انخفاض الإنتاج وموجة الحر وراء ارتفاع الأسعار بالإسماعيلية

«الغلابة مش هياكلوا مانجة السنة ده»، هكذا جاءت كلمات أحد بائعي المانجو بسوق الجمعة بالإسماعيلية، وهو يتحدث عن أسعار المانجو المرتفعة هذا الموسم، أسعار المانجو هذا العام سجلت ارتفاعاً ملحوظاً عن الموسم الماضي تراوحت ما بين 20 و30٪ وذلك بسبب قلة الإنتاج وانخفاض إنتاجية المحصول هذا العام.
يقول رضا موسي، بائع بسوق الجمعة: الغلابة السنة ده مش هياكلوا مانجة.. المانجة سعرها غال وده بسبب الجو الوحش في الشتاء وأول الصيف لأنه وقع الثمار من علي الشجر، وأصحاب مزارع المانجو خسروا علشان كده حاولوا يعوضوا خسارتهم برفع السعر.
وأضاف محمود سميك، أحد البائعين: إحنا مكسبنا في الكيلو مش مكمل جنيه، إحنا بالعافية بنغطي مصاريف النقل، الموسم السنة دي مضروب ومكسبنا محدود جداً.. إحنا بنستني موسم المانجة من السنة للسنة علشان نفرج علي عيالنا وعلشان نوفر مصاريف المدارس لعيالنا، لكن السنة دي الموسم وحش جداً.
وتابع: المانجة الزبدة سعرها ب 8 جنيهات للكيلو بنبيعها، والمانجة السكري الممتاز سعرها وصل ل 13 جنيهاً، والبلدي ب 9 جنيهات، والعويس سعرها وصل ل 23 جنيهاً، وسعر كيلو المانجة الفص 35 جنيهاً.
وأضاف: من 2 ل 3 جنيهات وأكتر زيادة في سعر كيلو المانجة عن السنة اللي فاتت، حتي الناس نفسهم إقبالهم علي الشراء مش زي السنين اللي فاتت اللي كان بياخد 10 كيلو دلوقتي بيكتفي ب 4 كيلو وكده.
وقالت خضرة أم أحمد، بائعة بالسوق: البيع السنة دي مش زي قبل كده خالص، أنا قاعدة من الصبح وكل اللي بيعته 6 كيلو مانجة، الجو كمان حر أوي وده مخلي الناس مش عايزة تنزل الشارع وتيجي تشتري.
وقالت هدي محمود، مديرة مدرسة، من أهالي الإسماعيلية: أسعار المانجو الموسم هذا مرتفعة مقارنة بالسنوات الماضية وكميات المانجو المعروفة في السوق قليلة جداً.. معروف عندنا إحنا الإسماعلاوية أن موسم المانجو ده كان السوق بيتقفل من عربيات وتجار المانجو وأقفاص المانجو اللي كانت فوق بعضها، لكن السنة دي للأسف المحصول إنتاجه قليل جداً.