حوار ناس بتتكلم مع نفسها بعد أحداث امبابة

بقلم علاء الغندور
مواطن 1: اذا كان النظام البائد فى مصر يطبق قانون الطوارئ ضد الشرفاء فقط والآن بعد الثورة نطلب ان يتم تطبيقه على البلطجية و المجرمين والفاسدين وفقط !!!
مواطن2: نطالب بأعدام المتسبب فى المجزرة المتعمدة فى جريمة الأمس فى أمبابة من فلول نظانم مباركد من أمن الدولة والحزب الوطنى و البلطجية التابعين لهم وأيضا من السلفيين!!!
مواطن3: يا كل المصريين اتحدوا و لا تجعلوا نار الفتنه الطائفيه تحرق مصر بأكملها ..ان ما حدث بالأمس فى امبابه هى جريمة ارتكبها نظام مبارك والعادلى من أجل تمزيق وحدة مصر!!
مواطن 4: يا سادة..دى مؤامرة قذرة ممن يريدون تدمير مصر ومشترك فيها خونه من الداخل ومن الخارج..لكن احنا واقفين ليهم بالمرصاد..دى بلدنا ولازم نحميها!!
مواطن5: أنا مش فاهم حاجه..ياريت لو حد فاهم حاجه يفهمنى..ليه اللى بيحصل ده؟ وليه؟ ومين اللى مستفيد منه؟؟؟!!!
مواطن 6:يا وزير الداخليه..همه عساكر الأمن المركزى بيعملوا ايه فى المعسكرات؟ و ما بينزلوش الشوارع يحموها ليه؟ و الظباط اللى نايمين فى بيوتهم سايبينهم ليه؟..كلنا محتاجين تواجد الشرطة فى الأيام السوده دى!!!
مواطن 7:انا مش فاهم ليه المجلس العسكرى ووزارة شرف سايبين المحافظين وأمن الدولة السابقين و بتوع الحزب الوطنى أحرار ليه؟ دول بيفكرونى بالنكته القديمه عن الصعيدى اللى أكل على قفاه 17 قلم على سهوه!!!!!
مواطن8:أشربوا يا مسئولين..انتوا سكّتوا لهم وهمه دخلوا بحمارهم و لسه ياما هيعملوا طول ما أنتوا ساكتين!!!
مواطن 9: فلول النظام البائد عايزة تعمل فتنه فى كل مصر عشان يضيع الأمن و النظام و يبقى مفيش لاجيش و لا شرطه و يعرفوا يهّربوا المساجين الكبار اللى نهبوا البلد من السجون..أصحوا يا ناس!!
مواطن 10:عبير ايه ووفاء ايه وكاميليا ايه وعفاريت زرق ايه؟ربنا ياخدهم كلهم..يسلموا و الا يتنّصروا..هيعملولنا ايه وهيفرقوا معانا فى ايه؟ ما يولعوا بجاز..معقول البلد تولع عشانهم؟؟!!
مواطن11:عايزين نسمع عن أحكام بالأعدام للمجرمين اللى حرضوا وخططوا ونفذوا جريمة أمبابه وفى أسرع وقت!!!
مواطن 12: السلفيين دول وفى شهر واحد بس أساؤا للأسلام و لأنفسهم أبلغ أساءة ..لدرجة ان فيه ناس بتقول عليهم ..انهم و ظباط أمن الدولة السابقين وجهين لعملة واحدة!!!
مواطن 13: انا متهيألى أن اللى خطط للأحداث فى أمبابة هو حبيب العادلى وزير الداخلية السابق بمناسبة لبسه بلدلته الزرقا فى السجن بعد ما انطس 12 سنه سجنّّّّ!!!!
مواطن14:انا سمعت واحد سلفى بينادى عايز كاميليا يا أولادى!! تعمل بيها ايه يا أخويا؟؟هتتجوزها انت راخر و الا انت دماغك فيها ايه بالظبط؟
مواطن15:عايزين نسمع حكم رادع على رموز النظام الفاسد بالأعدام على حد فيهم عشان نفرح ونحس أن الثورة عملت حاجه بجد!!!
مواطن16:منهم لله المجرمين دول اللى أتسببوا فى تأجيل سفرية رئيس الوزارة للبحرين و الأمارات و كان هيعمل شغل معاهم و يجيب استثمارات لمصر وكمان أتأجلت سفريته لأوغندا و أثيوبيا عشان أتفاقيات النيل!!!
مواطن 17:انا شامم ريحة اسرائيل فى موضوع أمبابة ده وشامم كمان ريحة حسين سالم كمان وعصابة الحزب الوطنى !!
مواطن18:يا عالم احنا حالنا واقف ومش لاقيين ناكل..الله يخرب بيوتكم ياللى عايزين توّلعوا فى مصر و تعملوا فتنه طائفية عندنا!!!
مواطن19:يعنى ايه يحبسوا جرانه 5سنين بس بعد كل اللى نهبه!!!!صباح الحنان!
مواطن20:يا ناس احنا بس عايزين تطّبقوا القانون العادل على الكل مسلمين ومسيحيين عشان الكل يرتاح وعشان نرتاح من المطبلاتية بتوع الشعارات اللى عايزين جنازة و يشبعوا فيها لطم!!!!