شباك علي الثورة

بقلم :أحمد فؤاد نجم
منذ 8 ساعة 9 دقيقة
زينب آخر العنقود.. السكر المعقود دار الزمان بيها وخراط البنات خرطها وبقت ما أقولكش قمر أربعتاشر وجالها ابن الحلال محمود أحمد مهران وخطفها وكأنه خطف قلبي مني وليلة الفرح كانت ليلة
.. ليلة العمر زي مابيقولوا ليلة عمر زينب وليلة عمر أم زينب الترماي بنتي وحبيبتي ومراتي وأم بنتي ربنا يخليها لي ويديها الصحة وكانت قاعة الملكة في دار المدفعية هي المسرح اللي جري عليه الاحتفال عقبال عندكم جميعاً.
وكان عدد الفنانين اللي جاملوني وشرفوني وفرحوني بحضورهم وخد عندك الفنان الشعبي الجميل خالد ريكو اللي غني وأبدع واتلمت المعازيم حواليه هو يغني وهما يردوا عليه وكذلك الفنان حمادة هلال مطرب ثورة 25 يناير المجيدة والفنان ايمان البحر درويش والفنان الشاب أحمد عبدالعزيز ودا مغناش طبعا من باب الرحمة بالحضور والفنان الجميل الصديق لطفي لبيب ودا برضه ما غناش رحمة بالحضور والغياب أيضا والفنان محمود مسعود وابنه الناجي الشاعر الجميل وشلة الاسكندرية الصديق العزيز الرائع الحاج عبده اللي كان امبارح أبو جنة والنهارده أصبح أبو سيف ربنا يحميهم له وعلي ذكر أبو سيف كنا ومازلنا نتابع أحداث الثورة الليبية المنتصرة بإذن الله ولاحظنا أن القذافي عنده سيف الاسلام وده الرزل اللي فيهم وسيف العرب وسيف الدين وقد علق أحمد القزعة علي هذا بقوله:
دا كان فاتح ورشة حدادة بقي!
ومن الاسكندرية أيضا الحاج عصام صاحب العمارة اللي احنا ساكنين فيها وشرفني بالحضور أيضا صديقي الذي أفخر بصراحته. الدكتور كمال الجنزوري رئيس وزراء مصر الأسبق وطبعا أنا ح أنسي كتير وطالب السماح من الأحباء اللي حضروا فرح زينب لأن العضمة كبرت والزهايمر استتب واترستق وطبعا عزوز نور الفرح وعزوز يعني حبيبتي وزوجتي السابقة المطربة عزة بلبع.
عزوز النوز كوا النوز
مناخيرك مش قد الكوز
مع ذلك دايما تتعارك
مع نجمك مع انه يجوز
ييجي مرة يزرجن ويلبك
علي أم دماغك بالشوز
حتزرجن حيلبك ثاني
حتعيط وحتفقع بوز
ماتهونش علي ياروح قلبي
أنا أصلي متيم وعجوز
وباحبك أكتر من عيني
وباعزك أكتر ما الفوز
وهكذا الأيام علي رأي أمي عليها السلام "الأيام تبعدنا واحنا ما بنعدهاش" بقي العروسة اللي قاعدة منورة الكوشة دي هي البت زوزا حبيبة أبوها اللي كانت طول النهار راكبة علي كتافي ولازقة زي الأوبة سبحان اللي اديكي كبرتي يازوزة وبقيتي عروسة وجالك ابن الحلال اللي خدك من حضني وعلي قد ما أنا فرحان علي قد ما أنا ح افتقدك ياروح قلبي لكن لازم ادعي لك بالتوفيق والنجاح وتعيشي في التبات والنبات وتخلفي لنا صبيان وبنات.. أبوك اللي بيدعيلك.