شواكيش

إحنا بتوع الميكروباص!!

فى الأسبوع الماضي ناشدنا الحكومة: «الشعب يُريد إلغاء التوقيت الصيفى المعفرت».. والحكومة استجابت فى نفس اليوم على خُطى: «التوقيت اللى ييجى منه الريح.. نلغيه ونستريح»!!
بعد إلغاء التوقيت الصيفى.. المصريون بقى عندهم فرحة «ساعة تروح وساعة تيجى»!!
بمناسبة إلغاء التوقيت الصيفى: الفساد بقى زى «الجيلى».. والإفساد زى «الآيس كريم» الأول بيتأكل بمعلقة فضة.. والثانى بمعلقة دهب عيار أربعة وعشرين!!
من تخاريف التلوث المائى: المية بالفوسفات تروى العطشان.. وتفتح شهية الجعان.. وتكشفت قلب الحكومة المرضان!!
على رأى الإعلامى الحنجورى جابر بن القرموطى عن تلوت المياه: القُلة هى الحل.. وطبعا السر فى «بطن الزير»!!
بعد تلوث مياه النيل أكيد كركون الفنان عادل إمام يستغيث: «شربت فوسفات يا سعاد»!!
بمناسبة التلوث المائى نُهدى لكل مسئول أغنية: ما شربتش من نيلها.. ولا دُقت فوسفاتها.. تعالى نغنيلها لحد ما يعدلها»!!
السويسرى من أكثر شعوب العالم «سعادة» والمصرى «الأتعس».. ابتسم من فضلك علشان «الميه» تطلع حلوة!!
وزير «الكورة والملاعب» خالد عبد العزيز زعم وجود وظائف للشباب ب 5 آلاف جنيه ولا تجد من يشغلها على طريقة «اشغل الوظيفة.. وخد التانية هدية حريفة»!!
حركة تنقلات قيادات الشرطة الأخيرة دقت «نوبة صحيان» وعلى جميع قوات مكافحة الإرهاب «شد الأجزاء»!!
الباحث والإعلامى إسلام بحيرى خرج خاسرا من «موقعة المناظرة».. بلا برنامج ولا أحزنون!!
وزير الاتصالات خالد نجم زف بشرى بتخفيض أسعار الإنترنت على طريقة «التت فى النت»!!
«رقاصة» وهز وسط «طلبة بالثانوي» فى حفلة مدرسية.. فضيحة تعليمية ع الريحة.. والعلم أصبح دلوقتى يكيل ب «النقوط» مش بالبدنجان!!
على طريقة إفيه الشاويش عطية: إنت «متأخون» وعندك والعياذ بالله «مناخوليا» ربُع ساعة تروح.. وربُع ساعة تييجى!
قيادات الجماعة لبسوا البدلة الحمرااا.. وده التطور الطبيعى للجماعة الإرهابية.. يا إرهابى إسترجل واشرب «مولوتوف»!!
الرئيس المعزول «مرسى» ارتدى «البدلة الزرقا» فى سجن برج العرب.. عُقبال البدلة الحمرا «الشفتشى» يا ريس العشيرة اختشى!!
بعد ظهور خوارج العصر.. أصبحنا نشوف البلد نُصين . نُص من إزازة مولوتوف.. والنص الآخر من فرقعة قنبلة دخان!!
المصريون يستهلكون فياجرا ب 7.5 مليار جنيه.. ورغم ذلك لسه بنشاهد فيلم «النوم فى العسل» عرض مستمر!!
بمناسبة أغانى أهل «الهلس» والتنطيط فى أفلام «السُبكية» اليومين دول.. عمنا «بيرم التونسى» بيرد عليهم: «يا أهل المغنى.. دماغنا وجعنا.. دقيقة سكوت لله»!!
المهندس رزق على رئيس هيئة النقل العام بالقاهرة زاعماً: «نفسى أشوف راكب وأقف فى الأتوبيس».. واحنا الشعب بنقوله: احنا بتوع الميكروباص!!
على رد الإعلامى يوسف الحسينى لرئيس الهيئة: «احنا مقضيينها شعبطة»!!
بعد ضبط 50 شجرة بانجو فى مشتل وحدة محلية ببنى سويف.. فساد المحليات انتقل من «الرُكب» إلى «الدماغ».. وإديه سيجارة بُنى!!
لمن يهمه الأمر: الغلابة فى اسواق الغلاء ماتوا «فطيس».. وحلمهم لبكرة طلع «كوابيس».. وخوفنا بعد بكرة يخرجوا من «القمم» مهاويس.. أصل الحكاية مش محتاجة فذلكة ولا تهييس!!
آخر شوكشة
نحن شعب نشبع حتى نجوع.. ونجوع حتى «ننتحر» شنقاً من قلة الجوع.. وعجبى ع الزمن العجبى!!
‏