حمله التغيير ابدا بنفسك من اجل مستقبل افضل لمصر

السلام عليكم ورحمة الله وبركاته
التغيير التغيير كثير ما تحدثنا عن التغيير والكثير كتبوا عن التغيير لكنى أرى انى لن أتحدث من نفس وجهه النظر فلا أحبذ التقليد أو التمليل فما أتحدث عنه اليوم هو قضيه التغيير منذ قديم الزمن ونحن ننادى بالتغيير أيام الملك نريد التغيير جائت الثوره وفرح الشعب المصرى كثيرا ولما ظهرت حقيقتها أو الوجه القبيح لها آ...ثارنا التغيير ونددنا بها ثم جاء محمد أنور السادات وكم هاجمناه بعد ما أنعمنا عليه بالعديد من الألقاب مثل الرئيس المؤمن وغيرها وبعد ما عبر بارليف وحصلنا على النصر قمنا باغتياله وجاء من بعده محمد حسنى مبارك وهللنا بصاحب الضربه الجويه الأولى ووقفنا ورائه كثيرا ثم انتهى شهر العسل معاه فطالبنا بالتغيير وقام بتعديل الدستور وازاد إستياء الشعب أكثر فجائت الانتخابات وقرر كل المعارضين الوقوف بجانب أيمن نور ومن هو أيمن نور مش مهم المهم أنه بدل مبارك وخسر أيمن وأستمر مبارك وفجأه بدون سابق انذار انتهت فتره الدكتور محمد البرادعى وعاد الى مصر ونادى الكل بالبرادعى للتغير سبحان الله مش كنتم لسا بتقولوا أيمن نور .
هل سالنا أنفسنا لماذا نريد التغيير للاسف لم يفكر أحد فى التغيير قبل التغيير نعم " لا يغير الله ما بقوم حتى يغيروا ما بأنفسهم " أنت عايز التغيير وأنت لسا زى ما أنت طب ازاى هييجى التغيير يا راجل لو هتغير لون بيتك بتفكر اللون الجديد هيبقى ايه وليه. يبقى لما تغير رئيس الدوله يبقى هتغيره ازاى انك تنتخب حد تانى التغيير لازم يبدأ من جوانا احنا الأول مش متخيل واحد بياخد رشوه ومش عاجبه الحكم طب ما أنا لما أغيرلك الحاكم هتفضل تاخد رشوه يبقى فين التغيير وانت رئيس مستبد فى عملك ومش عاجبك نظام الحكم طب أنت فكرت تبقى ديمقراطى فى مكانك أو فى بيتك الأول لازم قبل ما نعمل حمله نعم للبرادعى ونعم لفلان لازم نعمل حمله ابدأ بنفسك الأول غير نفسك عشان الواقع من حولك يتغير لو كل واحد فينا بقى يشتغل بضمير وبيتقى الله فى اللى بيعمله وكل مدير مبقاش يظلم مرؤسه وبقينا ندى الحق لأصحابه تفتكروا ممكن يجى فى يوم من وسطنا حاكم مستبد أو مش على مزاجنا أنا فعلا أنادى بالتغيير بس أننا كل فتره محتاجين للتغيير عشان كل فتره بيبقى ليها متطلباتها وبتختلف ظروف التعامل فيها بس يكون للبلد منهج واحد أى رئيس يمشى عليه النهضه بالبلد وده هدف الطفل الصغير الى رئيس الدوله صدقونى قبل ما تيجى تنتقد حد فكر مع نفسك كده انت راضى عن نفسك انت بتعمل اللى عليك فى بيتك وعملك وبلدك عشان تطلب اللى ليك منهم الطبيعى للمعادله هات وخد عمرها ما كانت خد بس أو هات بس أحنا اللى خلينا المعادله ناقصه مش اللى بيحكمونا مصر عمرها ما كانت قاسيه اللى بيحكمها هو اللى ملاها قسوه ومتنسوش ان اللى بيحكمها خارج منا عايزين نصلح نفسنا وهنلاقى بلدنا على طول اتغيرت تعالوا نجرب ومش هنخسر حاجه والله لو أهتمينا بالقاعده هنكسب تقدروا تقولولى لو عندنا مجلس شعب قوى بيتكلم بلسان الشعب هنتظلم يوم طب ازاى بس أى واحد يلف على الناس قبل النتخابات فى الافراح والمآتم كله يجرى ينتخبه تقريبا احنا البلد الوحيده اللى الرئيس فيها ليه سلطه على مجلس الشعب تخيلوا رئيس بيحاسب مجلس الشعب وعايزنها تتعدل احنا السبب باختيارنا الخاطىء أو بابتعادنا عن الأنتخابات عشان شايفين انها هتطبخ فى أى بلد الشعب هو القوى العظمى أمتى هنبقى كده تعالوا نغير نفسنا هنلاقى بلدنا بتتغير وحالنا هيبقى أحسن