عزومة 22 رمضان

عصير الموز والفراولة باللبن
العصير ده شكله وطعمه بيكونوا في منتهى الجمال..
المقادير:
* 4 أكواب لبن بارد
* 4 ثمرات موز مقطعة قطعاً صغيرة
* 1/4 كيلو فراولة مجمدة
* 8 ملاعق كبيرة عسل أو 1/2 كوب سكر
* مكعبات ثلج
* عصير ليمونة
الطريقة:
اضربي كل المقادير مع بعضها في الخلاط، وبعد كده صبيها في كاسات العصير، وضيفي إليها مكعبات الثلج.

*******************
سلطة الجزر
سلطة الجزر
المقادير:
* 3 ثمرات طماطم مقطعة شرائح
* 3 ثمرات جزر مقطعة أعواد
* بصلة صغيرة مقطعة قطع صغيرة
* ملعقة كبيرة خل
* 1/2 ملعقة صغيرة ملح
* 1/4 ملعقة صغيرة سكر
الطريقة:
اخلطي كل المقادير مع بعضها، وحطيها في طبق السلطة.

*******************
شوربة السمك بالبطاطس والكرفس
شوربة السمك بالبطاطس والكرفس
المقادير:
* بصلة مقطعة شرائح
* 2 ملعقة كبيرة زبدة
* 2 ثمرة بطاطس مقطعة مكعبات متوسطة الحجم
* 1 كوب مية
* حزمة كرفس مقطعة قطعاً صغيرة
* 1/4 ملعقة صغيرة فلفل مطحون
* كوب لبن
* 2 ملعقة دقيق
* 1/2 كيلو سمك فيليه مقطع مكعبات
الطريقة:
1- حطي البصل والزبدة في وعاء كبير على درجة حرارة عالية، وقلبيهم مع بعض لغاية ما تلاقي إن البصل لونه بقى ذهبي.
2- ضيفي إليه البطاطس والماء والكرفس والفلفل، وسيبيهم على النار لغاية ما تلاقي إن المية بدأت تغلي، وطّي البوتاجاز وسيبيهم مع بعض لمدة عشر دقائق أو لغاية ما تلاقي أن الخضراوات بدأت تستوي.
3- قلبي كمية صغيرة من اللبن مع الدقيق كويس، وبعد كده ضيفيهم إلى الخليط السابق مع التقليب.
4- ضيفي إليهم اللبن المتبقي وشرائح السمك، وضعيهم على النار مع التقليب المستمر لغاية ما السمك يستوي، وبعد كده حطي الشوربة في أطباق الشوربة.

*******************
طاجن الكاليماري بالزيتون
طاجن الكاليماري بالزيتون
المقادير:
* كيلو كاليماري
* ملح وفلفل وبهارات سمك
* 1/2 رأس ثوم مفرومة
* كوب مية
* ورقة لاورا
* 1/2 كيلو طماطم
* 1/4 كوب زيتون أخضر محشو بالجزر
* بصلة مقطعة شرائح
* حزمة شمر مقطعة قطع صغيرة
الطريقة:
1- هاتي الكاليماري واغسليه كويس وقطعيه إلى حلقات.

2- سخني الزيت على النار، وضيفي إليه البصل والثوم وقلبيهم كلهم مع بعض لغاية ما تلاقي إن لونهم بقى ذهبي، ضيفي إليهم الكاليماري، وقلبيهم كلهم مع بعض لمدة عشر دقائق.
3- بعد كده ضيفي إليهم ورقة اللاورا والشمر والملح والفلفل، وسيبيهم مع بعض لمدة خمس دقائق، وبعد كده ضيفي إليهم كوب من المية وسيبيهم يغلوا.
4- سخني الفرن على درجة حرارة متوسطة، وحطي الكاليماري في طاجن، وضيفي إليه الزيتون ودخليه الفرن لمدة نص ساعة أو لغاية ما تلاقي الكاليماري وشه أحمر، وممكن مع الطاجن ده تعملي طبق رز أبيض.

*******************
كنافة مقلية بالكريمة والفاكهة
كنافة مقلية بالكريمة والفاكهة
مقادير الكنافة:
* 1/2 كيلو كنافة
* زيت للقلي
* كوب شربات
* كوب كريمة مخفوقة
* كوب فاكهة مشكلة (مانجو – تفاح – جوافة – كريز)
مقادير الشربات:
* 1/2 كوب سكر
* 3/4 كوب ماء
* عصير ليمونة
* فانيليا
طريقة عمل الشربات:
حطي السكر والمية كلهم مع بعض في إناء على نار هادئة لمدة ربع ساعة، وبعد كده ضيفي الليمون، وسيبيه لمدة 5 دقائق لغاية ما يغلي، وحطي الفانيليا وشيليه من على النار، وسيبيه لغاية ما يبرد.
طريقة عمل الكنافة:
1- اقلي الكنافة في زيت ساخن لغاية ما لونها يأخذ اللون الذهبي.
2- بعد ما لونها يبقى ذهبي شيليها من على النار وحطيها على ورق لامتصاص الزيت الزائد.
3- هاتي طبق الحلويات، وحطي فيه طبقة من الكنافة واسقيها بالشربات وهي سخنة وحطي طبقة تانية من الكريمة والفاكهة وطبقة أخرى من الكنافة وزينيها من فوق بالكريمة والفاكهة.

*******************

وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار، بس أوعي تنسي بعد الفطار تدخلي على قمر 14 علشان تبعتي وتقولي لنا على النتيجة...
واستنينا بكرة في عزومة جديدة، ومن هنا لبكرة أوعي تنسي تبعتي رأيك وتعليقك..
كمان لو عندك أي استفسار أو لو عايزة تعرفي تعملي أكلة جديدة، ومش عارفة تعمليها ابعتي وقولي لنا عليها واحنا هنقول لك على الطريقة على طوووول..
وإلى اللقاء غدا إن شاء الله
مع أطيب التمنيات بصوم مقبول وإفطار شهي بإذن الله
سلااااااااام
*********************
للتعرف على مزيد من الوصفات الشهية
اضغط هنا "سفرة دايمة"
*********************