عمار يا مصر...النسر مابيكدبش

قبل السفر حضرنا الورق والجوازات..وكان من ضمن مهازل تحضير الورق قصة طريفة جدا...مطلوب من الزوج أنه يوقع على تعهد أن الزوجة مش حامل...لا وكمان يمضى عليها اتنين شهود..طبعا سلكنا السبل الطبيعية للبنى أدم الطبيعى ورحنا عملنا تحليل وإكتشفت أنى مش حامل!!!!؟؟
وأرفقنا التحليل بالتعهد وللأسف أضطرينا نخللى أصدقاء زوجى فى العمل يوقعوا بأنهم شهوداً على أننى لست حامل؟؟؟
الورق لف لفته وسافر القاهرة واتكلف كذا حتى وصوله بالسلامة..
وبعد يومين لقينا الورق رجع تانى لأصحابه زى البنت البايرة وقالولنا ناقص؟؟
ناقص ايه؟؟ختم النسر!!!؟
وختم النسر ع الورق كله الا ورقة الحمل..أقصد التعهد بعدم الحمل
يا ناس التحليل مرفق..والزوجة وقعت والزوج وقع وفى اتنين شهود وختم محل العمل؟؟؟
نسر إيه بس؟
طيب..رحنا بالورقة للادارة لانقاذ الموقف...ختم نسر لله يا محسنين
الموظف بمنتهى البرود رجع الورقة وقال: وأنا أعرف منين إنها مش حامل؟؟ ماقدرش أتحمل المسئولية دى أرجوكم
طيب التحليل يا أستاذ موجود..ومن التأمين الصحى..ومصدق عليه..يعنى شكليات فارغة
قال: طيب ماتقولوا للى بعتكم دى شكليات فارغة
زوجى حلف يمين طلاق إنى مش حامل...وبصم بالعشرة على الورقة..لكن الناس مش مصدقين غير النسر؟؟؟؟