كراميل مقرمش على "سفرة دايمة"

أعدّها لكم: نيرة أحمد
النهارده هنعمل مع بعض الكراميل المقرمش ليكي ولعيلتك، جربيه وابعتي قولي لنا على رأيك.
كراميل مقرمش
المقادير:
كوب سكر
ملعقة صغيرة بيكينج صودا
200 جرام شيكولاتة خام
1⁄4 كوب زبدة
الطريقة:
1- حطي السكر على النار وأول ما الطبقة السفلى تسيح ابدأي قلبيه كله مع بعض لحد ما يبقى كراميل، وبعد كده ضيفي عليه الزبدة مع استمرار التقليب، وبعد كده ضيفي البيكينج صودا وقلبيهم لمدة دقيقة على النار.
2- ارفعي الخليط من على النار وافرديه على ورقة سيليكون (ممكن تشتريها من أي محل حلويات)، وبعدين سيبيها تبرد خالص، وبعدين ابدأي كسريها إلى قطع متوسطة الحجم.
3- سيحي الشيكولاتة على حمام بخار، وبعدين غمسي بيها قطع الكراميل ورصيهم في طبق التقديم، وبعدين دخليها الثلاجة لمدة 30 دقيقة، وقدميها.. وبالهنا والشفا.

خلصت وصفتنا النهارده..
استنونا كل يوم مع وصفات جديدة..
سلام،،