6 ابريل: "مكملين وأنشطتنا ورأينا وصوتنا هنقوله"

وما زالت تتوالى ردة الفعل الغاضبة على حكم محكمة القاهرة للأمور المستعجلة، بحظر أنشطة حركة "6 إبريل"، لقيامها بأعمال تشوه صورة الدولة والتخابر.
قالت الحركة خلال تدوينة لها ب"الفيس بوك"، الحكم بحظر أنشطة الحركة؟؟.. أنشطة الحركة بالكامل هي أنشطة سلمية للتعبير عن الرأي.. ماخدناش إذن أو تصريح عشان نعملها ومن حق أي إنسان انه يعبر عن رأيه طالما بيعبر عنه بسلمية ومش من حق حد يمنعه بأي شكل ولا أي سبب.. أنشطة الحركة هدفها الأساسي الاعتراض على كل نشاط بيعمله نظام الحكم وبتكون نتيجته تخريب الدولة .. الدولة اللي بتحتل المركز الأخير في مستوى التعليم ..الدولة اللي تقريباً نصف عدد مواطنيها أميين.. الدولة اللي اكتر من 60 في المية من مواطنيها تحت خط الفقر.. الدولة اللي فيها حوالي 12 مليون مريض كبد وزيهم مرضى فشل كلوي..الدولة اللي شبابها مش عارف يتعلم ولا يشتغل ولا يعيش.. الدولة اللي بتقتل وتسحل وتسجن معارضيها..الدولة اللي قضائها مسيس وبيستنى الحكم في التليفون.. الدولة اللي شرطتها بلطجية أنشطتها تنحصر في الفساد والقتل والتعذيب والبلطجة.. الدولة اللي جيشها اللي المفروض يحميها بياخد 40 في المية من موازنتها بلا حساب ولا رقيب وسايب مهامه الأساسية ومتفرغ للسياسة ودعم مرشحه عشان يحافظ على إمبراطوريته الاقتصادية .. لو الدولة دي بالشكل دا مش خربانة أصلا ولو إن تراكم أخطاء نظم الحكم المتعاقبة جعل صورة الدول من الهشاشة بحيث إن هتاف متظاهر أو صرخة مظلوم ممكن تشوهها، يبقى الحكم مش هيغير من واقع الأمر في شيء.
6 إبريل مش مجرد حركة...6 إبريل فكرة...6 إبريل هي جزء مهم من صوت الجيل دا وحلمه... مكملين وأنشطتنا ورأينا وصوتنا هنقوله زي ما احنا عاوزين.