بائعو المانجو بالإسماعيلية: الموسم مضروب والغلابة مش هياكلوا

"الغلابة مش هياكلوا مانجة السنة دي" هكذا جاءت كلمات أحد بائعو المانجو بسوق الجمعة بالاسماعيلية وهو يتحدث عن اسعار المانجو المرتفعة هذا الموسم.
اسعار المانجو هذا العام سجلت ارتفاعا ملحوظا عن الموسم الماضي تراوحت ما بين 20 الى 30% وذلك بسبب قلة الانتاج وانخفاض انتاجية المحصول هذا العام.
وقال رضا موسى بائع بسوق الجمعة، "الغلابة السنة ده مش هياكلوا مانجة .المانجة سعرها غالي وده بسبب الجو الوحش في الشتاء واول الصيف لانه وقع الثمار من على الشجر واصحاب مزارع المانجو خسروا عشان كده حاولوا يعوضوا خسارتهم برفع السعر".
وقال محمود سميك احد البائعين، " احننا مكسبنا في الكيلو مش مكمل جنيه، احنا بالعافية بنغطي مصاريف النقل، الموسم السنة دي مضروب ومكسبنا محدود جدا، احنا بنستنى موسم المانجة من السنة للسنة عشان نفرج على عيالنا وعشان نوفر مصاريف المدارس لعيالنا لكن السنة ده الموسم وحش جدا ".
وتابع "المانجة الزبدة سعرها ب 8 جنيهات للكيلو بنبيعها والمانجة السكري الممتاز سعرها وصل ل 13 جنيها والبلدي ب 9 جنيهات والعويس سعرها وصل ل 23 جنيها وسعر كيلو المانجة الفص 35 جنيها.
واضاف "من 2 ل 3 جنيه واكتر زيادة في سعر كيلو المانجة عن السنة اللي فاتت، حتى الناس نفسهم اقبالهم على الشراء مش زي السنين اللي فاتت اللي كان بياخد 10 كيلو دلوقتي بيكتفي ب 4 كيلو وكده".
وقالت خضرة ام احمد بائعة بالسوق، "البيع السنة ده مش زي قبل كده خالص .انا قاعدة من الصبح وكل اللي بيعته 6 كيلو مانجة .الجو كمان حار اوي وده مخلي الناس مش عايزة تنزل الشارع وتيجي تشتري".
وقالت هدى محمود مديرة مدرسة من اهالي الاسماعيلية "اسعار المانجو الموسم هذا مرتفعة بالمقارنة بالسنوات الماضية وكميات المانجو المعروضة في السوق قليلة جدا، معروف عندنا احنا الاسمعلاوية ان موسم المانجو ده كان السوق بيتقفل من عربيات وتجار المانجو واقفاص المانجو اللي كانت فوق بعضها لكن السنة ده للاسف المحصول انتاجه قليل جدا".