"بلدنا كلنا".. بيان لشباب الفيوم

أصدرت لجنة شباب الوفد بالفيوم برئاسة ميشيل ميلاد وإشراف د. عصام الشريف رئيس لجنة الوفد بالفيوم بيانا قالت فيه: بلدنا عايزين نبنيها من تانى ..مش عايزين حد وصى علينا ..مش عايزين حد يشدنا وراه ..إحنا بنعرف نفكر كويس ..ونعرف نميز الحلو من الوحش ..مش هنمشى ورا أى شعارات تانى ..بلدنا ولا يشاركنا فيها أحد .
عايزينها بلد لجميع المصريين لا نميز فيها بين أحد وآخر بسبب النوع أو الجنس أو اللون أو الدين ..كلنا مصريين وهنعيش فيها متحدين ..مش هيفرق بينا حد ولا يضحك علينا حد ..لأننا هنبنى البلد زى ما احنا عايزين ..عايزينها بلد مدنية يعيش فيها الجميع تحت راية المصرية ..علمنا واحد ..أخلاقنا واحدة ..ربنا واحد ..مصرنا واحدة لا نسمح لأى غريب يدخل بينا .
وعلشان هى بلدنا ،عايزينها بلد نظيفة ..متشتمش حد حتى لو ضايقك عاتبه، أو خد حقك بالقانون ..لو عرفت إن فيه مسئول فاسد وعلى أموالك عازم، قدم ضده بلاغ لما تثبت عليه فساده، لو لقيت سائق سيارة بيسير عكس الاتجاه عاتبه وانصحه ميعملهاش تانى ولو كررها خد رقمه واشتكيه، ما تديش فلوس لعسكرى وامشى صح ..متطلبش من موظف إنه يخالف القانون، متبنيش على أرض زراعية لإنك مش هتلاقى تاكل من خيرها بعدين، متبنيش مخالف لإنك بتضيع حق غيرك وجيرانك وتعرض الناس للخطر، لو لقيت حد بيغلط متسكتش كلمه وفهمه غلطه، ولو لقيت حد بيخطف شنطة ولا سلسلة من حد تانى لازم تكون شهم وتمسكه، ولو شرطى هانك اشتكيه وخد حقك بالقانون، ولو شفته بيطارد حد مخالف ساعده علشان خاطر بلدنا، الشرطى أخوك وأبوك نساعد بعض يكون القانون هو اللى يعطى للكل حقوقه، ولو شفت مسئول روتينى قدم شكوى لرئيسه ووضح وجهة نظرك واقتراحك البديل، طيب لو كان المسئول فوق القانون روح للجهات الرقابية وبلغها .
متستغلش حد ..مترفعشى الأجرة ولا سعر سلعة، لإنك لو كسبت النهاردة كده أكيد هتخسر بكرة، ساعد الكبار لو شفتهم فى الشارع لإنهم ممكن يكونوا أهلك وملهمشى حد، تعالى نغير نفسنا علشان نغير بلدنا، اعرف إن مصلحة بلدك هى مصلحتك، ولو بلدك بقت كبيرة هتبقى انت كبير، بص لقدام متبصش لمصلحتك بس، خليك فاكر لو البلد اتقدمت هنتقدم معاها لإنها بلدنا، مفيش حاجة اسمها يا عم أنا مالى ومفيش حاجة اسمها أصلها بتاعة الحكومة، كل ممتلكات الدولة هى ممتلكاتنا كلنا كل حد فينا يملك فيها فحافظ عليها متتلفهاش، تعالى نحافظ على النظام وكل واحد ياخد حقه متلفش من باب الغرفة علشان تحجز قبل الناس وانت جاى بعدهم، مش هتفرق دقائق وتحافظ على حقك وحقهم، يلا نشتغل وكفاية اعتصامات علشان ننتج ونخلى بلدنا أحسن.
بلدنا ملكنا كلنا، نحافظ عليها ونبنيها ونعليها ونخليها أحسن بلد فى الدنيا .