شباك علي الثورة

كاد عبده شمه ينفجر وهو مستغرق في نوبة ضحك هيستيرية
قلت له
- اللهم اجعله خير يا حاج عبده
قال وهو مستمر في الضحك
- خير ييجي منين يا عم أحمد طول ما بوزي في بوز الفجري ده «واشار إلي أحمد القزعة»
قلت له
- وإيه الجديد يعني؟
قال وهو يشير إلي أحمد القزعة
- واكل ايده ده هو المتمدد الله يحرجه ثم عاد لنوبة الضحك الهستيري
فقال احمد القزعة
- يخيب خيبتك اللي ما يقول يا عزيز
فقال عبده شمه
- تحب نجول لعمك أحمد ونشوف رأيه؟
فقال احمد القزعة
- قول يا غيبوبة.. إشجينا
فقال عبده شمه وهو لا يتمالك نفسه من الضحك
- المدعوج ده كنا مجعمزين أنا وهو في أمان الله بنشوف أخبار الجزيرة إلا والمكلوب ده بيجولي لما عنديك جرايب في ليبيا أمال فجري ليه؟
قلت له
- وهو ايش عرفه ان ليك قرايب في ليبيا
وعاد عبده شمه لنوبة الضحك وهو يقول
- فيه يا سيدي وزير كان مع الجذافي وانضم للثورة
قلت
- وفي إيه ده يعني ايه اللي يضحك في الموضوع
قال
- اللي يضحك ياعم احمد ان الوزير إسمه موسي كوسة وبرضه مش ده مربط الفرس
قلت له
- امال مين مربط الفرس
قال لي
- الفجري ده اول ما سمع اسم الوزير جاللي الوزير ده لازم أصله مصري
وضحك احمد القزعة وقال
- طب انت ياعم احمد عمرك سمعت علي بلد بتزرع الكوسة غير مصر المحروسة؟
قلت له
- أنا ما سمعتش انما يمكن غيري يكون سمع
وقال عبده شمه
- لكن صح إخواننا الليبيين عفارم عليهم ربنا يحرسهم وينصرهم
فقال احمد القزعة
- واخواتنا السوريين لأ يا غيبوبة؟
فقال عبده شمه
- كيف لأ؟ دول ربنا يجويهم ويصبرهم وينصرهم
وقال أحمد القزعة
- انما ياعم احمد الأسلحة الرهيبة اللي بيضربوا بيها الناس دي جابوها منين
قلت له
- جابوها من فلوس الناس برضه ولو كانوا استعملوا الاسلحة دي في تحرير الجولان كان وماله ولو كانوا عايزين فلوس كمان كان الشعب اداهم ودعي لهم بالنصر كمان
وقال احمد القزعة
- حلوة اللعبة دي.. آخد فلوسك اجيب بيها سلاح أحرر بيه الارض المحتلة وبعدها اجيب السلاح اجربه فيك يا صاحب الفلوس والارض يا شعب سوريا الحبيب الجميل.
أحمد فؤاد نجم