انقلاب من أنصار الدكتور محمد البرادعي .. وقالوا : يا ريت يا دكتور تبقي في الشارع يوم 25 يناير شبعنا خطابه

كتب : عبد الله مصطفي – أمينة عياد
انقلاب من أنصار الدكتور محمد البرادعي عليه .. بعد أن أعلن تأييده بقوة لدعوة الشعب للتظاهر السلمي الحاشد ضد القمع والفساد. لكنه لم يوضح ما إذا كان سيشارك في المظاهرات أم لا وقال البرادعي في بيان أصدره اليوم على صفحته على الفيس بوك “عندما لا نجد آذانا صاغية لمطالبنا ما هي البدائل أمامنا؟ “
وقوبل أعضاء صفحة محبي البرادعي إعلان البرادعي بالاستنكار ودعوه للنزول إلى الشارع والمشاركة معهم . فخلال ساعة من إعلانه علق 139 أعلن 137 منهم رفضهم له مشيرين أنهم كانوا في انتظار إعلان البرادعي المشاركة في المظاهرات وأعرب عدد كبير ممن علقوا على إعلان البرادعي عن خيبة أملهم في بطل التغيير الثوري وقال احد التعليقات ” ، ودور حضرتك إيه بقى في الموضوع ده ؟، بينما قال أخر ” الفرصة الوحيدة ليك ولكل بني ادم فعلا بيحب مصر هو يوم 25 ، يا نجاح يا سقوط مدي الدهر "
وقال تعليق ثالث ” كدا صح يا دكتور بس يا ريت تنزل انت كمان وتطلع بيان إن حضرتك هتشارك الشباب محتاج يحس إن وراه ضهر الاخوان وحزب الوفد كالعادة متكلموش وبيتفرجوا ومستنين يشوفوا اللي هيحصل مفيش غير أيمن نور وحمدين صباحي اللي قالوها واضحة وصريحة أنهم نازلين
بينما علق رابع قائلا ” معرفش حضرتك هتشوف كلامي ولا لا ؟ أو الأدمن هيوصل كلامي ولا لا بس أنا ريحت ضميري وقولتلك انك لازم تطلع بيان تؤكد حضورك أو غيابك عن الحدث ،تصدق بقى انك لو ما نزلتش تبقى راجل ......... ،لابد من النزول للشارع و التظاهر السلمي بأعداد غفيره يا دكتور محمد لمقاومة القمع و الفساد “
و كتب آخر أبيات شعرية يعلن فيها عن خيبة أمله قائلا
انت بطل من ورق ... يخشى الشمس ولون العرق
انت لم تقرأ حتى عن النضال ... ولا تعرف الفرق بين الحق والضلال
القائد من يعلم الآخرين ... ليس من يتسول عطف المساكين
ارحل بكلماتك الهشة ... فأفعالك أفعال قشه
و قال أحد التعليقات ” ا فهم من كلامك انك سوف تكون في الصفوف الأمامية من الظاهرة ولا بتحفز الشعب وان نجحت لنا فيها نصيب وان خابت فلنا فيها شجب ،ما ينفعش إن تكون مايسترو عن بعد ،والله أنا اكتب هذا الكلام وكنت من أول الموقعين علي البيان ،ماينفعش نكون بالتشجيع والكلام فقط فين الأعمال ،” وأضاف ” أتمنى إن حضرتك وكبار المعارضين والنخبة الثقافية في مصر والنخب السياسية تتضافر مع الشباب في الشارع يوم 25 يناير ودي فرصه يا ريت منضيعهاش علشان ناخد حقوقنا ونسترد كرامتنا وحريتنا في بلدنا الحبيبة مصر “
وقال صاحب تعليق ” الله اعلم حضرتك هتقرا تعليقي ولا لا بس أنا بتكلم عن شباب كتير جدا من مؤيدين الدكتور البرادعي الأول بعد التحية من يوم ما حضرتك دعيت لتغير وكلنا وقفنا مع حضرتك وعلقنا أمالنا على الله ثم عليك وبنتكلم مع الناس عشان نتغير ونحاول نغير الوطن وجه الوقت اللي بنعد له وعاوزين حضرتك فيه تكون معانا يوم 25 يناير ” و أضاف ” حضرتك لو منزلتش معانا وفضلت تكلمنا من هنا إحنا آسفين هنضطر كلنا ننسحب من الجروب ومن الرابطة لان حضرتك مقدرتناش الأستاذ حمدين صباحي والدكتور أيمن نور هينزلوا إن شاء الله يا ترى حضرتك نازل ولا زى كل مره ...؟ ،” فيما دعا أحد الذين علقوا على الصفحة الشباب لعدم الإحباط والتمسك بأمل التغيير