"رمضان شهر الصوم والبركة".. مقوله نشأنا واتربينا عليها من زمان لكن سنية مراتى لها رأى تانى .."رمضان شهر المسلسلات والتليفونات"!!.. ليل نهار تتفرج ع المسلسلات.. وبين كل مسلسل والتانى تهرى نفسها تليفونات مع أمها وجيرانها , ومن أول يوم فى رمضان مابقيتش قادر أتحرك فى البيت أو أتكلم نص كلمه.. أول ماأقولها وطى التليفزيون شوية تصرخ فى وشى وتقول.." إستنى لما أشوف حلقة النهارده من مسلسل المواطن اكس ..الواد مات ياحبة عين أمه..وأبوه شاف شريط الفيديو وماقلهاش"!!.. أدخل أنام شوية بعد الضهر تروح معّليه التليفزيون عشان واقفة فى المطبخ وعاوزه تسمع "آدم" وتشوف تامر حسنى عمل إيه النهارده.. وإحنا بنفطر تفتح على "شارع عبد العزيز" وتقعد تنقرزنى بالكلام وتقولى"شايف حلاوة وجمال الواد عمرو سعد اللى داير مع نص بنات المسلسل.. مش انت .. عاملىّ زى العمل الردى بمنظرك ده!!".. آجى انزل أصلىّ التراويح أسمعها بتكلم أمها.."مسيو رمضان مبروك أبو العلمين حمودة ده عامل زى سى السيد.. لكن البت مراته دى زى العسل.. ولا ليلى طاهر اللى زى الشربات دى..عمرها ما بتكبر أبدا.. تصدقى ياماما إنها أكبر منك ورغم كده مش باين عليها؟.. هو إيه اللى عاملاه فى نفسها ياختى ده؟!!" .. انفلونزا المسلسلات وأول ما ارجع من التراويح ألاقيها ماسكة نفس التليفون بس بتكلم جارتنا وبتقول.." اقفلى دلوقتى يا أم سماسم أحسن مسلسل "عابد كرمان" جه.. وأنا بموت فى الواد تيم حسن الحليوه الأمور ده!! ونفضل فى الموال ده لغاية السحور.. يخلص مسلسل"دوران شبرا".. بعدها على طول تقلب على "كيد النسا".. ويا سلام لو جم مسلسلين فى وقت واحد.. بتجيب لى حول فى عنيه.. تمسك الريموت كونترول وتقلب دقيقة هنا .. ودقيقة هناك .. وماشاء الله عليها عقل ذرى.. تقدر تتابع خمس مسلسلات فى وقت واحد بكل تفاصيلهم وأحداثهم .. ولوحاولت اخليها تسيبلى التليفزيون اشوف حاجة تانية .. يبقى نهار أبويا أسود.. م الآخر ما ستحملتش.. جاتلى نفس العدوى .. أى حد ييجى يشوفنا دلوقت يلاقينى رابط منديل بؤويه على راسى وقاعد جنبها ع الكنبة وبقول.." اسكتى ياختى.. شفتى حلاوة البت أروى جودة اللى قايمة بدور ليلى فى مسلسل المواطن اكس؟.. ولا دلع الخواجاية اللى مع هنيدى فى مسيو رمضان أبو العلمين حمودة ؟!..ولا البت علا غانم واللى عاملاه فى شارع عبد العزيز... ولا سمية الخشاب فى كيد النسا؟...هى مالها تخنت كده ليه؟.. بيقولوا ياختى عيانة وبتاخد كورتيزون!! بقلم: عمرو عكاشة المحروس وافتكاساته..! العادي بتاعنا طول السنه إن المحروس مسيطر على الريموت كنترول.. شايف طالما هو راجل البيت يبقى الريموت لازم يكون معاه.. بتتطلع روحي لو عايزه اتابع حاجه معينه في التلفزيون.. باعمل موشحات بلدي وافرنجي.. ولا الهوا، وتملي قارفني بأم المصارعه الحره اللي مفيش وراه غيرها.. بس اللي بيحصل طول السنه كوم واللي بيحصل في رمضان كوم تاني! بيختار له مسلسلين تلاته من اللي على مزاجه.. وحضرته خلف خلاف.. يعني تبقى الناس كلها متابعه مسلسل معين مكسر الدنيا وحضرته متابعلي مسلسل الناس كلها شايفاه تافه وأي كلام!! المهم قبل رمضان المحروس سجل في ورقه معاه كل مسلسل هيجي الساعة كام وعلى أنه قناة.. وكل شويه اسأله: "ها..هنتابع مسلسل إيه السنه دي؟"..مايردش..أصل حضرته متعود يعملهالي مفاجأة.. أنا قلت في نفسي خلاص كده كده اليوم قصير ويبقى كويس أوي لو قدرنا نشوف مسلسل ولا اتنين.. فامش مهم هو هيفرجني على إيه..المسلسل اللي يعجبني ممكن أشوفه في الإعاده! لكن السنه دي المحروس افتكس حتة دين افتكاسه انما إيه ..جديدة لانج.. تلاته في واحد جاب لزوم القعده كنافه وقطايف ومكسرات..اشي عين جمل ولوز وشوية فول سوداني بقشره.. وطبق مهلبيه وطبق رز بلبن.. وفتح على مسلسل لجمال سليمان..قلت حلو..المسلسل ده بيقولوا عليه حلو..هو درامي شويه بس مش بطال..شدتني الأحداث وهنجت قدام التلفزيون..مفيش عشر دقايق ولقيت المحروس قلب على قناة تانيه بتعرض مسلسل لأحمد مكي بيضحك اوي..استغربت اوي..قلت: "ايه يا محروس..قلبت ليه؟" لقيته من غير ما يبصلي بيقول "هشششش اتفرجي وانت ساكته!"..قلت في عقل بالي وماله نديها أحمد مكي أهو دمه خفيف.. مقدرتش امسك نفسي من الضحك..وانا بسخسخ لقيته قلب على قناة تالته عليها مسلسل منيل كله نكد لنور الشريف.. شخطت وأنا بقول: "فيه إيه يا محروس..ما تركز!!" ولا الهوا..قلت في عقل بالي أكيد هيستقر على حاجه هو بس تلاقيه محتار.. واتشديت للمسلسل ودخلت في مود نكد.. وأول ما الدمعه خلاص هتفر من عينيا..لقيت المحروس قلب تاني على أحمد مكي..ولعت!! يعني انا اعمل ايه دلوقتي!! أعيط ولا اضحك!! مفيش دقايق ورجع المحروس لجمال سليمان!! ولعت وضغطي جاب الرابع وانا بقوله: "مساء الاستفزاز يا محروس..ما ترسيلك على بر خلينا نعرف نتفرج في أم الليله دي!!"..راح قايل وهو بيلعبلي حواجبه: "هتفضلي طول عمرك عبيطه وهبله.. ده بدل ما تشكريني..إنت آخرك كنتي هتتفرجي على مسلسل ولا اتنين في اليوم..انا بقى هخليكي تشوفي تلاته في وقت واحد!!..زغردي يا وليه!!" بقلم : رانيا صالح