الشمس بتمطَّر ندى

معقوله ده..... إيه كل ده..؟؟
مين اللي قال لنجوم سمايا تطير كده
زي الطيور الصاحية بدري مُغرده..؟؟
الليل سكن.. وانا كنت ليك برضو السكنْ
من أول القلب اللي دايب فيك حنان لحد أخمص القدمْ
مربوطه فيك بسلسلة ْ حب وأمانْ
مفتوحه ليك كل البيبانْ
ولا حد يقدر يا حبيبي يخُشها غيرك يا مستعجل قوي..
إديني فرصة أرش لك ورد الجناين
ع الأراضي وع السقوف وعلى الحيطانْ
على كل ما عيونك تشوفه وتشتهيه
يا للي انت مستعجل قوي تركب حصان البغدده ْ
إديني فرصه أرش لك عطر وبخور
واملا كاساتي برقتي.. أملاها نور
إديني فرصة استنظرك ...وأستحضرك قدام مرايتي
واشم أنفاسك كده بطعم الهوى
...
ياه ع الرجولة وانت جايِّ من السفر..
ريحة تراب السكة عامل كونتراست مع العرق
في اديك سجايرك والمفاتيح والمناديل الورقْ
ريحة تراب السكة عامل شغل جامد في الوجاهة والتألق بابتسامة مهذبة
وكأن فارس ع الحصان..
لأ... ده القمر
لأ... ده الملاك اللي بجماله هزني
لأ .... ده اللي جامع كل رجالة البلد في شخص واحد والنبي
دَوْلَةْ بحالها وماشية تتمخطر كده
على راسُه تاج الملك رغم ان الملوك مابحبهومش
ونجوم كتافك كالعصافير الدهبْ
وعنيك صقور رايحه وجايه بسرعة البرق اللي ما بيعرف زهقْ
داخل سبقْ ....؟
راكب حصان الشوق لحبي اللي استوى..؟
لابس عباية ْ الوجد والميل والجوى..؟
..
من عند حضنك يبتدي معنى الحياه
من عند قلبك يترمي لي طوق نجاه
يتشعلق القلب الصُغير فيه يشدُّه ناحيتَك
الطوق يعافر ويَّا أمواج الطريق
لكن مازال القلب ماشي يا حبيبي ف سكتك
يستسلم العمر اللي باقي ويتفرد فوق المدى
يستسلم العمر اللي مفرود في المدى شطين محبه
ويتسند ضهري عليك
ما هو انت جاي ضهر وسندْ
مرتاحه ليك خطوة ْ غنايا الطيبهْ
عطشانة أرضي وقبلا كانت مُضربهْ
دلوقتي بس بعيني انا شايفه الحاجات مترتبهْ
متسرسبه ميِّة ْ هواك في قُلِّتي
خليني أشرب وارتوي بشويش قوي
يتعرَّف القلب الصُغير ع الجناين اللي داخل جنتي
ولا افوقشي م الحلم الجميل اللي ابتدا
يااااااااااااااااااه ع الجمال والبغدده
ياه ع الدلال وانا روحي فيك متوحده
الشمس بتمطر ندى... معقوله ده..؟؟
... ايه كل ده..؟؟