الغلطة غلطته وهو اللي لازم يصلّحها لو فعلاً جَدْ

عندي 24 سنة.. خلّصت دراستي بإحدى كليات القمة.. مشكلتي تبدأ لما اتعرفت على حب عمري.. حبيته وحبني هو كمان, وكل ده كان في وقت قصير, حسيت إني أعرفه من زمان أوي، وكان ده برضه نفس إحساسه.
اتعرف على مامتي وعرّفني على مامته, وعرّف مامته على مامتي, وكان يوم جميل وكلنا كنا مبسوطين.
بعد كده قال لي إنه كان مرتبط ببنت تبقى أخت صاحبه, بيقول إنها بنت كويسة أوي وإن ساعتها ما كانش يعرفني، ودي اللي كانت قدامه، وهو كان محتاج للحب؛ بس بعد كده عرف إنه مش هيقدر يحبها، وحاول يسيبها أكتر من مرة, وكل ده قبل ما لسه أعرفه.. البنت كل مرة يحاول فيها إنه يبعد عنها تهدده إنها هتموّت نفسها.
حاولت أنا أنهي الموضوع ده وعرّفتها إننا بنحب بعض، وقلت لها تبعد عنه.. زعل مني، وهي ولا كأني قلت حاجة؛ بالعكس رجعت تكلّمه أكتر من الأول.
غيرتي عليه منها خلتني إنسانة مجنونة مش بافكّر في أي حاجة؛ غير إني أخليه يبعد عنها, كلامه كله إنه مش يقدر يجرحها ولازم ينهي الموضوع ده بشكل كويس عشان هي إنسانة كويسة وبتحبه.
باحس إنه بيجرحني أوي لما باعرف إنه بيكلّمها لسه، وإنه خايف على مشاعرها وأنا لأ.. كل كلامه معايا إنها مسألة وقت مش أكتر, وإنه عايزني أنا؛ بس مش قادر يجرح حد كويس.
أعمل إيه؟ أنا مش قادرة أستحمل, حاولت أبعد عنه لحد ما ينهي الموضوع ده معاها؛ بس برضه ما قدرتش, ورجعت أقول له إن كفاية عليّ إني واثقة إنه بيحبني وإنه يفضل جنبي وأنا مش عايزة حاجة من الدنيا غيره.
أنا مش لاقية حل للي أنا فيه ده.. خايفة يضيع مني أو يبعد عني.. مش عارفة أعمل إيه.
m.m

لو عايز تفضفض لنا دووس هنا