من غير عنوان

بتتكلم بالشين والغاء وكلام
مجروح محتاج له بيان
تختوخه وفرحانه بشبابها
وبتعمل نفّيخه بفصْ لبان
تنفخ فيها وتفرقعها وتشفطها
وتنفُخها من تانى كمان
فى البلكونه واقفه بتدّلع
وقاعده تبص على الجدعان
لابسه قميص أحمر وملعلع
ودراعتها والصّدر يبان
ولو واحد ماشى وبص لفوق
تضحك وتقول مالك يافلان
وإن مشى من غير مايشوف فيها
تهزْ إكتافها وتقول باين تعبان
والكل بيعمل للسانها حساب
مالوهش عزيز وعدوّه مُهان
حتى أخوها لو قال لها عيب
تعملّه فضيحه وسط النسوان
وأخوها التّانى منفوخ وأليط
وقدّامها ضعيف غلبان وجبان
وأبوها مالهوش دُكّان ولا غيط
دايمًا فى البيت نايم نعسان
وأمّها بتقول لها ياأختى جميله
فكّرتينى بحلاوتى زمان
وفى واحد ياحبابى طالب إيدها
مش راضيه وبتقول لى جبان
أنا عايزه أسد جامد وحديد
يكسر شوكتى من غير حرمان
عظمه ومنفوخ ملْو هدومه
وكرامته ساعتها ياعينى تنْصان