كفاية لقدامى الإعلاميين.. ع الفيس بوك

كفاية لقدامى الإعلاميين.. ع الفيس بوك
كتبت – سارة عزو :
الأحد , 07 أغسطس 2011 13:55
"كفاية قدامى الإعلاميين ونستفيد بقى بالخريجين" .. عنوان صفحة جديدة على الفيس بوك قامت بتدشينها نورهان
عصام خريجة قسم الإعلام بكلية آداب جامعة عين شمس .
أكدت فى الصفحة رغبتها في العمل في مجال دراستها للإعلام قائلة: "أنا من خريجي إعلام وبالأخص آداب إعلام قبل مانتخرج أنا ومعظم دفعتي كان عندنا أمل خصوصا إننا دفعة الثورة، حسينا إن في حاجات كتير أتغيرت وأخيرا هانخرج نلاقى الحياة حلوة ونشتغل في مجالنا لكن اللي لاقيناه عكس ما توقعناه تماماً فمازال الأمل يتسرب من تحت أيدينا ولكن يوم بعد يوم تزيد سرعة فقدان الأمل وربنا يحفظنا من التشاؤم واليأس".
وأضافت:"في الأيام الأخيرة شهدنا افتتاح العديد من القنوات الفضائية ولكني كلما بحثت في قناة أجد كل برامجها لا تحتوي سوى برامج يقدمها مشاهير المذيعين والمذيعات، فلماذا لا تستعين القنوات سوى بكبار الإعلاميين".
اتفق معها في الرأي معظم الأعضاء ومنهم هند محمود التي قالت: " دلوقتي بقي لاعب كرة القدم والممثل والدكتور وخريجي تجارة وحقوق بيشتغلوا مذيعين، وكأن خلاص البلد مبقاش فيها إعلاميين خالص".
وأكد محمد شهاب قائلا:" لازم نأخذ فرصتنا ونشتغل في مجالنا".
وأضافت هايدي حمدي: " كفاية فعلا عليهم، ده الإعلاميين الموجودين حاليا كلهم يقربوا من بعيد أو قريب لإعلاميين كبار وقدامى، إحنا يعنى نروح فين ؟!!.
أوضحت آية أشرف: "بجد الموضوع ده بقي مستفز كأن ما فيش حد من خريجي ودارسي إعلام ليه الحق انه يشتغل في المجال اللي درسه سنين وسنين".
بينما اختلفت مع الصفحة خلود علوان التي قالت: " ما حدش يقدر يقول كفاية للإعلاميين القدامى لأنهم أصحاب خبرة وتعبوا كتير عشان يثبتوا نفسهم إحنا ممكن نطالب إننا نكون تحت قيادة الإعلاميين الكبار حتى نأخذ فرصتنا، لكن كفاية كوسة وواسطة وده في كل حاجة مش في الإعلام بس".