أعدها لكم: نيرة أحمد جرّبي معانا المكرونة بالفراخ والمشروم اللذيذة بطريقة بسيطة، وتقدري تقدّمي معاها طبق رئيسي في وجبة الغداء. مكرونة بالفراخ والمشروم المقادير: 1⁄2 كيلو مكرونة 4 شرائح فراخ بانيه مقطّعة لقطع صغيرة كوب مشروم مقطع لشرائح 2 ملعقة كبيرة سوسيس مقطع لقطع صغيرة 1⁄2 كوب جبنة بارميزان (أو جبنة رومي مبشورة) 1⁄2 كوب زيتون مخلي مقطع لقطع صغيرة 11⁄2 كوب فلفل ألوان مقطع لقطع صغيرة 1⁄4 كوب بقدونس مفروم ملعقة كبيرة زيت زيتون 1⁄2 كوب كريمة مخفوقة علبة صلصة طماطم بصلة مقطعة شرائح 3 فص ثوم مفروم ملح وفلفل أسود كوب شوربة 1⁄2 كوب ميه الطريقة: 1- حطّي زيت الزيتون على النار وضيفي عليه السوسيس والبصل والمشروم والملح والفلفل الأسود، وقلبيهم على النار مع بعض لحد ما يدبل لونهم، وبعد كده ضيفي عليهم الفراخ، وقلبيهم مع بعض على النار لمدة 5 دقائق. 2- ضيفي على الخليط صلصة الطماطم والشوربة والكريمة والميه، وقلبيهم مع بعض وسيبيهم على النار لمدة 10 دقائق، وبعد كده ضيفي عليهم الفلفل الألوان والزيتون والثوم، وقلبيهم مع بعض وسيبي الخليط يغلي لمدة 20 دقيقة. 3- قبل ما الخليط يغلي بدقيقة، ضيفي عليه البقدونس وقلبيهم مع بعض على نار هادية (ممكن تسيبي الخليط على نار هادية لحد ما تسلقي المكرونة). 4- اسلقي المكرونة في ميه على النار، وبعدين صفّيها من الميه، وضيفي عليها الصوص وقلبيهم مع بعض، وضيفي عليهم الجبنة، وبعدين غطّي المكرونة وسيبيها على جنب لمدة دقيقتين لحد ما تتشرّب الصوص، وقدّميها.. وبالهنا والشفا.
خلصت وصفتنا النهارده.. استنونا كل يوم مع وصفات جديدة.. سلام،،