حبك انبهار وسيزول

أنا بجد محتاجة إني أفضفض وأبوح باللي جوايا، واللي ما اقدرش أقوله لأي حد؛ لكني واثقة عندكم هالاقي الحل اللي يريّحني ويخرّجني من حيرتي إن شاء الله.
أنا فتاة -الحمد لله- من عيلة كويسة ومستوى مادي واجتماعي كويس وخريجة كلية من الكليات المميزة، وأنا من النوع الطموح جداً ومجتهدة جداً، ودايماً باسعى للنجاح في حياتي، وجايز الصفات دي هي اللي كانت السبب في مشكلتي؛ لأني من فترة طويلة وأنا دايماً باسمع عن واحد من أولاد خالتي هو أكبر مني بحوالي 4 سنين، ومن وهو في ثانوي وأنا باسمع عن تفوّقه في دراسته وفي كليته وإزاي هو إنسان طموح وكمان كان بيشتغل في التجارة وهو بيدرس، وحالياً في شركة أدوية، وقدر فعلاً يثبت نفسه وينجح علمياً وعملياً، بالإضافة إلى تديّنه وأخلاقه اللي دايماً باسمع عنهم، وأنا لما باروح البيت عندهم دايماً أشوف كتب أشبة بالمجلدات مكتوب عليها اسمه.
كل المعلومات دي متخزنة في عقلي من سنين، وكنت معجبة بالشخصية دي من كل النواحي؛ بس مجرد إعجاب عادي جداً وبالذات إن عمري ما اتكلمت معاه، وباشوفه قليل جداً جداً وبالصدفة؛ لغاية ما قريّب رحت عند أختي ولقيته عندها، وقعدت معاهم؛ بس ما اتكلمتش؛ بس هو كان بيتكلم مع إخواتي وأمي، وحسيت من كلامه إنه متفتح ومرن، وزاد إعجابي بيه؛ لدرجة إني بجد اتمنيت إني أرتبط بالإنسان ده، ويكون شريك حياتي، ومش قادرة أبطّل تفكير في النقطة دي.
أنا مش باقول إني حبيته؛ لكن زي ما الولد له مواصفات في شريكة حياته؛ فالبنت كمان ليها مواصفات، وأنا من زمان وأنا حاسة إن الشخص ده فيه بجد كل المواصفات اللي باتمنّاها ..قولوا لي أعمل إيه؟
مفكرة

لو عايز تفضفض لنا دوس هنا