ب 2.5 .. تعالى بص ...

في الحقيقه احنا عارفين ان كل حاجه بتنتشر بسرعه الصاروخ في مصر .. يعني بسم الله ما شاء الله
النهرده نلاقي واحد راكب توك توك بكره نلاقي 100 واحد اشتري توك توك و شغله و هكذا الحال في المحلات التي تبيع كل شيء ب 2 جنيه و نص
لما نبص حوالينا بنلاقي ما لا يقل عن 10 محلات كلها مكتوب عليها كل حاجه ب2 حنيه و نص لا تدع الفرصه تفوتك
و بصرااحه انا خفت الفرصه تفوتني و فضولي جعلني ادخل اكثر من محل من هذه المحلات و خلليني اقولكم لاقيت ايه ؟؟
اولا طبعا معظم المنتجات الموجوده في هذه المحلات منتجات صينيه رديئه الصنع الى ابعد الحدود و منها طبعا ورود الزينه و التابلوهات اللي لونها بيطلع في ايدينا اول ما نمسكها ... و الشرابات الحريمي اللي بتتقطع قبل ما نلبسها و الشربات الرجالي اللي بتبوظ من اول غسله ... ناهيك عن الملابس الداخليه اللي مقاسها بيكبر 3 مرات بعد الغسيل و الايشاربات الرديئه اللي بنشتريها حمرا نروح البيت نلاقيها خضرا
وعلشان منظلمش الصين معانا ... فهذه المحلات لا تبيع البضائع الصينيه فقط فهي ايضا تبيع بضائع مصريه و لكنها مصنوعه في بير السلم ... بمعنى انها غير مرخصه و ليست مطابقه للمواصفات الرسميه و من اهمها طبعا ادوات الماكباج اللي البنات و الستات نازلين شرا فيها و مش عارفين انها ممكن تجيبلهم كارثه
و كله كوم و الشامبوهات و الكريمات الخاصه بالشعر كوووم تاني
تصوروا ان هذه المحلات تبيع شامبوهات ب 2.5 جنيه .... طب ازااااي ... متكلفه اد ايه و اكيد المحل اللي اشتراها اشتراها بأقل من كده طبعا علشان يكسب فيها ... طيب دي معموله ازااي و من ايه ؟؟؟ ... بجد حاجه خللت الواحد مخه هيطير
و طبعا المحلات دي مليااانه على اخرها و مع الأسف تقريبا كل زبائنها من الستااات اللي الشراء هو هوايتها الوحيده حتى لو كانت حاجات مش ضروريه لها... الست من دول بتدخل المحل و هي يا عيني فاكره انها بتوفر .. ماهي كل حاجه ب2.5 و تطلع تلاقي نفسها دافعه دم قلبها فالحاجه مغريه و سعرها هااايل ده طبعا بالنسبه لرداءتها
و لما تروح البيت و مع اول استخدام لهذه الاشياء بتكتشف انها صرفت المهيه في شويه حاجات ملهاااش اي لازمه
و ياريت الستاات بتحرم فالتكرار عندنا لا يعلم ابدااا الشطار .... فهي دي مصر .......... و هي دي المأساه ........