شباك علي الثورة

بقلم:أحمد فؤاد نجم
منذ 30 دقيقة 29 ثانية
إيه يا مصريين؟ صلوا ع النبي كده واهمدوا عشان نعرف الكلام طالع منين ونازل علي فين.. يعني المسلم يوحد ربه والقبطي يمجد سيده وتعالوا نتكلم مع بعض عشان نشوف السكة وخدانا لفين.. إنما لوك لوك لوك.. واتناشر بيتكلموا واتنين بيسمعوا كدة نبقي قلبناها عشة فراخ.
أي نعم فيه تباطؤ شديد في اجراءات محاكمة حسني السيد ابراهيم مبارك وعصابته وعيلينه والسيدة الغولة أم العيال المتوحشة لكن هذا التباطؤ اكيد له أسبابه اللي احنا مانعرفهاش إنما أنا اول ما شفت جلسة المحاكمة الأولي حطيت في بطني شادر بطيخ صيفي والمستشار أحمد رفعت رئيس المحكمة اللي خوف بعض الناس من طريقة تعامله السمحة مع دفاع المتهمين طمني انا شخصيا لان محسوبكم رد سجون ومحاكم وعندي خبرة في هذه المسائل لأني سبق وشفت هذه النوعية من القضاة اللي ما تعرفش هو إيه ولا هو مع مين وضد مين لكن عند صدور الحكم كنت باهتف بعلو صوتي «الآن حصحص الحق» ويحيا العدل وبكرة تقولوا أبو النجوم قالها وانا أهوه وانتم أهوه وعلي رأي الفنان الخالد محمود شكوكو «الأيام بيننا».

البت ريم ماجد قمر الأون تي في عادت لتشرق من جديد بعد احتجاب طويل خلاني أبات اتقلب علي نار الشوق وياتري يا هل تري خصوصا بعد اللي جري لقمر دريم البت دينا عبد الرحمن، قلت في عقل بالي
- دي شوطة بقي وطالت أجمل بنات أمنا إيزيس في الإعلام المصري المعاصر، ليه يا ربي كدة؟ هو يعني مكتوب علينا أو مفروض علينا سنية كباس وبهيجة شفتر وباقي الشلت والمراتب من النسوان الكسر اللي مفروضين علينا من يوم ما المخروب التليفزيون المصري انفتح 1960 وفي هذا الشأن قال لي عبده شمه وهو يضحك:
- دي نسوان تعلم الرجالة العفة
وضحك أحمد القزعة قائلا:
- هما فين الرجالة يا غيبوبة
وقال عبده شمة:
- ليه عاد مبجاش في البلد رجالة يا جزعة؟
فقال احمد القزعة:
- والنبي لو قابلت راجل ابقي سلم لي عليه يا غيبوبة
ثم وجه حديثه لي:
- إذا كانت المرا بتقول ع الفطير فتير يبقي دي ليها راجل رباها
وضحك عبده شمة وقال:
- الله يحرجهم لك، دانت واد ماجابتوش ولادة
وقال احمد القزعة:
- إلا قول لي صحيح يا غيبوبة.. هي المرا عندكم بتولد ولا بتبيض
وضحك عبده شمة وضحكنا جميعا لكن برضه انا ح افضل أسأل عن دينا عبد الرحمن لأن أحد الاصدقاء قال لي :
- انت مش صحابك بتوع الجزيرة؟
قلت له:
- أيوة
قال لي:
- طب ما تكلمهم يمكن ياخدوها عندهم
قلت له:
- لا يا صديقي، بنت مصر إذا لم تجد عملا في مصر فعليها أن تلزم دارها ويا دار ما دخلت شر.