ماذا تفعل أذا دفعت لك الحكومه مليون جنيه هديه؟

بقلم علاء الغندور
أنا صابر أفندى..موظف غلبان فى الحكومه الرشيده و طبعا عايش على أد حالى و راضى
وكنت نايم وشفت حلم..خير اللهم اجعله خير..ان الحكومه هتوزع 50مليار جنيه على الشعب وقالوا هيوزعوا مليون جنيه على كل رب أسرة..و صحيت بعد كده..
..و جلست فى البلكونه و سرحت و سألت نفسى :ايه اللى كان يجرى لو الحكومه أتهّفت فى نفوخها ووزعت المليون جنيه على كل أسرة..يا سلام..دنا كنت أعمل عمايل و أسوى الهوايل !!!!!!
و أخذت أفكر..و أفكر و دخلت غرفة نومى و جلست أمام المرآه أنظر الى نفسى وأكلم نفسى و سألت نفسى : أنا عايز ايه دلوقتى..شوية شبرقه و دلع و روشنه..لأ..لأ..
و لاّ..أعمل مشروع يكسبنى دهب..لأ بلاش لأحسن أخسر أو يتلم عليّه بتوع الضرائب و التجارة الداخليه و التموين وزبانية الحى..لألألأ..بلاش وجع دماغ.
.و لاّ أحط المليون فى البورصه..لا..لا..دنا سامع ان البورصه خربت بيوت ناس كتير اليومين دول..لا..لا
و لاّ أعمل حفله و أعزم هيفاء وهبى ونانسى عجرم و روبى وأعمل فيها الملك فاروق..لأ..لأ..أنا على آخر الزمن هأنحرف...لا..لا...طيب أنا أسافر أتفسح فى أوروبا وأمريكا و ألف العالم...لأ..لأ..لأحسن يمسكونى و يقولوا عليّه أرهابى...لا.لا.لا..
طيب ايه رأيك ياصابر تتجوز حته أوزى صغيرة من بنات النوادى تدّلع شبابك...لا..لا..دى فكرة مجنونه..هوه أنا ناقص نكد و عكننه. و هتخّلص لى المليون فى يومين ..
.طيب أنا أشترى شقه تمليك و عربيه و شويه عفش حلوين و أتجوز بنت فلاحه صغيرة و طيبه وخام و غلبانه ..تكون عايزه تعيش...هوه ده.الكلام التمام..
و فجأه..سمعت صراخا خارج باب الشقه ..يا صابر أفندى..الايجار يا صابر أفندى...
فقلت لصاحبة البيت: وبتزعقى ليه و مستعجله على ايه؟ بكرة المليون ييجى و أشترى منك البيت .
فقالت :أصحى من النوم يا صابر أفندى..و بطّل أحلام..مليون ايه اللى أنت جاى تقول عليه ...هيه الحدايه بترمى كتاكيت!!!!! صحيح الجعان يحلم بسوق العيش.!!!!!
و انتهت القصه نهاية حزينه.!!!!!!!؟؟؟؟؟؟؟؟؟؟؟؟؟؟؟؟؟
كاتب و رسام مصري