عملت الصح وتأكدي من تعويض الله عز وجل

السلام عليكم ورحمة الله وبركاته، أحب أشكر القائمين على هذا الموقع لأنه بجد موقع جميل جداً جداً ده أول حاجة.
تاني حاجة: أنا عندي مشكلة أتمنى إنكم تساعدوني في حلها هي أني بحب زميل ليّ في الكلية من سنة ونص تقريباً، ودلوقتي إحنا اتخرجنا وأنا كنت متفقة معاه إننا نتخطب علشان يبقى موضوعنا في النور قدام أهلي وأهله.
دلوقتي بعد ما اتخرجنا فتح مع أهله موضوعنا، ووالده قال له: ما اقدرش أتقدم لناس وأقول لهم ابني عاطل.. لازم تشوف جيشك ووظيفتك الأول.
أنا فاهمة وجهة نظرهم؛ بس أنا ما اقدرش أكمّل الموضوع من غير ما أهلي يعرفوا بيه؛ فاضطريت أقول له إننا ننهي الارتباط بيننا وإن دي تبقى آخر مكالمة بيننا؛ برغم إني بحبه جداً، وإن الكلام ده كان طالع مني وأنا باتعذب.
سؤالي هل تصرفي ده صح ولا غلط؟ يا ريت تردوا عليّ بسرعة وآسفة على الإطالة.
الحائرة

لو عايز تفضفض لنا دوس هنا