الفرق بين (دعوى صحة التوقيع – التسجيل في الشهر العقاري – دعوى الصحة والنفاذ).. بقلم احمد منصور الباز المحامي

(هي دعوى وقائية هدفها إن البائع مينكرش التوقيع)؛ وبالتالي هي مجرد دعوى الهدف منها إثبات صحة توقيع البائع فقط على عقد البيع، لكن مش بيتحكم بصحة العقد نفسه ونقل الملكية!!
يعني القاضي بيبص للتوقيع بس، وفوق كل ده الملكية مش هتتنقل عشان القاضي مش بيبص ل العقد أصلًا!!
بحيث ميجيش البائع بعد كده يقول التوقيع ده مش بتاعي .. ده مُزَوَر .. تقوله إن اتحكم عليه إن توقيعه صحيح .. وركِّز توقيعه مش العقد .
ودي دعوى بسيطة ممكن تسترخص وترفعها وتبقى فاكر إن حقك مضمون،
لأ حقك مش مضمون أنا ممكن ارفعلك دعوى صحة توقيع على ورقة بيضة أو عقد مفسوخ عادي، و عشان كده عادي جدًا ممكن تترفع دعوى صحة توقيع على عقد باطل، إنت ممكن تشتري شقة متباعة لواحد قبل كده وإنت متعرفش لإنه مش مسجلها في الشهر العقاري هو رفعلها صحة توقيع بس وفرحان زيك بالظبط
—– ثانيًا :- التسجيل في الشهر العقاري
(هو اللي بينقل الملكية من البائع ل المشتري) وده في حالة إن البائع والمشتري موافقين يروحوا مع بعض الشهر العقاري يسجلوا عقد البيع ويحولوه من "عقد ابتدائي" ل "عقد نهائي"، وبالتالي تتنقل الملكية من البائع ل المشتري.
** طب حضرتك أنا اشتريت شقة واللي باعهالي مش راضي يجي معايا الشهر العقاري .. أعمل إيه؟!!
هنا بيجي دور —– ثالثًا :- دعوى الصحة والنفاذ
دي دعوى أقوى وأشد بكثير من دعوى صحة التوقيع لإنها قيد التوثيق والتسجيل العقارى بل في بعض الأحوال تكون أقوى من تسجيل الشهر العقاري الغرض منها إثبات صحة العقد بأكمله من البداية إلى النهاية، وهي الدعوى الوحيدة اللي بتقوم بنقل ملكية العين محل البيع ل المشتري ملكية تامة، وبتحكم إن العقد صحيح وإن الملكية اتنقلت من البائع ل المشتري فعلًا وبيتسجل الحكم في الشهر العقاري عشان أي حد يسأل على الشقة يلاقيها بتاعت حضرتك.
* طب حضرتك لو اتباعت الشقة عشرين مرة من بائع واحد .. الشقة بتاعت مين لو كلهم سجلوا هقولك العبرة بالأسبقية في التسجيل .. يعني اللي راح الشهر العقاري الأول أو رفع صحة ونفاذ وكسبها الأول هو اللي الشقة أو الأرض بتاعته ..