قطر ألمانيا وقطر الصعيد

عندنا في مصر اما بنشوف وضع ووضع عكسه بنقول ياه دا فرق السما م الارض مجاش في بالي يوم ان فيه ابعد من السما واعلي منها عشان نقول فرق الفضا م الارض مثلا " ثقافة موروثة" جايز بس ما اظنش لان اجدادنا اصحاب حضارة مش دولة في ديل الامم.. عامة مش مهم فرق السما فرق الفضا المهم اننا في الارض طيب ازاى نعلي شوية عن الوضع المهين دا..
اوعى تقولي احنا "نأمل" الكلمة دى بتنرفزنى والكلام الانشا دا معتش بيجيب همه الامل نفسه عايز شغل تعب عرق عايز مجهود عشان يبقي موجود..
اما اسمع ان اولاد بلدى في الصعيد اتحرقوا في قطر وكانهم كوم قش وهيتعوض بحزن... بس اكيد مش مقصود حرقهم يعنى احنا ياعم مش يهود ولا المسئوليين نازيين هو الاهمال ... ايوة الاهمال دا اللي ورانا ورانا لان مفيش ردع فعادى اما يتحرق شوية ولا يغرق شوية بس اللي يغيظك ويفقع مرارتك اما اهالي الناس اللي اتشوى في القطر دول يطلع تلاتة تيت تيت عشان ياخدو تعويضات ...وهما يعنى هياخدو كام .. وتمر الايام والليالي والسنين عشان يقع عينى علي خبر جاب اللي باقي في مرارتى
بيقولك كل راكب متضرر من تعطيل التكيف في القطر في المانيا تبحث الشركة تعويضة بمبلغ 500 يورو
يانهار مش باين له لون تكييف .. دا احنا بنتشوى في الشوارع دا احنا بنركب الميكروباص زي كام سردينة في علبة ومقولكش بقا علي الحر وريحة العرق ولا لو طار الميكروباص من علي كوبري بسبب انوار الشوارع اللي هيقفلوها ولا لاي سبب..
500 يورو عشان تكيف اتعطل احنا اتأخرنا اد اية .. ولا لو مكتوبلنا يوم نبقي زيهم هيكونوا هما فين
حاجة تحزن بجد ناس تتحرق وناس تتكيف...وياقلبي لاتحزن