دنيا خلطبيط ..بقلم :حسين الحانوتى

الواحد من كتر مابيشوف ويقابل مبقاش عارف يكتب عن ايه والا ايه ..امور بقت ملخبطه وكل شئ والعكس مفيش حاجه تلاقيها مقاس صاحبها ومتلاقيش حد الا بيتكلم في اللي له واللي عليه واللي ملوش كل الناس بقت مكان المفتي في الدين وفي الكوره محلل و الصحه دكتور وفي الزراعه خبير و التعليم وزير وفي السياسه جهبز و الاقتصاد يتكلم بلسان بنك مركزي حتي بقت الناس توصف العلاج لبعضها والاخر وفي كل مجال تلاقي مصايب وتسال يقولك اصل فلان قال كده وعلان شار علي بده وانا قلت اسال مجرب ولا تروح لطبيب ..ماهو العلاج واحد والنتيجه الشفا او حل المعضله لغااااية ماتقع الفاس في الراس وتفوق علي مصيبه او كارثه الايام دي غريبه والشعب ده اغرب زي مابيقولوا ملوش كتالوج وعنده الحل لكل شئ وكل مرض ..امال ايه ماهي كل مشكله وليها عند الكريم حلال وحلها بايد الشعب.. احنا شعب عاداتنا ومورثاتنا الثقافيه والاخلاقيه اتغيرت بعد ماكان بينضرب بينا المثل في العالم في الترابط العائلي والاسري ايه اللي جرا وايه اللي حصل ..متعرفش مع ان الحياه بقت سهله وميسره وافضل وانضف من زمان .. النضافه مبقتش في القلوب بقت امام العيون في اللبس والاكل و الشوارع والبيوت وعلي الرغم من كده بقينا نعاني من مشكلة الزباله وقسوة القلوب مبقاش نضافه لا داخلي ولا خارجي… حتي علي مستوي الاسره الواحده بقت المشاكل غير زمان وكتير مابين الاب والام والابناء بل بين الابناء وبعضهم ..عقوق تلاقي ..سرقه تلاقي.. قتل موجود… تعدي غير شرعي علي محارم حدث ولا حرج… يعني زمان كان صعب جدا تسمع ان ابن قتل ابوه او امه او اخوه او اخته وكانت تعتبر من الحوادث الشاذه في المجتمع وقضية رأي عام النهارده بقي عادي ونسمع الخبر باي جريمه ويمر مر الكرام فلان قتل امه ….فلان خنق ابوه.. عادي ولا اي غرابه..ايه السبب ايه التحول المفاجئ في سلوكيات المجتمع.. هنقول دين الناس بتصلي وتصوم وتتصدق والجوامع ماليه البلد وما شاء الله الفضائيات كلها مشايخ بتتكلم وتوعظ لا وبتقول نكت كمان. هنقول ظروف صعبه زمان كانوا اصعب الدنيا ماسكه علي الناس والناس ثابته ومتمسكه بتراثها الديني والاخلاقي هنقول مدنيه حديثه تلفزيون ونت وغيره طب مافيه دول ومش مسلمه بل خلطبيط اديان ومتقدمه عننا ومحصلش عندهم اللي حصل عندنا ..هنقول تعليم .اي نعم في انحدار في المدارس والمدرسين لكن الدروس الخصوصية النهارده احلت محل المدرسه حتي بقي المهندسين والدكاتره اكتر من زمان ومع كترهم كترت الامراض وظهرت امراض وفيروسات جديده .. ايه جرا وايه حصل ..بلدنا مش وحشه بلدنا كويسه واحنا اللي بقينا وحشين ونفوسنا وحشه.. ايه يخلي مدرس يضغط علي طالب لدرس خصوصي مع انه كان في وقت من الاوقات من عيوب التعليم بل كان معايره للطالب والمدرس او مدرس يضغط علي طلابه ويكرههم في التعليم والطالب يهرب وميلاقيش ادامه غير القهوه والكافيه او السيبر ويتحول لمدمن او بلطجي او حرامي ايه يخلي موظف يرتشي في مكان عمله وهو اساسا بيأدي مهمته وشغله مع ان غيره بيتمني مكانه ومرتبه الثابت ايه يخلي طبيب كشفه الف جنيه واصلا المريض ممكن يكون سالفهم ومادد ايده لخلق الله مع ان الطبيب اقسم قسم مهنته وخالفه ..لا وكمان الاعاده بنص الكشف وهو لم يؤدي مجهود يناسب المبلغ في حين غيره بيأدي للبلد خدمه اشق في وقت اطول بأقل من ربع مبلغ كشفه . طب ايه يخلي بتوع المحليات مثلا يرصفو طريق بدون خطه مدروسه ويكسروه بعد اسبوع لمجاري او مد كابلات كهربا او واحد يخالف قانون في رخصه ويستف ورق ويضيع املاك ناس وتروح لغيرهم بدون حق وبدون ماضميره ينهره او يروح شغله ويعمل خط سير يوميا بقصد الهروب والتزويغ هو فيه ايه …في ايه تروح شغلك تقول يا فتاح يا عليم اللهم احفظنا من زملاء السوء والخيانه واليصاصين والمطبلاتيه لمدير تعتمد ادارته علي السمع وليس علي التقصي للحقائق بل علي ان يظل الوضع علي ماهو عليه دون تجديد وتحديد رؤيه وهدف واستحداث وتحديث اعتمادا علي القوه البشريه الموجوده باحياء روح العطاء فيهم بدلا من موت الانتماء للمكان داخلهم وتحويلهم لمرتزقه ..العمل ان وجد والمرتب فقط.. واعتقد ان كتير مننا بيعاني من كده لو موظف زي ما عانيت انا ومازلت في حاجه غلط فينا خلت الدنيا خلطبيط اختلط فيها الحابل بالنابل وغيرت اصوليات وثوابت اضاعت طابع المجتمع لكن مع الخلطبيته بلدنا حلوه.. ارجعوا زي زمان وخلوها احلي