مصر بتنادينا .... بقلم الشاعر زغلول الطواب

مصر بتنادينا
يلا يا إبنى
تعالى بينا
نعمر ونبنى
مصر محتاجنا
تعالى
حط إيدك ف إيدى
نبنى مدارس
ونعلم ولادنا
الأخلاق الحميده
إللى ربانا عليها
أبويا وجدى
وكفايه علينا
الوقت إللى ضايع
والسنه إللى مرت
ف مناهده وصراع
تهدم ما تبنى
يلا بينا
نعلى ونبنى
نبنى مصانع
ونزرع مزارع
بجهدى وجهدك
وعزمك وعزمى
يلا بينا
تعالى يا إبنى
نشبك إدينا
علشان نعمر
بلدنا ونبنى
تعالى نتصدى
لأى فوضى
تهدم وتخرب
التراث ف بلدى
إصحى وقوم
م الفجر بدرى
قبل شمس النهار
ما تطلع
والوقت يجرى
صباح الخير
عليكى يا بلدى
وعلى نيلك إللى
بيسقى ويروى
أرضك السمره
علشان تطرح
الزهره النضره
ونتنسم عبير
الورد البلدى
يلا بينا نخضرها
بعرقك وعرقى
يا جمال غيطانها
بالقطن الأبيض
لما يتمايل
فوق الأغصان ويضوى
يا سلام ع عيدان القمح
بلون السنابل الدهبى
والله بلدنا حلوه
بس محتاجه مننا
هدنه
كفايه يا خوانا
تخوين وفتنه
أيه إللى نابنا
غير المشاكل
م قال وقولنا
غير الخراب
والدم إللى سال
ف ماتش كوره
ولا يجيب ولا يودى
يلا بينا
نعمر ونبنى