استرخي ونامي استرخي

استرخي ونامي استرخي
وادبح لك حلمي الفرخي
والفرخي مافيش في العشة
...
في العشة ما فيش غير شرخي
شرخي اللي ما عاد يترمم
قلبي اللي بيحلم .. يحلم
يحلم أحلامه أونطة
وأونطة الإيد خوافة
خوافة في إيد الشنطة
والشنطة ماسكها "ف "إيدي
إيدي المربوطة "ف" قيدي
قيدي في السقف معلق
ومعلق من عرقوبي
عرقوبي جفاف متقطع
متقطع رسمي وتوبي
مسامير مدقوقة "ف" كعبي
كعبي الحفيان الدايخ
الدايخ جدا قلبي
قلبي الوسعان الضيق
ضيق مافيهوش غير أوضة
أوضة بشباك وأورطي
وأورطي يادوب بيعكز
بيعكز وبتتفرطي
تتفرطي ازاي علي دمي
دمي يادوبك بيكفي
بيكفي وليه في وعودك
في وعودك مش بتوفي
زعلانه بجد عليا
ولا شمتانة بتتشفي
تتشفي في روح مسحوبة
مسحوب مغصوب وموافق
علي بيعي بعقدين عرفي
والعرفي جميل و جماله
وجماله ما فيش فيه ورطة
والورطة ازاي يا سخية
يا سخية وايدك فرطة
الورطة "ف" أورطة بتغزل
تغزل في حرير وبتفتل
وبتفتل كرباج جنتل
جنتل يضرب ويلاقي
ويلاقي شهود لطلاقي
ولا.. لا .. "ولا كلا البتة"
ولا كلنا فتات الفته
والفتة "ف" مولد دايم
والدايم عالم بينا
والشلة اللي بتدينا
قافلة الصناديق والشنطة
والشنطة يا اهلا مرحب
مرحب بالضحكة الصفرا
الصفرا "ف" قلب السفرة
والسفرة جموع مش دايمة
دايمة ولا راسية العايمة
والعايمة ف وسط الموجة
والموج متلاطم قاطم
قاطم وسط اللي جابونا
عن عشقك ليه حجبونا
سحبونا في عز القيلة
في القيلة البيع ولا حيلة
ولاحيلة نلموا الليلة
والليلة الامضا بلانا
بلا ناس بلا نيل بلا نيلة
بالا نيلة وراح يتمسكن
واتمسكن لما اتمكن
واتمكن يمنع يركن
يركن والمخبأ فاضي
والفاضي خلاص بيعذب
بيعذب وبيتفنن
يتفنن يصلب يجلد
يجلد بالسوط ليالينا
"ع" العود سكران بيدندن
بيدندن رسم "ف" مية
والمية مانعها حابسها
وحابسها وباع الجركن
مرهم للعين مش شايف
ولا شايف بس وخايف
خايف علي ايه الباقي
محسوب "م" الشعب المعدم
ولا "م" الشعب الطباقي
مسحوب من طرف لساني
ولساني معافر حافر
حافر غنوة لاوطاني
أوطاني اللي تعليني
ما ابقاش فيها الأوطي اني