مصر ع المكشوف

بقلم : على عبد الرحمن
قال لي صديق مصري متفائل , بيحب مصر برغم الأزمات والمشاكل ...لو عايز تعرف مصر بجد هقولك على سر بس اوعى تقوله لحد ..مصر الثورة مصر الحلوة أم الدنيا هى الحضارة والعمارة والجدارة , حتى فى لعب الكورة شطارة .
لو عايز تعرف مصر بحق وحقيق , تأمل وشوف وبص فى الوشوش هتشوف مصر ع المكشوف.
دى وشوش سعيدة ومهللة برغم الأسعار والضرائب المتلتلة .
ودى وشوش بتجرى ورا لقمة العيش اللى بقت بتيجى بالخناق وبرغم كده سعيدة ومبتسمة بدون زواق.
وده سواق متعكنن طول النهار وبرضو سعيد إنه فى مصر برغم أزمة الأنابيب والسولار.
ودى ناس تايهه محتاجين صرف وشوية ميه، بس كله يهون مدام عايشين في البلد دي.
وده قطر معدي من أسوان للعياط، جواه ناس بتغني وأطفال بتقول واء، مش عارفه مصيرها ، هتوصل بأمان ؟! ولا أهي موته والسلام.
وده محمد وجرجس أصحاب و ولاد بلد بحق وحقيق، برغم الفتنة الطائفية لسه بيعتزوا إنهم من البلد دي.
ودي وشوش مدارية، مش من البلد دي هدفها الفتنة الطائفية وكره العالم للبلد دي.
وده أنت بتقرا كل ده وبرضو بتضحك وسعيد...!َ!َ
كل دي ناس تعبانة ورغم كده لسه على وشوشهم الابتسامة بس يمكن تطير وده ب100 أمارة، لو مفيش حد قلبه على مصر والناس التعبانة، وساعتها لا تنفع حسرة ولا ملامة.
وده أنا/
على عبد الرحمن