمر، وبعد كده ضيفي إليه قطع الدجاج والجزر والذرة وسيبيه على نار هادية لمدة ربع ساعة أو لغاية ما تحسي إن الشوربة بقت ثقيلة ومتجانسة، بعد كده ضيفي إليها الملح والفلفل الأسود، وبعدين اغرفيها في أطباق الشوربة و معاها قطع توست محمر وليمون حسب الرغبة.

**********************
الثومية
الثومية
المقادير:
* 4 فصوص ثوم مفرومين ناعم
* 3 علب زبادي
* 3 معالق مايونيز
* 1/2 حبة بطاطس مسلوقة ومقشرة ومهروسة
الطريقة:
اخلطي كل المقادير دي مع بعضها وقلبيهم مع بعض كويس وبعد كده حطيهم في طبق السلطة.

**********************
فتة الفراخ بالزبادي
فتة الفراخ بالزبادي
كلنا طبعا عارفين فتة اللحمة العادية، بس الجديد اللي بنقدمه النهارده هو طبق فتة الفراخ وعلى فكرة الطبق ده شامي.
المقادير:
* فرخة كاملة
* 3 أكواب أرز
* 5 خبز شامي
* 2 معلقة كبيرة ثوم مدقوق
* 1/3 كوب خل
* زيت عباد الشمس للقلي
* 7 علب زبادي
* 2 معلقة كبيرة زبدة
* 1/2 كوب لوز
* 1/2 كوب صنوبر
* ملح وفلفل
الطريقة:
1- هاتي الفرخة واغسليها كويس وبعد كده اسلقيها، وبعد ما الفرخة تستوي أخليها من العظم والجلد وقطعيها شرائح.
2- هاتي الأرز واغسليه، وبعد كده هاتي حلة وحطي فيها معلقة زبدة ومعلقة زيت وضيفي إليهم الأرز وقلبيه معاهم لمدة خمس دقائق.. بعد كده ضيفي إليه شوربة الفراخ.
3- أثناء ما الأرز بيستوي هاتي الخبز وقطعيه قطع متوسطة الحجم وحمريه في الزيت لغاية ما لونه يبقى ذهبي وبعد كده حمصيه في الفرن.
4- سخني معلقة زبدة على نار خفيفة وضيفي إليها معلقة كبيرة ثوم وقلبيهم مع بعض لغاية ما لون الثوم يبقى ذهبي، ضيفي إليه الخل وسيبيه لغاية ما يغلي وبعد كده ضيفي إليه كوب من شوربة الفراخ وسيبيهم لمدة خمس دقائق على النار.
5- اخلطي الزبادي في طبق مع معلقة خل و1/2 معلقة ثوم وملح وفلفل وقلبيهم مع بعض وبعد كده حطيه في الثلاجة.
6- هاتي اللوز واغليه في المية لمدة 1/4 ساعة وبعد كده قشريه وقطعيه إلى قطع صغيرة وحمري اللوز والصنوبر كل على حدة.
7- هاتي طبق زجاجي وحطي فيه الخبز المحمر ومن فوقه حوالي 1/2 كوب من صلصة الخل والثوم وبعد كده حطي الأرز.
8- ضيفي قطع الفراخ إلى المتبقي من صلصة الخل والثوم وسخنيهم مع بعض على نار متوسطة لمدة دقيقة علشان الفراخ تتشرب من الصلصة، بعد كده حطيها فوق الأرز وبعدين حطي خليط الزبادي ومن فوقه معلقة زبدة ساخنة، ورشي على الطبق من فوق اللوز والصنوبر.

**********************
بلح الشام
بلح الشام
المقادير:
* كوب مية
* كوب دقيق
* معلقة كبيرة زيت أو زبدة
* 3 بيضات
* ذرة ملح
* زيت للتحمير
* شربات
* فانيليا
ودي مقادير شربات بلح الشام:
* 1/2 كوب سكر
* 3/4 كوب مية
* عصير ليمونة
* فانيليا
طريقة عمل الشربات:
حطي السكر والمية كلهم مع بعض في إناء على نار هادئة لمدة نص ساعة، وبعد كده ضيفي الليمون وسيبيه لمدة ربع ساعة أو لغاية ما تلاقي إنه بدأ يتقل شيليه من على النار وضيفي إليه شوية فانيليا وسيبيه لغاية ما يبرد.
طريقة عمل بلح الشام:
1- هاتي الدقيق وانخليه وبعد كده ضيفي إليه الملح.
2- بعد كده هاتي صينية وحطي فيها المية وضيفي إليه معلقة الزيت أو الزبدة وحطيها على النار، ولما تلاقي المية بدأت في الغليان ضيفي إليها الدقيق دفعة واحدة بس خدي بالك إنك تهدي النار وتقلبي بسرعة الخليط ده كله مع بعضه كويس علشان العجين مايتجمعش ويسيب أثر في الصينية.
3- بعد كده شيليه من على النار وسيبيه لغاية ما يبرد، وبعد كده حطي فيه بيضة وضيفي إليها رشة فانيليا وقلبيهم مع بعض كويس، وبعد كده حطي بيضة تانية وقلبيهم كويس، وحطي بيضة تالتة وقلبيهم كويس لغاية ما تلاقي العجينة لينة.
4- هاتي الطاسة اللي هتقلي فيها بلح الشام وحطي فيها كمية كبيرة من الزيت وسيبيه يسخن على النار، وبعد كده حطي العجينة اللي عندك في كيس وافتحيه من تحت أو باستخدام ماكينة بلح الشام ولما الزيت يسخن اضغطي على الكيس علشان تنزل منه عجينة بلح الشام بطول عقلة الصباع، وكرري العملية دي لغاية ما تلاقي العجينة خلصت.
5- سيبي بلح الشام في الزيت لغاية ما تلاقي لونه بقى ذهبي، بعد كده شيليه من على النار وحطيه في مصفاة علشان يتصفى منه الزيت.
6- سيبي بلح الشام لغاية ما يبرد وبعد ما يبرد حطيه في الشربات وبعد خمس دقائق شيليه وحطيه في مصفاة تانية علشان يتصفى منه الشربات، بعد كده حطيه في طبق التقديم ورشي عليه جوز الهند أو أي مكسرات عندك.. وبالهنا والشفا.

**********************
وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار، بس أوعي تنسي بعد الفطار تدخلي على قمر 14 علشان تبعتي وتقولي لنا على النتيجة...
واستنينا بكرة في عزومة جديدة، ومن هنا لبكرة أوعي تنسي تبعتي رأيك وتعليقك..
كمان لو عندك أي استفسار أو لو عايزة تعرفي تعملي أكلة جديدة، ومش عارفة تعمليها ابعتي وقولي لنا عليها واحنا هنقول لك على الطريقة على طوووول..
وإلى اللقاء غدا إن شاء الله
مع أطيب التمنيات بصوم مقبول وإفطار شهي بإذن الله
سلااااااااام

*********************
للتعرف على مزيد من الوصفات الشهية
اضغط هنا "سفرة دايمة"
*********************